YÔSUĀ 6 - TÖHET LĪPÖRE (Re-edited) Bible (BSI)

Tinṙölngö Yerikō

¹ Öpikūö ngaich Yerikō tökūö yik kūön Israĕl: öt kumnyī-inyrevö, öt kumhēthötrevö inrē.

² Ngaich ngö ṙô ngam Mā Tēv tö Yôsuā, Yĕh meuk, ngaich chin kēten Yerikō nö eltī meh, töp rācha e, tö yip tökalēḵ tarik töt pinhë-eṅvkūö inrē.

³ Ngaich yī-ö min havī ngam elpanam, hĕng van öi kiröönngöre havī ngam elpanam, ṙòkhöre yip tarik kumyung. Tafūöl sumkam yī-ö öi ngatī inlahen.

⁴ Sat tak min yip kūönṙô kēkö tösat römpet sinrōl kūön sīṅp urēhĕkūö ngam kasòng: im sinātö sakāmö yī-ö min satvan havī ngam elpanam, ngaich kūönṙô min nö föö nup römpet.

⁵ Ngaich min angū-ö, ip hē cha nö marôta ṙô nö föö kūö ngam sinrōl sīṅp, ngaich hē yīö hang ṙô ngam römpet, ṙòkhöre ngaich yip tarik min nö pōitô nö hū-a; fukngö min ngaich nö paṙāpkötī ngam kinlonglö ngam elpanam, ngaich min yip tarik nö kö hachipkūöre nö kiröönngöre.

⁶ Ngaich Yôsuā ök kikōnyö kūön Nön nö havëtö yik kūönṙô, ngaich ngö ṙô tö cha, Keunlöre töm kasòng chöngö, hökngen yip tösat tak kūönṙô nö sātö kum tö römpet nup sinrōl kūön sīṅp nö urēhĕkūö ngam kasòng ngam Mā Tēv.

⁷ Ngaich ngö ṙô cha tö yik tarik, Pöh iṙūöhöröön havī ngam elpanam, hökngen yip tö aṅhāṅvtī tarik nö iṙūöhöröön urēhĕkūö ngam kasòng ngam Mā Tēv.

⁸ Ngaich hē Yôsuā nö keuheūtöṙô nö vë-ekūö yik tarik, yik tösat tak kūönṙô tö sātö kum tö römpet nup sinrōl kūön sīṅp, urēhĕkūö ngam Mā Tēv nö kiröönngöre, ngaich föönyökūö nuk römpet: ngaich ngam kasòng chöngö ngam Mā Tēv nö tömrit cha.

⁹ Ngaich yik töaṅhāṅvtī tarik nö kiröönngöre nö urēhĕkūö yik kūönṙô yik famöö römpet nö tömrit ngam kasòng chöngö inrē yik lā-unôich höng fanööngöre tö römpet yik kūönṙô tö kinröönngöre.

¹⁰ Ngaich Yôsuā nö tölṙô yik tarik, nö ngö ṙô, Hö-ö yin min hū-a, un rēhĕn nö hökiṙen nup ṙô yīö nö hāngö, öt hĕng min ṙô lamöknyö elvāng yīö, hanöng saha öp sakāmö chu tölṙô yīö hū-a; ngaich möl yī-ö min hū-a.

¹¹ Ngaich hōten ngam kasòng ngam Mā Tēv anga-aṅ nö havī ngam elpanam, havīṙö e nö kiröönngöre nö hĕngvan: yih cha-a ngaich nö im elyöngö, ngaich iyöng nö im elyöngö.

¹² Chōholre ngaich Yôsuā nö ka-euilökūö, tö peuheū, ngaich yik kūönṙô nö keunlöre tök kasòng ngam Mā Tēv.

¹³ Tö yik tösat tak kūönṙô inrē tö kumtö nuk tösat römpet nuk sinrōl kūön sīṅp urēhĕkūö ngam kasòng ngam Mā Tēv iṙūöhöröön nö kiröönngöre, föö nuk römpet inrē: urēhĕkūö cha inrē nö kiröönngöre yik tö aṅhāṅvtī tarik; ngaich yik lamā unôich inrē nö tamömrit ngam kasòng ngam Mā Tēv, höng fanööngöre tö römpet yik kūönṙô nö kinröönngöre.

¹⁴ Havī ngam elpanam cha-a nö hĕng van im innëtö sakāmö, havan ngaich nö im elyöngö: tafūöl sumkam cha-a nö ngatī inlahen.

