YERIMIĀ 3 - TÖHET LĪPÖRE (Re-edited) Bible (BSI)

Töt Ṙinātö Ellōn Israel

¹ Yē ngòh tarik nö mayūngö pīhöre ngaich kiröönngöre ngam kikānö nö ṙā-ang in ò, ngaich kētöre nö pīhö ngam tahëng kikōnyö, hō ang ngam kikōnyö nö havantöre nö in ò? Röh öng ngam panam nö pōihangṙen min nö chōich? Ngaich man me-eṅ sā mī-inyihköre kikānö ṙōl tak hanāngenlōn; ngaich hòṅ havan hòng in chu, ṙô ngam Mā Tēv.

² Môklökūöre man im töngāsö kui rung, ngëicha! Isuh ap töt chūök meh ṙōlhaka? I taseū talöökö man yih ūichhaka hökkö öp hanāngenlōn re sā öp Arap nö el inchōn tönyalnyi. Chōichö tī man ngaich tö ngam panam tökūö meh inyihköre.

³ Lökten an ngam kumṙah nö öt chahūköti, ngam kumṙah kūö-arūṙö inrē nö öt yih; sönen me-eṅ māl tö māl mī-inyihköre kikānö, sō me-eṅ öm sirōngkūö.

⁴ Röh öm möl töngamuh havëken chu, Kayöngö hol chu man ik nyinī-öṅ chu,

⁵ Örheūheu ang min nö līn, söl ip manā-aṅ min nö tainy? Yĕh meuk, ṙô-òv man ngaich, ngaich pöri öm keuheūten tö nup kanô-òṅ meh tötlöök.

Havöötö Ellōn Re Min Israel Nāṅ Yūtā

⁶ Hēk inrē ngam Mā Tēv nö ngö ṙô tö chu i nup sakāmö öp rācha Yōsayā: Hö-ö öm me-eṅ meuk tī ò, ang Israel, ngam töt kô-en tö inlahen ò nö peūlöre nö i kui rung el katòh tö-ayālö rōi chōn inrē, umuh inrē nö nyamhötô sā mī-inyihköre kikānö?

⁷ Ngaich ngö lōn chū-ö, Havantöre an min nö in chu i kinheūten ò tö në; hö-ö pöri anga-aṅ nö havan, meūkö e öp tö minyôiny-aṅ kanānö ò ang Yūtā.

⁸ Meūkö e anga-aṅ pò yik ma-asĕhkö ngam töt kô-en, Israel, tīnngörit ò chū-ö ngaich nö kumtö chöngö minyūngö ò; sönngenre nö öt pa-ekūö ngam tö minyôiy-aṅ kanānö ò, Yūtā, kiröönngöre pöri anga-aṅ nö i nyihköre

⁹ Pòn töng höhövṙen ngam innyihköre nö in ò, chōichö tī an nö ngaich töng panam, nö asĕhkö ihong chōn inrē.

¹⁰ Pòrô pöri anū-ö në, sönngenre Yūtā ngam töminyôiny-aṅ kanānö ò nö öt havantöre nö in chu nö keuheūttö ellōn re, höng hanyatkö elmat pöri, ṙô ngam Mā Tēv.

¹¹ Ngaich ngö ṙô ngam Mā Tēv tö chu, Hameuktöre an ngam töt kô-en Israel nö kūöṅnlö fālen tö ngam töminyôny Yūtā.

¹² Kuṙòh ahangkö në ṙô kū-ötö lā kapā, ngö ṙô, Töt kô-en Israel, havantöre, ṙô ngam Mā Tēv. Hö-ö chin min ngëchken meh i lanīnöre, pò chu tö-aṙē-ĕlōn, ṙô ngam Mā Tēv; rö-ö chin min hō örheūheu līn.

¹³ Höng akahngenre pöri me-eṅ fāluṙen öm ahôngen ngam Mā Tēv ngam Tēv meh, ngaich pirātngö nuk lōn re i tahëng el katòh tö-ayālö rōi chōn, tö meh inrē öt hang ṙô chu, ṙô ngam Ma Tēv.

