YÔSUĀ 9 - TÖHET LĪPÖRE (Re-edited) Bible (BSI)

Hachīlö Yôsuā Yik Aṅ Kipīön

¹ Ngaich ngö inlahen angū-ö, hē yik rācha nö ṙòkhöre yik lamuh tö Yôtön, i kui rung panam, i töṙā-akūö panam inrē ṙòkhöre inrē yip aṅ kuyāyö öp Tökiröng Mai lākūö Lëpenön, yik Hitait, Amôr, Kanā-an, Përis, Hivait, Yëpus, nö hāngö e;

² Hamūlöre ngaich cha-a, nö kiyūngö Yôsuā tö yik Israĕl inrē nö hēngòng ellōn.

³ Hē yik aṅ Kipīön pöri nö hang tī Yôsuā tö yik aṅ Ai tö Yerikō inrē,

⁴ Ngaich cha-a inrē nö milichngen, ngaich kiröönngöre ngaich vī-ire nö sā töt īni tö aṅ panamre, kē hötṙeh cha-a sāk nö i uk nuk kötta cha, uk inrē chūök vāin, hötṙeh töng takaich inrē nöng nyëkhakkūö;

⁵ Hötṙeh inrē kunröpö i kunröön cha töng löpka, hötṙeh inrē inyut cha; ṙòkhöre nuk rôtī inrē nyā-aṅkūö cha nöng nyô haveūngu elmat inrē.

⁶ Chuh in Yôsuā cha-a ngaich nö ik elyöngö i Kilkāl, ngaich ngö ṙô tö ò, yik tarik Israĕl inrē, Yamih in īhö ṙā-ang tömarôvat panam: tā-a lökten yin vī kinlēḵngô in ih.

⁷ Ngaich ngö ṙô yik tarik Israĕl tö yik Hivait, Lohten yin höng mī-iyöng in ih; ngaich sitih inlahen īhö min vī kinlēḵngô in yīö?

⁸ Ngaich ngö ṙô cha-a tö Yôsuā, Tarik meh in īhö. Ngaich ngö ṙô Yôsuā tö cha, Achīö öi yī-ö? Ṙamā-ang yih öyih?

⁹ Ngaich ngö ṙô cha-a tö ò, Ṙeū-eung tömarôvat panam yin vē tarik meh nö yih tökūö i minë-eny ngam Tēv meh ngam Mā Tēv: pò ih hang ineūnyö ò, hang nuk tī ò inrē nö i Aikup,

¹⁰ Nuk tī ò inrē nö ṙòkhöre i nak tönët tak rācha aṅ Amôr, nak lamuh tö Yôtön, Sihòn ök rācha Hespòn, Ôk ök rācha Pasān, ök mi-i Astòròt.

¹¹ Ngaich yip minṙöinylen, ṙòkhöre inrē yip aṅ panam ih nö vë-ekūö ih nö ngö ṙô, Kē nyā-aṅkūö yin eltīre im kinröönngö yīö, kuṙòh höngkūö cha, ngö ṙô tö cha inrē, Tarik meh in īhö, yĕh ngaich vītö kinlēḵngô in ih.

¹² Töṙāich nun në rôtī nö kē-ĕ nö nyā-aṅ kūö ih nö ṙā-ang el patī ih ik sakāmö hēngörit ih chuh in yīö; yĕh meuk, ngaich nun chö pöri nö nyô, haveūngu elmat inrē.

¹³ Ngaich në uk chūök vain në töhatöölöng tö ih, në tufömngöre hē e; yĕh meuk, ngaich nun yih nö takaich; tö në kunröpö ih nö köiny nö ngaich kūö ngam tamarô-òlkūö kinröönngö.

¹⁴ Ngaich yik tarik nö kē nuk nyā-aṅkūö nöng öt havëkö inlēnöre tö aṅ elvāng ngam Mā Tēv.

¹⁵ Ngaich Yôsuā nö vī lanāmö nö in cha, vī kinlēḵngô inrē nö in cha, nö hökngen cha nö aṅ: chūökṙô inrē nö in cha yik mā nö i yik tömaṙôngö nö kilēḵngôre.

¹⁶ Ngaich ngö inlahen angū-ö i kinheūten tölūöi sumkam unôichrit cha nö vī kinlēḵngô nö in cha, tö cha nö hāngö cha nöng ranghen cha, tö cha inrē nöng iyöng in cha.

¹⁷ Kiröönngöre ngaich yik Israĕl, ngaich sölta nö i nuk elpanam cha im linūöi sumkam. Në nun elpanam cha Kipīön, Kefira, Pīrôt, Kiriat Yearim inrē.

¹⁸ Ngaich yik kūön Israĕl nö öt fëlö cha, pô yik mā in yik tömaṙôngö nö ngaich nö chūöku ṙô nö kilēḵngôre nö in cha nö im Mā Tēv, Ngaich ṙòkhöre yik tömaṙôngö nö hiṙeūtkôre nö kunyahalōn nö in Mā.

¹⁹ Ṙòkhöre pöri yik mā nö ngô ṙô tö yik tömaṙôngö, Katūöchi ṙô in ngaich im Mā Tēv, ngam Tēv Israĕl: lökten in ngaich öt lūölken cha.

²⁰ Ngih ön inlahen tī hī min tö cha, hökngen cha hòṅ hī öt aṅhav kui tö lanīnö, tökūö ngam tö chūöku kinlēḵngô hī in cha.

²¹ Ngaich ngö ṙô yik mā tö cha, Hökngen cha nö aṅ: hòṅ cha nöng kamūöl ngòh vē tömaṙôngö tamūök mak inrē; sā ṙô yik mā nö ngaich nö in cha.

²² Ngaich havëten cha Yôsuā, yik tarik kitīön ngaich vë-ekūö cha anga-aṅ, nö ngö ṙô, Kūöyòh öi michīl tö ih, öi ngö ṙô, Tömaṙôvat in ī-hö tö yīö; yē yīö töng mī-iyöng in ih?

²³ Lökten yin ngaich töthakôlöngṙô öt hĕng tak min ṙamākenre tö yīö nö töhakövö öi kamūöl ngòh hĕnghöre famòk mak ngam patī ngam Tēv chu.

²⁴ Ngaich sap ṙô Yôsuā cha-a nö ngö ṙô, Pò e nö kô-en vinënyi nö in vē tarik meh, nö tölṙô ök tarikre Môsös nö kē-ĕkūö, yīö tö në panam nö ṙòkhöre, ngaich hōtö inhatngö yip aṅkūö në panam nö i kūö yīö; lökten ih kiröngö pinhë-eṅkūö tökūö yīö kūö në nômö ih, ngaich öi ngatī inlahen.

²⁵ Yĕh meuk, eltī yīö in ngaich: sā öp tölöök öp töhuveū inrē tī meh tö ih, ngatī yēḵ ngaich.

²⁶ Ngaich ngati tī anga-aṅ tö cha, nö ṙānyen cha nö ṙā-ang eltī yik kūön Israĕl nö sōten cha nö fëlngen cha.

²⁷ Ngaich Yôsuā nö vīten cha ik sakāmö angū-ö nö kamūöl ngòh famòk mak yik tömaṙôngö, famòk mak i chūök ök vine-ekūö ngam Mā Tēv, söl i ngih sakāmö, ip töng chūökö atöllö ò.