YERIMIĀ 2 - TÖHET LĪPÖRE (Re-edited) Bible (BSI)

Hakumken Israel Ngam Tēv

¹ Ngaich yih ngam ṙô ngam Mā Tēv nö in chu, nö ngö,

² Kuṙòh, ahangtö hāngö Yerusalem, Ngö ṙô an ngam Mā Tēv, köpölōn chin tö kanô-en hanāngen meh tö sā tö hapīhö, tö inlahen meh tömkörit chu el inchōn tönyalnyi, ip panam töt teūichtu aṅkūö.

³ Töhet an Israel nö im Mā Tēv, lanòhlòng nup hamūl ṙòng ò. Ṙòkhöre yip nyamā-aṅ e nö töfāluṙen; teunghukui yip min tö tötlöök, ṙô ngam Mā Tēv.

Tökööl Yik Muvöhngö Israel

⁴ Hangihtöre tö ṙô ngam Mā Tēv, Ō patī Yāköp, ṙòkhöre inrē mupīhö aṅ patī Israel.

⁵ Ngö ṙô an ngam Mā Tēv: Asuh ap kanôtökūö yik muvöhngö yīö tövaich in chu töp lökten cha nö marô-òl-kūö nö kiröönngöre nö ṙāngen chu, ngaich tömrit töt kanôluṙô, ngaich vītöre nö töt kanôluṙô?

⁶ Hö-ö cha-a nö ngö ṙô Isuh ap Mā Tēv öp kamënyen ih ṙā-ang panam Aikup, öp mahachō-o ih el inchōn tönyalnyi, ip panam tönyalnyi kuyāyö tö-anūlu inrē ip panam tönyô tökufëi sinngūlö inrē, ip panam töhĕng tak lamök i chūök törö-ö tarik nö iyöng?

⁷ Ngaich kēten yīö chū-ö i tökôlò panam öi kumchikngenre tö nup ṙòng chōn tölöök chehen e inrē in e. Chalô hë pöri me-eṅ in e ngaich hachōichngö ngam panam chu, ngaich vītö ngam amin chu nö sin-òkkūö.

⁸ Hö-ö yip kūönṙô nö ngö ṙô Isuh ap Mā Tēv? Yip mahayōm ngam chöngö öt akahakūö tö chu; köölö fālen yip mahayöng nö in chu; lökten i Pē-al ṙô yip profĕt nö ve-eny tömeūkö; ngaich tömrit nup töt kanôluṙô.

Lā-al Kūö Më Tarik Re Ngam Tēv

⁹ Lökten chin ṙòngmö lā-alkūö meh, ṙô ngam Mā Tēv, lā-al-kūö yip kūön yip kūön meh inrē.

¹⁰ Havāngngöre in minë kun panam Kūpös ngëicha inrē, hēk tīnhang i Kētar milētṙen mikahtö elmat re; ngëicha yĕn töngatī-ivö nö ngaich.

¹¹ Haṙīkö tēv re aich ṙung vē pumnāmö tarik, nö pòrô anū-ö nö öt tēv? Ngaich pöri vē tarik chu nö haṙīngö lanöököre nö im töt kanôluṙô.

¹² Ō yī-ö halīöngö, pingangkūö yin yēḵ tö e, rötngö ṙāi yin yēḵ, hatngö yin yēḵ keuheūtngöre, ṙô ngam Mā Tēv,

¹³ Pòn nët nup tötlöök kahëken vē tarik chu: ṙāngenchu yin nö ngaich, öich löklö tö-aṅ mak, ngaich hulhöt chūök makre, tölakuk chūök, tötkônö köpö aṅ tömak.

Ṙòng Ngam Töt Hināngö Chöngö Tö Yik Israel

¹⁴ Töhakövö ang Israel? Mī-i patī finötnyi ang nö tarik alaha? Kūö yòh ang nö vītöre nö pôḵ holre?

¹⁵ Siṙöpan nup lāyön, pōitô nup nö siṙöp. Vīten ngam panam ò nup nö öt aṅ-haṅvkūö; taṙöli nup ĕlpanam Ò, höng öt-aṅhavkūö.

¹⁶ Hēk inrē, yip tarik aṅ Memfis aṅ Tāpenhes inrē nö likuknyö kui meh.

¹⁷ Röh öm me-eṅ kamëtö kuire tö e kūö ṙināngö ngam Mā Tēv ngam Tēv meh, Hē ò nö hachōkūö meh el ngam talöökö.

¹⁸ Asuh ap töngamuh taneūngen meh i chinūhuh Aikup, inôkö mak nup Na-īl? Hēk asuh ap taneūngen meh i chinūhuh Asīriā inôkö up mak Yūfrātīs?

