YÔSUĀ 1 - TÖHET LĪPÖRE (Re-edited) Bible (BSI)

Hōtu Yôsuā Tö Ngam Tēv Nö Kē-ě Kanā-an

¹ Ngaich angū-ö nö ngö inlahen unôichrit kinpaha Môsös ök tarik ngam Mā Tēv, tö ngam Mā Tēv nö vë-ekūö Yôsuā ök kikōnyö kūön Nön mameukṙen Môsös, nö ngö ṙô,

² Kapah ök tarik chu Môsös, yĕh lökten choholre, kuṙòh havāngngöre tö ngih Yôtön, më-eṅ ṙòkhöre inrē vē tarik, im panam kahëtö chu in cha, in më kūön Israĕl.

³ Keuheūtlöre nup töng röönka ël min tö el röön meh, in meh nö kētu tö chu, sā ṙô chu in Môsös.

⁴ Löktökūö el tönyalnyi, tö ngih inrē Lepanön söl im tökiröng tahël, ngam tahël Yufratīs, ṙòkhöre panam Hitāit, söl im Tökirön Mai inrē i löktö ngam tavūöi, angū-ö min kūöngö meh.

⁵ Öt hĕngtak min tarik tökô nö sökhak nö i kūö meh i rô-òtö sakāmö meh aṅ: sā chu misī in Môsös, ngatī chū-ö min in meh: öt hō chin min öt teung in meh, öt rēhĕn ṙāngen, meh.

⁶ Ngëtöhëich hangë alahare inrē: tön vīten vē tarik man nö amin tö ngam panam, ngam kinlēḵngô chu i yik muvöhngö cha nö tö kētu nö in cha.

⁷ Höng hangëḵeṅre më-eṅ um pa-ekūö inrē, haköpkö ngam chöngö la-evṙen asā-a e nö ṙòkhöre ngam tinöölô meh tö Môsös ök tarik chu: um havööngö kūöre tö e lahāmö hēk la tavē, hòṅ meh teunglen ip töng kū-ö meh kirööngöre.

⁸ Un ṙā-ang elvāng meh min ngih līpöre ngam chöngö nö kiröönngöre, peuheū harap pöri më-eṅ asīn nup i mat e hòṅ meh la-evṙen haköpkö nup tökūichö nö i mat e: kôlò ap min talöökö meh yē meh ngatī, ngaich më-eṅ min teunglen

⁹ Röh öich chū-ö tamölrô meh? Ngëtöhëich hangë alahare inrē; un pa-ekūö, un rēhĕn ngāng alaha: tön in meh an ngam Tēv ngam Mā Tēv meh ip töng kū-ö meh kiröönngöre.

Kētö Chöngö Re Yôsuā Nö In Yik Tarik

¹⁰ Ngaich Yôsuā nö tölṙô yik yöngṙen kumyung in yik tarik, nö ngö ṙô,

¹¹ Kiröönngöre man lök ellōn ngam elyöngö, tölṙô yip tarik, ngö ṙô, Halēn nyā-aṅkūö yin; tön i ël tölūöi sumkam yin havāngngöre tö ngih Yôtön, öi kiröönngöre kē ngih panam nö a min yīö ngam kahëtö ngam Tēv yīö ngam Mā Tēv nö amin yīö.

¹² In yip Rūpön, in yip Kāt, in yip töròngti miyöngö Mānasē inrē, ang Yôsuā nö ngö ṙô nö, vë-ekūö cha,

¹³ Köpölōn tö ngam ṙô ngam tinöölô yīö tö Môsös ök tarik ngam Mā Tēv, nö ngö ṙô, Kētö haneūheu yīö an ngam Tēv yīö ngam Mā Tēv, kē-ĕkūö yīö min inrē tö ngih panam.

¹⁴ Höngngöh min yip pīhö yī-ö, yip kūön, yīö, nup nuā yīö, nö im panam lamuh tö Yôtön ngam kahëtö Môsös nö in yīö; havāngngöre pöri min yī-ö öi aṅhāṅvtī urēhĕkūö yip holre, ṙòkhöre yip tökalēḵ tarik yip töt pinhë-eṅvkūö, ngaich holṙen cha min:

¹⁵ Hanöng saha tī ngam Mā Tēv nö kētö haneūheu hol yīö, sa tī ò nö ngaich nö in yīö, ngaich cha-a inrē nö kē ngam panam aminre ngam kahëtö ngam Tēv yīö ngam amin yīö, ngaich hayōmö e, ngam kahëtö Môsös nö in yīö ök tarik ngam Mā Tēv lamuh tö Yôtön lā löklö ngam tavūöi.

¹⁶ Sap ṙô Yôsuā cha-a ngaich, nö ngö ṙô, La-evṙen in min tö nup tinöölô ih tö meh nö ṙòkhöre, kiröönngöre in min inrē ip töng kū-ö tī meh tīnngen ih.

¹⁷ Sā ih misī hang ṙô Môsös i tökeuheūttöre ngatī min īhö hang ṙô meh: höng in meh an yēḵ ngam Tēv meh ngam Mā Tēv, sā ò misī nö in Môsös.

¹⁸ Öp töng ma-ahôngen chöngö meh min, öt hang nup ṙô meh inrē öm tölṙô ò, kumpaha min anga-aṅ: höng ngë töhëch hangë alahare inrē.