YÔSUĀ 16 - TÖHET LĪPÖRE (Re-edited) Bible (BSI)

Kētu Panam Ang Ifrēm Ngaich Lā Sūng Ang Manasē

¹ Ngaich ngam minchöḵö yik kūön Yôsĕf nö kunyī nö löktö kūö Yôtön nö i nuk mak Yerikō lā chuhöt, angū-ö ngam tönyalnyi, ha-ööklöre nö ṙā-ang Yerikō nö lök im rung panam söl Pētĕl;

² Kunyī angū-ö inrē ṙā-ang Pētĕl söl Lus, ngaich lökngö kūöngö yip aṅ Arki söl Ataròt;

³ Ngaich peūtöre angū-ö nö lā sūng nö lök i kūöngö yip aṅ Yaflet, nö kū-ö tö kūöngö Pethòròn öp lātaṙeū nö i Kësör: ngaich öp maneutnyö e nö im mai.

⁴ Kē aminre ngaich yik kūön Yôsĕf, Manāsē, Ifrēm inrē.

Ifrēm

⁵ Ngaich ngö inlahen ngih kūöngö yik kūön Ifrēm i mupīhö cha: ngam kūöngö ök amin cha nö lā chuhöt angū-ö an Ataròtatār, söl Pethòròn lātulöng;

⁶ Meutnyi ngam kūöngö nö löknyö lā sūng i Mikmitat lā kapā; havööngökūöre ngam kūöngö e inrē nö lā chuhöt nö i Tanātsailō, ngaich lökngö in e nö lā chuhöt tö Yanōa.

⁷ Ngaich lökngö Yanō-a angū-ö nö peūtöre nö i Ataròt, Nē-arat inrē, ngaich sölta nö i Yerikō, i Yôtön ngaich nö kunyī.

⁸ Löktökūö Tapuā ngam kūöngö nö lök lā sūng ik kun töhëm mak i Kāna; ngaich im mai ngam löknyö e. Angū-ö an ngih amin ök miyöngö yik kūön Ifrēm sā mupīhö cha;

⁹ Holre tö nuk elpanam nuk töhakösiṙen nö elpanam yik kūön Ifrēm ellōn ök amin yik kūön Manāsē, ṙòkhöre nuk elpanam tö nuk tuhēt u inrē.

¹⁰ Ngaich cha-a nö öt ahōngö yik aṅ Kanā-an yik mī-iyöng Këser: höng iyöng ellōn Ifrēm pöri yik aṅ Kanā-an söl i ngih sakāmö, ngaich pöri cha-a nöng tanölöṙô i nup la-en.