YĀKÖP 1 - TÖHET LĪPÖRE (Re-edited) Bible (BSI)

¹ Salām yip tö nët sīön miyöngö, yip tö parāti an Yāköp, kūönkūö ngam Tēv, ngam Mā Yēsū Kristū inrē.

Ṙinātö Ellōn Tö Ngam Mikah

² Kahōlö; ṙanāmölōn an yĕh, tö lōn yīö, yē yīö fukngö i nup töṙōlkangen kanihngen:

³ Akahtöheichlōn tö ngam kinlaha ngam mikah yīö nö tītö manöiyö.

⁴ Ngaich hökngen ngam manöiyö nö hateungngö ngam la-enre, hòṅ yīö öi teungten, öt hanātuṙen i tökeuheūttöre.

⁵ Yĕn hĕng tak in yīö tö īnuvö töp töhāṅten mikah, hökngen ò yĕh nö ve-ekūö ngam Tēv, ngam tötṙāyutī nö kē-ĕkūö taṙòkhöre, ngam tötmumṙē-ĕng inrē; ngaich kē-ĕvkūö min anga-aṅ tö e.

⁶ Hökngen ò pöri yēḵ nö havë-a, nö hayönglenre, un katöngalōn; pò ngòh tökatöngalōn nö sā mahūṅvö mai, töfööṙi tö kuföt, nöng halöinyka.

⁷ Uh an yēḵ anga-aṅ tarik nö teūngen, tö lōnre, tö aṅ im Mā Tēv.

⁸ Ngòh tarik tönëtö ellōn, höng öt köp, nö el talöököre.

Yanāichö Tö Nup Kanòlò

⁹ Hökngen ngòh yāich nö ṙāmölōn töre nö hapōilöngö;

¹⁰ Ngatī ngòh tökôlò inrē im inyāichngöre; pò ngòh tökôlò min tarik nö sā chanuhu në ṙòng chōn.

¹¹ Pò ngam tavūöi nö meutlö nö holtö töṙāich kuföt, ngaich nyīkngö tī tö minë chōn; ngaich sukngöre minë ṙòng, ngaich chuhngöre ngam lanöökö u. Ngatī min inrē ngòh tökôlò tarik nö chuhngöre i nup talöökö ò.

Kinlāha Tö Ngam Inyikhanga

¹² Tökôlò ön ngòh tarik, ngòh töthanlöinyken tö kanihngen; pò ò min nö teūngen tö ngam sapīöv ngam nômö, yē ò min nö mihôiṅ, ngam ṙô ngam Mā nö kilēḵngôre nö in cha yip töhāngenlōn tö Ò.

¹³ Un tarīku tö ngö ṙô, yē ò nö kalaha, Kalaha chin tö aṅ im Tēv: tön rö-ö An ngam Tēv nö kô nö kalaha tö tötlöök, rö-ö an Anga-aṅ nö kalah tarik:

¹⁴ Kalaha pöri ngòh tarik, yĕn tūöki anga-aṅ töp lōnre, ngaich hachōḵoyö.

¹⁵ Ngaich ngam tötlöök nö kumtö tökööl, yē e nö lēnngötī nö ellōn: ngaich ngam tökööl nö kumtö kinpaha, yē e nö ngaich nö tömngö.

¹⁶ Kahōlö, un hachīlö.

¹⁷ Ṙòkhöre nup tölöök inlōnti, nup töteung inlōnti inrē, nö aṅ lātulöng, ṙamā-ang im Yöng në töhathukūö; ngam tökô nö öt haṙīköre, ötrēhĕn nö nyatngö.

¹⁸ Pò e nö lōn Ò, nö kētö nômö hī, i ngam ṙô kanô-en, hòṅ hī ayī-ö, sā ranehlòng vahī-il Ò.

Hināngö Tö Ngam Kinëḵtöre

¹⁹ Haköp ngih yin, kahōlö; hökngen taṙòkhöre tarik nö ka-eūyö elnang; ṙēmöṙô nö ṙô-òv; ṙēmö lanīnö:

²⁰ Pò ngam lanīnö ngòh tarik nö öt ṙūönyö ngam lanöökö ngam Tēv.

²¹ Lökten ṙāngö nup taṙòkhöre töchōich, ane inrē nup chööḵṙen ötlanöökö, hayāichngöre kēḵ ngam ṙô ngam töteūichtu nö ellōn yīö, ngam tökò nö hayööken nômö yīö.

²² Kamëkö kaha ngam ṙô yin yēḵ; un höng hamang, öi hachīlöre.

²³ Yĕn hĕng tak ngòh töng hamang ngam ṙô, nö öt kamëkö kaha; sā ap tarik an anga-aṅ, tummëlkūöre nö i mat tinmël.

²⁴ Pòn meukkūöre anga-aṅ, feus kiröönngöre ngaich, ngaich ilööṙen nö vaichngö tö inlahare nö tarik.

²⁵ Anga-aṅ pöri ngòh ngamëchkö ngam tö teung chöngö, ngam chöngö ṙinānyö, ngaich iṙūöhen nö ngatī; rö-ö nöng hamang, nö tövaichngö; kamëkö kaha pöri, nö töla-evṙen; anga-aṅ min tarik töhakôlöngṙô nö i nup la-enre.

²⁶ Yē ngòh tarik, nö im Tēv inlahen tölōnre, ngaich öt haköp ngam litākre, hachīl ellōnre pöri, töt kô-en an angū-ö falngen nö im Tēv.

²⁷ Ngih ön töhet falngen im Tēv, öt töchōich inrē, ngih chinöhkö kūönyōich, tafīösi inrē, i nup kanihngen cha; haköpngöre inrē un pitōtuvö tö aṅ ing panam.