YÔSUĀ 8 - TÖHET LĪPÖRE (Re-edited) Bible (BSI)

Kinë-eṅ Tö Ngam Pinyāyngö Aī

¹ Ngaich ngö ṙô ngam Mā Tēv tö Yôsuā, Un pa-ekūö, um rēhĕn rötngörāi: kē yip tarik man kumyung nö ṙòkhöre nö in meh, choholre, kuṙòh chuh Ai: yĕh meuk, ngaich chin kētö ap rācha Ai nö eltī meh, tö yip tarik ò, tö ngam elpanam ò, töm panam ò inrē.

² Ngaich sā tīre më-eṅ tö Yerikō tök rācha e inrē öm in Ai töp rācha e inrē; höng nup tökē-ĕ pöri aṅ e, tö nup nuā aṅ e, anū-ö pôḵ yīö tökē-ĕ kanahngen yīö: ṙātö mahayunngöre nö höng ngam elpanam lamuh tö e.

³ Choholre ngaich Yôsuā, tö yik kumyung tarik nö ṙòkhöre, nö chuh Ai: Ngaich Yôsuā nö lūöi anāi köny atöllö tö tarik tökalēḵ töt pa-ekūö nö tarik, ngaich tīnngen cha tö hatööm.

⁴ Ngaich töl ṙô cha anga-aṅ, nö ngö ṙô Yĕh meuk höng yin öi hayun ngam elpanam, lamuh tö ngam elpanam: ui kiröönngöre marôvat töm elpanam, lēn pöri öi ṙòkhöre:

⁵ Ngaich chū-ö min, tö vē tarik in chu, söötöre min im elpanam: ngaich angū-ö min, hē cha nö kunyī-inyre nö lā-al ih, nö sā ik raneh, ngaich īhö min falngöre i kūö cha:

⁶ Ngaich kunyī-inyre min cha-a nö lū-u ih, hanöng saha ih marôvat tī tö cha tö ngam elpanam: ngaich ngö ṙô min cha-a, Falngöre yin tö hī, nö sā ik raneh; ngatī min īhö falngöre i kūö cha:

⁷ Ngaich choholre yī-ö min ṙeū-eung ip chūökre höng, ngaich kē ngam elpanam: pò ngam Tēv yīö ngam Mā Tēv min nö kētö e nö eltī yīö.

⁸ Ngaich min angū-ö, yē yīö kē ngam elpanam, föng tökūö ngam elpanam yī-ö min tö tameūyö; sāṙô ngam Mā Tēv ngatī tī yī-ö: yĕh meuk ngaich chin tölṙô yīö:

⁹ Tīnngen cha ngaich Yôsuā nö im hinööngö, ngaich iyöng ihôi Pētĕl tö Ai, lā sūng tö Ai: im hatööm pöri angū-ö ang Yôsuā nöng iyöng in yik tarik.

¹⁰ Choholre ngaich Yôsuā nö ka-euilökūö im peuheū, ngaich hamūl yik tarik, ngaich kiröönngöre nö urēhĕkūö yik tarik nö chuh Ai, anga-aṅ tö yik minṙöinylen Israĕl inrē.

¹¹ Ṙòkhöre ngaich yik tarik, yik mi-in ò kumyung, nö kiröönngöre, ngaich haröhtöre, yihtöre inrē nö i kūö ök elpanam, ngaich vītö elyöngöre nö lā kapā tö Ai: achāṙö ök umuh ihôi ò tö Ai.

¹² Taneui köny yik tarik kahë ò, ngaich ṙāten cha anga-aṅ nö höng ihôi Pētĕl tö Ai, lā sung tö ngam elngam elpanam.

¹³ Ngaich cha-a nö ṙā yik tarik ṙòkhöre yik kumyung lamā kapā tök elpanam tö yik hamöng lā sūng tö ngam elpanam; ngaich im hatööm Yôsuā nö chuh ellōn ngam achāṙö.

¹⁴ Ngaich angū-ö nö ngö inlahen, hē ök rācha aṅ Ai nö meūkö e, kurāten cha-a ngaich nö kaeuilökūö nö choholre, ngaich kunyī-inyre yik tarik aṅ ngam elpanam nö lā-al Israĕl nö kiyung, hē ök ṙētak töhalēni, nö lākūö Arāpa, anga-aṅ tö yik tarik ò; hö-ö pöri anga-aṅ nö akahalōn tö yik hamöng lā-al ò lamuh tö ngam elpanam.

¹⁵ Ngaich Yôsuā ṙòkhöre yik Israĕl inrē nö asā tötkô tö cha, ngaich falngöre nö lök el talöökö öp tönyalnyi.

¹⁶ Ngaich ṙòkhöre yik tarik el ngam elpanam nö havëtu nö lū-u cha: lū-u Yôsuā ngaich cha-a, ngaich marôvat töm elpanam nö haṙöiyi.

¹⁷ Ngaich öt hĕngtit tak tarik töṙā-ayi nö i Ai hēk i Pētĕl, öp töt kumröönngöre nö lū yik Israĕl: ṙāngöm elpanam cha-a nöng luvë-ak kūö, ngaich lū yik Israĕl.

¹⁸ Ngaich ngö ṙô ngam Mā Tēv tö Yôsuā, hateutnyö ngam manlönre man ngam eltī meh nö kū-ötö Ai; tön kētö e chin nö eltī meh. Hateutnyö ök manlön re ngaich Yôsuā ök më-eltī ò nö kū-ötö ngam elpanam.

