T. YÔHAN 3 - TÖHET LĪPÖRE (Re-edited) Bible (BSI)

Yēsū Nāṅ Nikòtimös

¹ Hĕng taka ök tarik, aṅ i yik Feresī. Nikòtimös ök minënyö ò, mākūö yik Yahūti.

² Anga-aṅ yamihtöre nö in Yēsū, tö hatööm, ngaich ngö ṙô tö Ò, Rappī; akahalōn in tö Meh Öm mahaköphöti ṙamā-ang im Tēv; tön öt tarīku tökô nö la-evṙen, nö sā Meh, tö në minkahngö, yē Ò nö öt īnu tö ngam Tēv.

³ Ngaich Yēsū nö ngö ṙô, nö sap ṙô ò. Tökô-ò ṙô Chin tö meh, yē ngòh tarik nö öt tumfömlöng finötnyi, öt kô anga-aṅ nö meuk ngam pūlngö ngam Tēv.

⁴ Ngaich ngö ṙô ang Nikòtimös tö Ò. Sitih kanô-òṅ ang ngòh tarik nö fötnyu, yē ò nö köiny nö ngaich? Kô-òren ang nö kuhēthötre nö ellōn yöngre, ngaich fötnyu nö hēk?

⁵ Ngaich ngö ṙô Yēsū, nö sapṙô ò, Tökô-ò ṙô Chin tö meh, yē ngòh tarik nö öt fötnyu tö ngam mak, ngam {Töhet} Fanöinylö inrē, öt kô min anga-aṅ nö kuhēthötre nö im pūlngö ngam Tēv.

⁶ Pò ngòh töfötnyu tö ngam alaha, ngaich nöng alaha; ane inrē ngòh töfötnyu tö ngam Ma-alaha, ngaich nöng ma-alaha.

⁷ Uh man pingangkūö tö ṙô Chu, tö tinfömlö finötnyö yīö.

⁸ Lahööṙa an yih ngam kuföt nö kū-ötö kū-öre; ngaich me-eṅ höng hang ṙô e; rö-ö pöri akahalōn töp löktö e nö yih; ap chuhu e inrē. Ngatī pöchö ngòh töfötnyu tö ngam {Töhet} Fanöinylö,

⁹ Ngaich ngö ṙô ang Nikòtimös, nö sapṙô Ò nö hēk, Sitih kanô-òṅ ön anū-ö?

¹⁰ Ngaich Yēsū nö sap ṙô ò, nö ngö ṙô, Mahaköphöti öm me-eṅ i Israĕl, ngaich öt akahalōn hòng tö u?

¹¹ Tökô-ò ṙô Chin tö meh, Ṙôtö nup mikahlōnre in īhö; eūkö nuk maheuṅkre inrē; ngaich rö-ö yī-ö hōḵ tö nup aheūkö ih.

¹² Yē Chu ṙôtö aṅ el tumlat in yīö, ngaich öt ṙātö ellōnre yī-ö; Sitih kanô-òṅ öi ṙātö ellōnre, yē Chu ṙôtö aṅ el halīöngö, in yīö?

¹³ Öt hĕng tak tarik nö töngaich nö yônlö nö el halīöngö, höng Anga-aṅ yamônti nö ṙā-ang el halīöngö, ngam Kūön Tarik, ngam me-el halīöngö.

¹⁴ Sā Môsös nö el-inchōn nö hatamlö ök pēch, hòṅ ngatī min ngòh Kūön Tarik nö hatamlöngö;

¹⁵ Hòṅ ngòh ṙamātö ellōnre nö in Ò nö nômuvö tö ngam tö-örheūheu nö aṅ in Ò.

¹⁶ Tölngö hanāngenlōn An ngam Tēv töng panam, tön uroh nö kēngö ngam töng hĕng maneuk Kūönre; pòn sōtu vē ṙamātö ellōnre nö in Ò, nö ötkôlò; hōtu pöri ngam nômö tö-örheūheu-aṅ nö in cha.

¹⁷ Pò ngam Tēv nö öt tīnten ngam Kūönre nö öthakôlò ngih panam; hōtu pöri ngih panam nö lökten in Ò nö hayöökaṙen.

