YERIMIĀ 1 - TÖHET LĪPÖRE (Re-edited) Bible (BSI)

Yeremīa

¹ Në ṙô Yarimiā, ök kikōnyö kūön Hilkia, yik kūöṙô mi-i-yöng Anatòt i panam Penyamin.

² Yik lööṙö ngam ṙô ngam Mā Tēv nö yih i nup sakāmö Yōsayā ök kikōnyö kūön Amön, rācha aṅ Yūtā, ik linūöi sīön samyeūheu ò nö hayöng.

³ Yih angū-ö inrē i nuk sakāmö Yēhōyakim ök kikōnyö kūön Yōsayā, rācha aṅ Yūtā, söl i kiheūtö ök kinhōk sīön samyeūheu Sētikayā, ök kikōnyö kūön Yōsayā, rācha aṅ Yūtā, söl i kinë-eṅ Yērusalem nö hakövö im tinneūyö chingëṅt.

Invëkö Yeremīa

⁴ Yih ngam ṙô ngam Mā Tēv nö in chu nö ngö,

⁵ Akahakūö chin tö meh urēhĕkūö ti chu vī-i meh el chūök kanūönö, urēhĕkūö finötnyö meh chū-ö inrē ahetlen meh; vīlen meh chū-ö ngaich pròfĕt vē pumnāmö tarik.

⁶ Ngaich ngö ṙô chū-ö, Mah, Mā Tēv! Yĕh meuk, hö-ö chin huveū-euṙô ṙô-òv, pò chu höng ṙālö tarik.

⁷ Ngö ṙô pöri ngam Mā Tēv tö chu, Uh man ngö ṙô, Höng ṙālö chin tarik; hòṅ kiröönngöre man in yip chūök tinīnngömeh tö chu, ngaich ṙô-òv min me-eṅ tö öp töng tinölô meh tö chu.

⁸ Uh man pa-ekūö tö cha, tön in meh chin öich ṙānyen meh, ṙô ngam Mā Tēv.

⁹ Hateutnyö kël re ngaich ngam Mā Tēv ngaich lūölkö elvang chu; ngö ṙô ngaich ngam Mā Tēv tö chu, Yĕh meuk, ngaich chin chaphöt në ṙô re, el vāng meh.

¹⁰ Yĕh meuk, i ngih sakāmö chin ngaich vīten meh i kui pumnāmö tarik pūlngö inrē, öm tameuklö, lumkölhang inrē, pumyāihang kamvalhang inrē, mamānlö, tameūch inrē.

¹¹ Yih inrē ngam ṙô ngam Tēv nö in chu, nö ngö,Yarimiā asuh öp maheuk meh? Ngaich ngö ṙô chū-ö, Meuk öp tinkung chin almön chōn.

Nët Nuk Tömeūkö.

¹² Ngaich ngö ṙô ngam Mā Tēv tö chu, Huveū-eu mat man, pò chu aṅten ngam ṙô re öich hateungngö e.

¹³ Ngaich im in nët heuh ngam ṙô ngam Mā Tēv nö yih nö in chu, nö ngö, Asuh ap maheuk meh? Ngaich ngö ṙô chu-ö, Meuk tinlī mak chin tanīöyö, nö marôvat kū-ötö ngam lā kapā.

¹⁴ Ngaich ngö ṙô ngam Mā Tēv tö chu, Löktö lā kapā öp min tötlöök tö salòklöng nö i kui vē aṅ ngih panam.

¹⁵ Yĕh meuk, tö chu havëkö vē miyöngö në pūlngö aṅ lā kapā, ṙô ngam Mā Tēv; ngaich cha-a min nö yih ngaich kö ṙātö kantēra re nö i nup inkūp lökhöt i Yērūsalem, nö vinngö nö havīlö minë kinlōngö e, nö lā-al nup elpanam Yūtā inrē.

¹⁶ Ngaich chū-ö min kaknyöre lā-al cha i nup inkaha fālen, kūö nup tökööl cha nö ṙāngen chu; föng tötahūsa yin nö ngaich nö i tahëng tēv, afukngöre inrē nö vë-ekūö nup vahī kuntī cha.

¹⁷ Nyëk ṙāt re pöri yī-ö; chōholre ngö ṙô tö cha keuheutnyöre ṙô tö nup tinölô yīö tö chu. Ui pöö-öng kūö tö cha, hòṅ chu öt pinhëṅtökūö yīö i kūö cha.

¹⁸ Yĕh meuk, vīlen meh chin töngamuh chūök kumyung elpanam, vët machööḵlö, mās kinlōngö, lā-al töhĕng pumnāmö, lā-al ip rācha aṅ Yūtā, lā-al ip kūön rācha e, lā-al yip kūönṙô e, lā-al yip tarik ngam panam inrē.

¹⁹ Lā-al meh yip min nö kiyung; öt kô pöri min cha-a nö lā-al meh, pò chu in meh, öich ṙānyen meh, ṙô ngam Mā Tēv.