YÔSUĀ 4 - TÖHET LĪPÖRE (Re-edited) Bible (BSI)Katöplö lhong Nö Inköpkölōn 1 Ngaich ngö inlahen angū-ö, hē ngam pumnāmö tarik nö ṙòkhöre nö hatngö nö ngaich vāngngö tö Yôtön, tö ngam Mā Tēv nö vë-ekūö Yôsuā, nö ngö ṙô, 2 Nët sīön tak kahë man tö aṅ i yip tarik, hĕng tak tarik aṅ i töhĕng miyöngö, 3 Tölṙô cha më-eṅ ngö ṙô, Kē ihong yin nëtsīön ṙā-ang ellōn Yôtön, ip chūök röön më kūönṙô nö köp nö sökhak, tayūkö u kum yīö havāngngöre, ngaich ṙātö u im chūök yīö iyöng, öp chūök yīö min iyöng i ngih hatööm. 4 Ngaich Yôsuā nö havëtö yik tönëtsīön tak tarik yik halēnlö ò aṅ in yik kūön Israĕl, hĕng tak tarik i töhĕng miyöngö: 5 Ngaich ngö ṙô Yôsuā tö cha, urēhĕkūö ngam kasòng chöngö ngam Tēv yīö ngam Mā Tēv, havāngngöre ellōn Yôtön, ngaich kö hēngö kahë yī-ö tö ihong nö tayūkö nö elranôṙö yīö, sā tum miyöngö yip kūön Israĕl. 6 Hòṅ e min nö minkahngö nö in yīö, hòṅ e hē yip kūön yīö môkö nö hatön, nö ngö ṙô, Asuh manah ön në ihong? 7 Ngaich ngö ṙô yī-ö min tö cha, Pò ngam mak Yôtön nö rökngöre nö i kūö ngam kasòng chöngö ngam Mā Tēv; hē ih havāngngö ël Yôtön, röki ngaich ngam mak Yôtön: ngaich në ihong min tö-örheūheu nö inköpkölōn in yip kūön Israĕl. 8 Ngaich yik kūön Israĕl nö teūngen tö tinöölôre tö Yôsuā, ngaich chātlö ihong nëtsīön milôhò nö ṙā-ang ellōn Yôtön, sā ṙô ngam Mā Tēv nö in Yôsuā, sā tum miyöngö yik kūön Israĕl, ngaich tayūkö u cha-a nö kum chā nö havāngngöre ip chūökö chūök cha nö iyöng, ngaich ṙātö u nö umuh. 9 Ngaich Yôsuā nö katöplö nup tönëtsīön ihong nö ellōn Yôtön, i chūök röön yik kūönṙô yik kameun ök kasòng chöngö: sökhak nup nö umuh, i ngih sakāmö. 10 Pò yik kūönṙô yik kameun ök kasòng nö sökhaka nö ellōn Yôtön, hanöng saha kinheūten nuk tinöölô Yôsuā tö ngam Mā Tēv nö vë-ekūö yik tarik, nö sā tinöölô Yôsuā tö Môsös nö ṙòkhöre. Kurāten ngaich yik tarik nö havāngngöre. 11 Ngaich ngö inlahen angū-ö, hē yik tarik nö ngaich nö hatngö nö vāngngö, havāngngöre ngaich ngam kasòng ngam Mā Tēv, tö yik kūönṙô, nö i kūö yik tarik. 12 Ngaich yik kūön Rūpen, tö yik kūön Kāt, ròngti inrē miyöngö Manasē, nö havāngngöre nö aṅhāṅvti nö urĕh tö yik kūön Israĕl, sā ṙô Môsös tö cha: 13 Lohten yik nö fën anāi köny tölēn tö aṅtī re nö i kinyūngö urĕh tö ngam Mā Tēv nö havāngngöre nö im kinyūngö, i nup töṙa-akūö panam Yerikō. 14 Im sakāmö angū-ö ngam Mā Tēv nö hapōilen Yôsuā nö i kūö yik Israĕl; ngaich cha-a nö pa-ekūö tö ò, sā pinhë-eṅkūö cha tö Môsös, i rô-òtö nuk sakāmö ò nö aṅ. 15 Ngaich ngam Mā Tēv nö vë-ekūö Yôsuā, nö ngö ṙô, 16 Tölṙô më kūönṙô më kameun ngam kasòng chöngö, hòṅ cha nö yôklö nö ṙā-ang el Yôtön. 17 Lökten Yôsuā nö tölṙô yik kūönṙô, nö ngö ṙô, Yôklö yin ngaich ṙā-ang el Yôtön. 18 Ngaich angū-ö nö ngö inlahen, hē yik kūönṙô yik kameun ök kasòng chöngö ngam Mā Tēv nö yôklö nö ṙā-ang ellōn Yôtön, ngaich nuk elröön yik kūönṙô nö talöhlöng ngaich i kui ök tönyô tumlat, havantöre ngaich ngam mak taṙēchlöng nö i kui e, sāre tö lā-urĕh. 19 Ik sinömö sakāmö ök raneh chingëṅt më tarik nö yôklö nö ṙā-ang el Yôtön, ngaich iyöng i Kilkāl, lā chuhöt tö kūöngö Yerikō. 20 Ngaich i Kilkāl ang Yôsuā nö katöplö nuk tö nët sīön ihong, nuk kahëlö cha nö ṙā-ang el Yôtön. 21 Ngaich vë-ekūö yik kūön Israĕl anga-aṅ, nö ngö ṙô, Yē yip kūön yīö min nö hatön yip yöngre môkö, nö ngö ṙô, Asuh ap manah në ihong? 22 Ngaich mikahtö lōn yip kūönre yī-ö, öi ngö ṙô, Havāngngö ngih Yôtön yik Israĕl misī nö lökngö el tönyôlö tumlat. 23 Pò ngam Tēv yīö ngam Mā Tēv nö hanyôngö ngam mak Yôtön nö i kūö yīö, hanöng saha yīö ngaich vāngngö, sā tī ngam Tēv yīö ngam Mā Tēv tö ngam Töngāṅv Mai ngam hanyôngö ò nö urēhĕkūö hī hanöng saha ih vāngngö: 24 Hòṅ vē tarik aṅ ngih tumlat nö akahakūö tö kël ngam Mā Tēv, tö e nö tökalēḵ: hòṅ cha nö örheūheu nö pa-ekūö tö ngam Tēv yīö ngam Mā Tēv. |
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
Bible Society of India