¹⁵ Ngaich angū-ö nö ngö inlahen ik sinātö sakāmö, tö cha nö choholre nö ka-euilökūö tö minlīlö ngam sakāmö ngaich havī ngam elpanam nö sā inlahenre nö sat van: höng ik sakāmö angū-ö cha-a nö havī ngam elpanam nö sat van.

¹⁶ Ngaich ngö inlahen angū-ö im sinatvan, hē yik kūönṙô nö föö nuk römpet, ngaich Yôsuā nö ngö ṙô tö yik tarik, Hū-a yin; tön ngaich an ngam Mā Tēv nö kētö ngam elpanam nö in yī-ö.

¹⁷ Tökētu an min ngam elpanam nö im Mā Tēv, angū-ö, nup ël e inrē nö ṙòkhöre: höng hĕng tak ap min tö-aṅ ang Rāhap ap mī-inyihköre, anga-aṅ tö yip aṅ patī ò inrē nö ṙòkhöre, pòn hayunngö yik ma-ahānga tahīnngö hī.

¹⁸ Ngaich yī-ö inrē ṙūöhöngre tö nup tökētu chehen, hòṅ yīö yē yīö aṅhāṅv in tö tökētu, ngaich yī-ö öt kē nup chehen tökētu; ngaich yī-ö min vīten ngam elyöngö Israĕl nö tötkôlò, ngaich hakihten e.

¹⁹ Ṙòkhöre pöri nup rupīö, humlum, tanīöyö mās, vët inrē töhet anū-ö nö im Mā Tēv: ngaich anū-ö min nö yih nö el chūök chehen ngam Mā Tēv.

²⁰ Lökten yik tarik nö ngaich nö hū-a, föö nuk römpet yih kūönṙô; ngaich ngö inlahen angū-ö, hē yik tarik nö hang ṙô nuk römpet, ngaich hū-a yik tarik nö pōitô, fukngö ngaich ök kinlōngö nö paṙāpkötī, ngaich lökten yik tarik nö kuhēthötre nö el ngam elpanam, kö hachipkūöre më tarik, kē ngam elpanam cha-a ngaich.

²¹ Hatngö tī cha-a ngaich tö nuk taṙòkhöre el ngam elpanam, nö aṅtī tö sanët, hĕnghöre kikōnyö kikānö inrē, hĕnghöre tö-ayal tököiny inrē, kōiny nuā, sīṅp, köttö inrē.

²² Ngaich ngö ṙô Yôsuā tö nak tönët tak tarik nak mahayuntö matre nö ngëchkö ngam panam, Kuṙòh chuh patī ap mī-inyihköre kikānö, kēnyö öp kikānö nö ṙā-ang muh, tö nup chehen ò inrē nö ṙòkhöre, sāṙô nā kilēḵngôre in ò.

²³ Ngaich nak ṙāl tarik nak mahayun tö matre nö kiröönngöre, ngaich kēnyen Rāhap, tök kikōnyö yöng ò, tök kikānö yöng ò, tök kanônyö ò, ṙòkhöre inrē nuk chehen ò ṙòkhöre yik mak alaha ò inrē nö kēnyu nö lā-uk; ngaich cha-a nö hangöhngen cha nö lā-uk ök elyöngö Israĕl.

²⁴ Föngngö ök elpanam ngaich cha-a nö aṅtī tö tameūyö ṙòkhöre nuk aṅ e inrē: höng nuk rupīö, humlum, tö nuk tanīöyö mās vët inrē, chaphötvö anū-ö tö cha nö el chūök chehen el patī ngam Mā Tēv.

²⁵ Rāhap pöri ök mī-inyihköre, tö yik aṅ patī ök yöng ò kikōnyö, tö hayöölöngṙen nö aṅ, tö Yôsuā, ṙòkhöre nuk chehen ò inrē; ngaich iyöng el ṙôngö Israĕl anga-aṅ, söl i ngih sakāmö; pòn hayunngö nak ma-ahāṅnga anga-aṅ, nak tahīntö Yôsuā nö hayuntö matre tö Yerīkō.

²⁶ Ngaich Yôsuā nö kētö chöngö cha töp töchūöku kinlēḵngô hē e, nö ngö ṙô, Tötkôlò ap tarik nö i kūö ngam Mā Tēv, ap chamôhòlre nö vīlö ngih elpanam Yerikō: hē ò min nö ṙātö rööntö kinlonglö e kapah min ap lanòh kūön ò, hē ò min nö asöklö nup inkūp e, kapah ap manāngö kūön ò.

²⁷ In Yôsuā ngaich ngam Mā Tēv; ngaich ök ineūnyö ò nö i nuk panam nö keuheūtngöre chūök.