¹⁹ Choholre ngaich yik hamöng nö ka-eūyen nö ṙā-ang el chūökre, ilööṙen cha-a ngaich nö fël hē inteuntnyö kël ò, kuhēthötre ngaich nö el ngam elpanam, ngaich kē-ĕ e; föngtökūö ngam elpanam cha-a ngaich nö kaeūyen.

²⁰ Ngaich hē yik tarik aṅ Ai nö tēk ukre, meuk cha-a ngaich, yĕh meuk, yônlö nuk lul ngam elpanam nö el halīöngö, ngaich cha-a nö öt kumlē-ĕvö nö falngöre nö lök ihī-a hēk umū-aṅ: ngaich yik tarik famalngöre nö el tönyalnyi nö havöö yik lamū-ure.

²¹ Ngaich hē Yôsuā tö yik Israĕl inrē nö meuk ngam elpanam nö kē-ĕ tö yik mahayunngöre nö höng, tök lul ngam el panam inrē nö yônlö, havöökūöre cha-a nö hēk ngaich fëlngö yik tarik aṅ Ai.

²² Kunyī-inyre yik tahëng nö ṙā-ang ël ngam elpanam nö lā-al cha; ngaich lökten cha nö ellōn yik Israĕl, rīkre lāhih, rīkre inrē lāmū-aṅ; ngaich cha-a nö fëlngen cha, ngaich lökten cha nö öthĕng tak tö hökiṙen nö öt kô-òngvah tö cha.

²³ Kē-ĕ ök rācha aṅ Ai tö cha nöng aṅ, ngaich kētu nö in Yôsuā.

²⁴ Ngaich ngö inlahen angū-ö, hē yik Israĕl nö keuheūtötī nö fëlngö yik aṅ Ai nö el kahôyö el tönyalnyi inrē ip chūök cha nö lū-u cha, ngaich ṙòkhngöre vah cha-a tökūö sanët, hanöng saha cha nö keuheūtngörevah ngaich möl yik Israĕl nö havan nö i Ai, ngaich fëlngen e nö aṅtī tö sanët.

²⁵ Ngaich ṙòkhöre yik tökapah ik sakāmö angū-ö, hĕnghöre kikōnyö inrē nö nëtsīön köny, höng ṙòkhöre yik tarik aṅ Ai.

²⁶ Pò Yôsuā nö öt kiruthöt ök këlre, ök chūök ök manlön nö hateutnyu tö ò, hanöng saha tī ò nö keuheūtngöre vah tī tö yik aṅ Ai.

²⁷ Höng nuk nuā pòḵ cha aṅ ngam panam tökē-ĕ tö Israĕl nö kanahngen cha, sā ṙô ngam Mā Tēv nö tölṙô Yôsuā.

²⁸ Haṙāpngen Ai ngaich ang Yôsuā, ngaich vīngen e nöng fônghaka nö örheūheu, nö töt kanôluṙô, söl i ngih sakāmö.

²⁹ Ngaich ök rācha aṅ Ai nö i rōi chōn nö kiseūti tö ò söl harap: ngaich i maneuttö ngam tavūöi ang Yôsuā nö tölṙô, ngaich cha-a nö ṙātö ök tökapah alaha ò nö ṙā-ang rōi ök chōn, ngaich kavalngen e nö i lökhöt im inkūp ngam el panam, afônglö tökiröng fôngö ihong ngaich, söl i ngih sakāmö.

Vë-evkūö Ngam Chöngö Nö Im Rung Ēpôl

³⁰ Ngaich Yôsuā nö vīlö tanöönglö nö im Mā Tēv, ngam Tēv Israĕl, i kui öp rung Ēpôl,

³¹ Sā ṙô Môsös ök tarik ngam Mā Tēv nö tölṙô yik kūön Israĕl, sā kinūichngö e i mat ngam līpöre chöngö Môsös, öp tanöönglö töng kumëngṙòng ihong öp töt köötlöng tövët tö tarik: ngaich cha-a nö kētö töföngö tökētu nö im Mā Tēv, ane inrē kētö tökētu nö im lanāmö.

³² Ngaich anga-aṅ nö kūich kui nuk ihong tö insā ök chöngö Môsös nuk kahūich ò, nö i kūö yik kūön Israĕl.

³³ Ṙòkhöre yik aṅ Israĕl, tö yik minṙöinylen yöngkūö kumyung inrē, tö yik ma-akah fālen cha inrē, nö sökhaka nö lök lāhih tök kasòng lök lāhī-a inrē nö urēhĕkūö yik kūönṙô yik Lēvī, yik kameun ök kasòng chöngö ngam Mā Tēv, tö yik aṅ tahëng, nö sā tökayôḵnyu nö i patī; ròngti tö cha i kūö ök rung Kerisim, ròngti inrē tö cha nö i kūö öp rung Ēpôl; sā tinöölô cha tö Môsös ök tarik ngam Mā Tēv, nö hōten cha nö urĕh nö hakôlò yik Israĕl.

³⁴ Ngaich unôich anga-aṅ nö vë-ekūö nup ṙô ngam chöngö, ngam inkôlò tö ngam öt inkôlò, sā kinūichngö u nö i mat līpöre chöngö.

³⁵ Öt hĕng hang ṙô nuk hachöngten Môsös, tötve-evkūö tö Yôsuā nö i kūö yik tömūl Israĕl, yik kikānö, yik nyīö, aṅ tahëng inrē töhuveū-en nö in cha.