¹⁴ Havantöre yin, Ō yī-ö nyīö tötkô-en, ṙô ngam Mā Tēv; tön chū-ö chin yöngṙen yīö; kē-ĕ yīö chin min, hĕng tak i töhĕng elpanam nët tak inrē i töhĕng mupīhö, ngaich kēten yīö chū-ö min i Sīyôn.

¹⁵ Kē-ĕkūö yīö chin min inrē tö yip yōm pököre sā öp ellōn chu, yip maha-āṅlen yīö min tö mikah, mikah elmat inrē.

¹⁶ Ngaich yē yīö ṙūölöre ṙôngö sīöplöre ṙôken inrē im panam, i nup sakāmö anū-ö, ṙô ngam Mā Tēv, öt ngöhöre ṙô min cha-a nö ngö, Ngam kasòng kinlēḵngô ngam Mā Tēv. Öt yihtöre min angū-ö nö ellōn, hēk öt fēkaṙen, hēk öt ulòhngen; öt hēk min angū-ö nö vī-i.

¹⁷ Ip hē e min Yērusalem nö havëka nö kantēra ngam Mā Tēv, ngaich ṙòkhöre min pumnāmö tarik nö hamūlöre nö in e, i kūö ngam Mā Tēv i Yērusalem, ngaich cha-a min nö öt ngöhören nö kalēḵ nö tömrit tötlöök lōn re.

¹⁸ I nup sakāmö anū-ö min öp patī Yūtā nö hamūltöre nö ip patī Israel, ngaich anū-ö nyöre min nö yih nö löktö im panam lā kapā nö im panam kahëtö chu in yik muvöhngö yīö nö amin yīö.

Vinë-ekūö Insātēv Tö Tarik

¹⁹ Ngö lōn chū-ö, yik chin hòṅ hamūlten yīö in yip kūön re kikōnyö, öich kē-ĕkūö yīö tö tölöök panam, amin nö tölngö tövai in vē pumnāmö tarik nö ṙòkhöre, Yöng chu, ngö ṙô min me-eṅ öre havëken chu, ngaich uh öre öm havööngökūöre ṙā-ang i tinömrit chu.

²⁰ Kô-en man, sā öp töt kô-en kikānö töpīhöv nö ṙāngö öp pīhöre, ngatī me-eṅ ngaich öt kô-en in cha, Ō aṅ patī Israel ṙô ngam Mā Tēv.

²¹ Hāngö ap ṙô i kui minë tö ngasngö kui rung, pineūnyö invë-a inrē tö yip kikōnyö kūön Israel pò cha nö ngaich nö hachōichngö talöököre, ngaich yip nö vaichngö ngam Mā Tēv ngam Tēv cha.

²² Havantöre yin, Ō yī-ö nyīö kikōnnyö tötkô-en, hòṅ chu halanken ap öt kanô-en yīö. Yĕh meuk, yih in öi in meh; pò meh öm me-eṅ Mā Tēv, Tēv ih.

²³ Kô-en nun mine rung nö inlō-ongkūö, minë rôngö inrē nö chūök vine-eṅkūö insā tēv. Kô-en ap inyööken Israel nö im Mā Tēv ngam Tēv hī.

²⁴ Löktökūö inyālö hī pöri ngam sumrōngkūö nö keuheūtökūö tö nuk vahīten yik muvöhngö hī nup pököre cha nuk sīṅp cha inrē, yik kikōnyö kūön cha tö yik kikānö kūön cha inrē

²⁵ Tā-a töi ṙōlngöre i sumrōngkūöre, hökngen ngam minṙēngökūöre, hökngen ngam minṙēngö hī nö hanyatngen hī; tön ngaich in köölö fālen im Mā Tēv ngam Tēv hī, ayī-ö tö yik muvöhngö hī, löktökūö nyinī-öṅ hī söl ing töngamuh; hö-ö in hang ṙô ngam Mā Tēv ngam Tēv hī.