¹⁸ Hakôlòngṙô ön ngòh ṙamātö ellōnre nö in Ò; ngòh tötṙamātö ellōnre, ha-ehangen ötinkôlò, pò ò nö öt ṙātö ellōnre nö im töng hĕng maneuk Kūön ngam Tēv.

¹⁹ Ngih öng yih lökten ötinkôlò, pò ngam Hanātö nö yih nö ing panam ngaich hāngenlōn tarik tö sinngūlö, nö mötlö töm Hanātö; pò nup la-en cha nö tötlöök.

²⁰ Pò ngam tötlöök la-en nö surīkhö ngam Hanātö; öt yihtöre inrē nö im Hanātö; pòn sōtu nup la-en ò nö vëka.

²¹ Ngòh töla-evṙen pöri tö kanô-en, yihtöre nö im hanātö; pòn hōtu nup la-en ò nö hameuktu nö aṅ im Tēv.

Nā Yēsū Nāṅ Yôhan

²² Unôichrit në, Ang Yēsū nö chuh i panam Yūtā, nö holtö yik mahaköp; ngaich in e Anga-aṅ nöngngöh nö holten cha; ngaich vōk tarik.

²³ Vōk tarik inrē ang Yôhan nö i Ainōn, röhta nö i Sālim; pòn pōyen mak nö umuh. Ngaich yihtöre cha-a nö vōkö.

²⁴ Pò Yôhan nö öl nö kalonghötvö.

²⁵ Ngaich ve-ekūöre yik haköptö Yôhan, tök tö hĕng tak Yahūti inrē, tö inlahen inhetlö.

²⁶ Yihtöre cha-a nö in Yôhan, ngaich ngö ṙô tö ò, Rappī; vōk tarik Ap Anga-aṅ inrē; Ap hol meh lāmuh tö Yôtön Ap aheūkö meh, ngaich ṙòkhöre vē tarik nö chuh in Ò.

²⁷ Ngaich sapṙô cha Yôhan nö ngö ṙô, Öt tarīkuvö tökô nö kahe-evö, yē e nö öt ṙamā-ang el halīöngö nö kine-eṅkūö ò.

²⁸ Yī-ö yin ameū-a tö chu ngö ṙô, Rö-ö chin Chū-ö Kristū; tötīntu pöri, urēhĕnkūö Ò.

²⁹ Ngam tö īnu tö ngam kikānö töhapīhö, ngaich anga-aṅ kikōnyö töpīhövö. Ngam hol ngam kikōnyö pöri töhapihö ngam samökhaka nö hang ṙô ò, pōyen ṙanāmölōn tö kūöṙô ngam kikōnyö töhapīhö. Ngaich chin tööḵlö, tö e, angū-ö ṙanāmölōn.

³⁰ Ṙamuhölre An Anga-aṅ, ṙamūöngenre Chū-ö.

Angā-aṅ Ngam Yamih Nö Lök Tö Elhalīöngö

³¹ Ngam yamih nö ṙā-ang lātulöng, lātulöng Anga-aṅ tö taṙòkhöre. Ngam aṅ ing panam, aṅ ing panam. Ngam ṙamā-ang el halīöngö nö yih, latulöng Anga-aṅ tö taṙòkhöre.

³² Nup maheuṅk Ò inrē, ngaich eūkö u Anga-aṅ; öt tarīku pöri hamôḵòṅ aheūkö Ò.

³³ Ngam hamôḵòṅ aheūkö Ò, haköpngöre ngaich tö ngam Tēv nö tökô-en.

³⁴ Pò ngam tötīntu tö ngam Tēv nö ṙôtö ṙô ngam Tēv, Pò Ò nö ötkinlahav tī nö kētö ngam {Töhet} Fanöinylö.

³⁵ Hāngenlōn ngam yöng töm Kūön; ngaich kētö eltī Ò tö taṙòkhöre.

³⁶ Ngòh ṙamātö ellōnre nö im Kūön, nômuvö tö ngam tö-örheūheu-aṅ. Ngòh töthamangṙô ngam Kūön pöri, öt meuk ngam nômö min; höngngöh pöri ngam lanīnö ngam Tēv nö in Ò.