YERIMIĀ 4 - TÖHET LĪPÖRE (Re-edited) Bible (BSI)

Havëtu Im Invöötö Ellōn

¹ Ō Israel, yē meh havan, ṙô ngam Mā Tēv hòṅ in chu man havantöre. Yē meh kēngö nup sin-òkkūö nö ṙā-ang i kūö chu, öm uh katöngaṙen,

² Yē meh inrē chūökuṙô, sā ngam Mā Tēv nö tö-aṅ, im kanô-en, im öt michūṙen kinṙôka im töchiplen inrē, ngaich yip pumnāmö tarik min nö hakôlòre nö in ò, in ò cha-a min inrē nö eū-eure.

³ Pòn ngö ṙô ngam Mā Tēv tö yip tarik Yūtā tö yip aṅ Yērusalem inrē; Liruklö nup tumlat re man töt ūlö, um teūich öm ël töchökhu kaha.

⁴ Tunyiny ngöre man im Mā Tēv, kēngö öp laneūichlökūö nö ṙā-ang ellōn meh, Ō me-eṅ tarik Yūtā aṅ Yērusalem inrē; hòṅ ngam lanīnö chu nö öt sā tameūyö nö hūlökūö, ngaich öktikūö min ngaich nöng öt mahanyangngukūö, tökūö nup tötlöök la-en yīö.

Havööka Yūtā Tö Kinë-eṅ Ngam Panam

⁵ Vë-ëny e in Yūtā, ahangkö e i Yērusalem, ngö ṙô, Föönyö kūö ap römpĕt keuheūt im panam; pōitô hū-a ngö ṙô, Hamūlöre, tā-a töi chuh i nup elpanam tökalonglöng tö chūök kumyung!

⁶ Kū-ötö Sīyôn tī asöklö ap pantēra, un höng ngöh, tön kētö tötlöök chin ṙā-ang lā kapā, tökiröng inrē tinṙōlhanga.

⁷ Ngaich ök lāyön nö ṙā-ang ip chūök re töyul, ngaich an nö kiröönngöre ngam famëlngö pumnāmö tarik; ngaich an nö ṙāngö ngam chūök re nö vīten ngam panam yīö nö töt-aṅhavkūö; taṙōli nup min elpanam yīö nö öt aṅ-havkūö.

⁸ Kūö e lökten öm hayutlöre tö sāk, harāmöre kihīökkūö, kalēḵ tanānyö ngam Mā Tēv nö öt havanritre nö ṙā-ang in hī

⁹ Ip sakāmö angū-ö ṙô ngam Mā Tēv, öt kalēḵngöre min rācha tö kūön rācha inrē: pa-ekūö min yip kūönṙô pingangkūö yip pròfĕt inrē.

¹⁰ Ngaich ngö ṙô chū-ö, Aōla, Mā Tēv yahlötī man hachīl vē tarikre, Yērusalem inrē, öm ngö ṙô, Löök an min nö in meh; ngaich ngam sanët nö sölhötkūö nö i nômö cha.

¹¹ Ip hē angū-ö min öp ṙô min lamöö in vē tarik i Yērusalem inrē, tö ngö, Töṙāch öp kuföt löktö kui minë töngāṅsö kui rung im kuyāyö, tönyalnyi nö kū-ötö ip kikānö kūön yip tarik chu, rö-ö nö pintōngngö ṙòng sāiny hēk öt inhetlö,

¹² Kuföt töyahlö kumlēḵ yih nö in chu. Chū-ö chin töngamuh töṙô-òv tö ngam inkaha fālen i kui cha.

Havīlöngö Yūtā Tö Yik Lā-al Re

¹³ Yēh meuk, yih an sā taṙul, sā lamfeui kuföt nup inröl ò; veut nup kōra ò tö matēṙö, Aōla ayī-ö, pò hī ngaich lëlngö!

¹⁴ Ō Yērusalem, söichngö ap tötlöök man ṙā-ang ellōn re hòṅ meh hayöökaṙen. Irô-òten nup min tötlöök nö iyönghötvö nö in meh?

¹⁵ Pòn löknyö Tën ap ṙô nö vënyu ahangka inrē tötlöök nö löktökui rung Ifrēm.