¹⁹ Chöken man min tö ngam öt lanöököre, vëka man min tö ngam ṙināngö ṙinātö ellōn. Akahalōn man yĕh tö e nö tötlöök tö-angūṅövö inrē nö in meh ngam ṙināngö ngam Mā Tēv ngam Tēv meh;

Öthòṅ Vë-ekūötēv Yik Israel

²⁰ Pò meh ngaich marô-angen likölngö ngam kaneunre litòkngö nyanëkngöre inrē; ngaich ngö ṙô me-eṅ, Hö-ö chin hòṅ lök la-en meh. Hôṅ, i kui rung man tö-marô-òlkui el katòh tö-ayālö rōi chōn inrē öm sōn-ngöre sā mī-inyihköre kikānö.

²¹ Töteūichtuvö pöri tö chu öm vāin tö-atöllöng öm aṅ i tölöök kulöl. Sitih ömeh vīngöre ötkôngöre ṙô ngaich vīngöre öm vāin aṅ el inchōn?

²² Pòrô me-eṅ itölngöre söichöre tö tisum, savòng inrē sön öp pinṙôkö öp fālen meh nöng i kūö chu, ṙô ngam Mā Tēv.

²³ Sitih kanô-òṅ öi ngö ṙô, Hö-ö chin chōich, hö-ö chin tömrit Pē-al? Ngëichkö talöököre man el ngam achāṙö; öm akahalōn tök töngaich la-en re, töveut man öm kūön ūṅt öm lök el ngam talöököre;

²⁴ Tö-ulòhten öm köttö el inchōn tönyalyi, el ngam töṙāch ël e inrē nö hangòskö ngam kuföt! Achiāp tökô nö tahngölōn ò? Öt hĕng tak mahacheiköre tö yip chamöhan; kôtökūö yip min ip hē öp chingëṅt ò.

²⁵ Uh man kiröönngöre öt kunröpu lak ngam likööpre inrē tö inṙëhe nômö. Ngö ṙô pöri yī-ö, Chök alaha aṅ, pò chu ngaich hāngenlōn tö aṅ tahëng, ngaich tömrit cha chū-ö min.

Töhòṅ Chöken Min Israel

²⁶ Sā ngam mu-ulāya nö sirōngkūö yē ò nö kôti, ngatī min ngam patī Israel nö sirōngkūö; cha-a, yip rācha cha, in cha, kūön rācha in cha, yip kūönṙô in cha, yip pròfĕt in cha inrē,

²⁷ Yip tö ngö ṙô tö chōn, Me-eṅ man yöng chu kikōnyö, tö ngö ṙô inrē tö ihong, Me-eṅ man kamyôḵnyen chu. Pò cha nö ngaich nö hapungtö uk re tö chu, öt havöötökūöre cha-a. Ngö ṙô pöri cha-a hē ël kanihngen cha, chōholre hayööken ih!

²⁸ Isuh pöri nup tēv yīö nup vahī kanahngen yīö? Höklen u yēḵ nö choholre, yē u nö kô nö hayööken yīö, hē el kanihngen yīö; Ō Yūtā, pòn iṙôken nup elpanam yīö, tēv yīö anū-ö.

²⁹ Kūöyòh öi vë-eny kanihngenre in chu? Tö yīö ṙòkhöre ahôngen chu, ṙô ngam Mā Tēv.

³⁰ Chök alaha tī chin chökṙen yip kūön yīö, hö-ö cha-a nö kēḵ chinökṙenre; keuheūtngöre yik pròfĕt tökūö sanët yīö sā ngòh lāyön töyal.

³¹ Ō yī-ö tumköl chap, hang ṙô ngam Mā Tēv. El inchōn öichu tönyalnyi in Israel, hēk öichu tönyalnyi in Israel, hēk panam öichu öich tökufëyö sinngūlö? Kūöyòh ṙöng aich vē tarik chu nö ngö ṙô, Öt töhakövö in īhö, hö-ö in hòṅ hēka yihtöre in meh?

³² Kô-òren ang ngòh rēlö nö vaichngö yanöṅtöre, hēk ngam töpīhöv kikōnyö nö vaichngö hilā re, sönngenre vē tarik chu nö vaichngen chu nö öt kanṙeūken tum sumkam.

³³ Yöng chanīpö kū-ö meh lukkö töhāngenlōn ngaich uroh haköp tö tötlöök talöököre I tötlöök kikānö.

³⁴ I mat kinhôi meh inrē nö kôti ngam mahām nômö tötfāluṙen yāich; öt kôtökūö me-eṅ tö cha nö tilunghötre. Pòrô pöri anū-ö në nö ngatī

³⁵ Ngaich ngö ṙô me-eṅ, Hö-ö chin chū-ö fāluṙen; ngaich öp lanīnö ò nö havööngökūöre tö chu. Yĕh meuk, kēten meh chin i inkaha fālen, pò meh ngö ṙô, Hö-ö chin köölö fālen.

³⁶ Yöng minhôiṅyö meh öm havötköre haṙīkö talöököre sumrōngikūö man min tö Aikup sā meh ngaich sumrōngikūö tö Asīriā.

³⁷ Ṙā-ang in e man min inrē kiröönngöre öm holtö nup eltī re nö elkui meh, pò ngam Mā Tēv nö sōḵen cha yip chūök meh hayönglenre, hö-ö man min inrē kanôluṙô lā-in chu.