YĀKÖP 4 - TÖHET LĪPÖRE (Re-edited) Bible (BSI)

Hanôltöre Ing Panam

¹ Ṙeū-eungyih ön në kinyūngö, ṙeū-eungyih inrē në kinlöönö, nö in yīö? Röh ön nö lökten i ngih ihih, ngam kunchikngenre tö yīö, ngam kumyung nö i minë tūmö alaha yīö?

² Yik yin yih, ngaich rö-ö öi aṅhaṅv-in: fëlhanga yin, yikhang yin, ngaich rö-ö kô teūngen: kilöön yin kiyung inrē; öt aṅhaṅv-in yin, pò yīö öt havë-a.

³ Havë-a yin, ngaich rö-ö teūngen pò yīö vāchô havë-a, pò yīö höng hòṅ mëichhanga i nup kunchikngen tö yīö.

⁴ Yī-ö ma-asĕhha, öt akahalōn öyih; tö ngam innôlö aṅ ing panam nö lā-al kūö ngam Tēv? Lökten ngòh töng mahanôl ngih panam vi-ire anga-aṅ nö lā-alkūö ngam Tēv.

⁵ Chök alahaṙô öng ngam Töhet Līpöre tö lōn yīö? Röh öp ma-alaha in hī, ap vahī-il Ò nöng lōntö kumnyahṙen?

⁶ Pōyen tī pöri Anga-aṅ tö inlōnti. Lökten ngam töhet līpöre nö ngö ṙô, Harāinyngö tömikeū an ngam Tēv, kētö inlōnti pöri nö i yāich.

⁷ Lökten tumṙeūtöre tö ngam Tēv; harāinyngö ngam sī-ö pöri, ngaich falngöre min anga-aṅ tö yīö.

⁸ Ṙūötöre im Tēv, ngaich ṙūötöre min anga-aṅ nö in yīö. Söichlö eltīre yin, yī-ö tököölö fālen, yī-ö tö ka-ānga ellōn.

⁹ Hakihtenre yēḵ, haṙivlōn inrē peuny inrē: hökngen ngam nīölö yīö nö havāngtu nö im miṙivlōn, ngam ṙanāmölōn yīö inrē nö im lumngan

¹⁰ Hayāichngöre yin ikūö ngam Mā, ngaich hapōilen yīö min Anga-aṅ.

Ṙô I Alāha Ngam Kinṙòkken Kristīön

¹¹ Kahōlö, ui chōchöṙô tö höö. Ngòh töchōchô tö holre, hēk akah holre, chōchöṙô tö ngam chöngö, ngaich ma-akah ngam chöngö: yē meh pöri akah ngam chöngö, öt lamök im chöngö me-eṅ, ma-akah pöri.

¹² Höng hĕng tak an ngam kamëtö chöngö, ma-akah inrē, höng anga-aṅ An tö kô nö hayööken, fëlhanga inrē; chīö öm pöri me-eṅ ma-akah holre?

Ṙô I Alāha Ngam Ineū-euṅ Re

¹³ Kuṙòh töngamuh, yī-ö tö ngö ṙô, Chuh i ngih in elpanam tötaheui, huṙöich, keuheūtngö tö hĕng samyeūheu in e, inyih inrē ngaich kēḵ taneūngenre:

¹⁴ Ngaich rö-ö yī-ö akahalōn töp min ip huṙöich. Asuh öng ngam nômö yīö? Tö yīö höng hanusngö, töng rahëichtaṙen meūkö, chaṙēviyö ngaich.

¹⁵ Tön ngö ṙô yin öre, Aṅ in min, yē lōn ngam Mā, ngaich vīken ngih, hēk ngī-aṅ.

¹⁶ Ngaich pöri yī-ö eū-eure i nyanatlöre: ṙòkhöre nup töngatī ineū-euṅ nö tötlöök.

¹⁷ Ngòh tö-akahalōn tö tölöök vahīṙenre, ngaich rö-ö nö vīken e, in ò an angū-ö tökööl.