¹⁶ Hatūitö elnang pumnāmö tö Ò nö yih; ahangnyö e i Yērusalem, ṙeū-eung tömaṙôvat yip panam kamyīng; hū-a yip nö lā-al nup elpanam Yūtā.

¹⁷ Sā amah tö panô-òṅ yip havīlen ò nö lā-al ò, pò ò nö lā-al chu nö ahôngen chu, ṙô ngam Mā Tēv.

¹⁸ Nup talöökö meh tö nup la-en meh kamëtö ngih nö i kui meh. Fuk ël e man ngaich, angū-ö-vö an inrē sölhöt an nö ngaich nö ip Fanöinylö meh takô.

Haṙivlōn Yeremīa Tö Yik Tarik Re

¹⁹ Chanökö chu, tö miṙivlōn, chanökö chu tö miṙivlōn! Chuvālöre chin i chanököre! Kamôḵyö, veūtö tinrūkö an ngam fanöinylö nö el ranūmö chu! Ötkô chin ṙāngôre; pò chu hang ṙô öp römpet pinnëlökūö töp kinyūngö.

²⁰ Öt kanôlò tömrit öt kanôlò nöng röpta, keuheūtngöre an ngam panam nö halëli höng lūk nup inrūkui chu nö piyāyi nup ranangkūö chu inrē nöng öt rô-òtuṙen.

²¹ I rò-òtö mat öich min meuk ngam pantēra, hang ṙô öp römpĕt inrē?

²² Pò vē tarik chu nö kulō-ovö, hö-ö yin nö akahakūö tö chu; tötkaha yin nö nyīö, hö-ö yin nö īnu tö mikah elmat. Milichngen yin nö vī tötlöök, hö-ö pöri cha-a nö akahakūö tötīre nö vī tölöök.

Meuk Öp Yamih Kanihngen Ang Yeremīa

²³ Ngëichtökui ngam tumlat chin, ngaich meuk, tö e nö hatngö nö öt aṅhavkūö; ngëichkö minë halīöngö inrē, öt eāṅvu anū-ö inrē.

²⁴ Ngëichtökui minë rôngö chin ngaich meuk tö u nö kalöka, ṙòkhöre inrē minë rung nö havötköre chūök.

²⁵ Ngëicha chin ngaich meuk, öt hĕng tak tarik umuh, keuheūtngöre nuk chehechōn el kuföt nö kiteūngöre.

²⁶ Ngëicha chin, ngaich meuk ngam töṙônguvö panam nö kuyāyö el tönyalnyi, ṙòkhöre inrē nup elpanam nö piṙāpi nö tiṙöli i kūö ngam Mā Tēv, i kūö öp tökiröng tanānyö ò.

²⁷ Pòn ngö ṙô ngam Mā Tēv, Keuheūtngöre an ngam panam min nö öt aṅhavkūö; hö-ö pöri min chū-ö ahatngen e takô.

²⁸ Kūö e min ngih tumlat nö haṙivlōn sah inrē min minë halīöngö latulöng; pò chu ngaich ṙô-òvö chööḵnyuvö chin hö-ö chin ṙā-ang lōnre öt rēhĕn min havanritre.

²⁹ I ṙënṙô öp aṅ uk kōra tarik lumreny inrē kö pāngö min elpanam; meuthöt cha-a min nö eltöyul yônlö cha-a min i nup tökiröng ihong ṙòkhöre nup elpanam nö ṙā-ayö, öt tarīku inrē mi-īyöng ël u.

³⁰ Ō Me-eṅ töt aṅhavkūö, me-eṅ inrē, asuh ap lōn meh öm hayūtöre tö lāturë, öm hanyöṅtöre inrē tö humlum yanöṅtö, tö meh inrē ṙūönyö ṙôkö mat re tö sanunmat? Nyātölōn man havāyöre. Ahūöngen meh yip töhāngenlōn tö meh; chöh nômö meh yip.

³¹ Pò chu hang ṙô öp kikānö nö halöinyöre nö kayôḵ, nö sā chanökö kamyônyö öp lanòh kūön re, töhāngö ṙô öp kikānö kūö Sīyôn nö kisakngö umhômöre, nö hateutnyökëlre, Aōla chū-ö! Chaṙīvi chin ngaich i kūö famël tarik.