Biblia Todo Logo
Bib sou entènèt

- Piblisite -

T. MĀKÖS 9 - TÖHET LĪPÖRE (Re-edited) Bible (BSI)

1 Ngaich ngö ṙô Anga-aṅ tö cha, Tökô-òṙô chin tö yīö, Rēvre yip ihih tösökhak, tö-öl min nö kapah, hanöng saha mat cha nö meuk ngam pūlngö ngam Tēv nö yih nö holtö minhôiṅyö.


Ngam Inṙīngöre Yēsū
( Mt 17.1-13 ; Lk 9.28-36 )

2 Unôichrit tö tafūöl sumkam, Ang Yēsū nö ngô-òṅ Pītör, Yāköp, Yôhan inrē; ngaich hayihten cha nö i kui ap tömarô-òlkui rôngö: köhngen cha-a. Ngaich haṙī-ingre Anga-aṅ nö i kūö cha.

3 Ngaich nuk hilā Ò nö pachālamat, isoh takô; öt tökô-òv samöich hilā ing panam, nö mi-isohoiny u.

4 Ngaich meūkö tö cha nāṅ Ēlaicha, nāṅ Môsös; ve-ekūö Yēsū cha-a.

5 Ngaich Pītör nö ngö ṙô tö Yēsū, Rappī; lööken in ihih. Yē hökngen ih lūöyö vahī tö inrūkui; hĕng inrūkui Meh, hĕng Môsös, hĕng Ēlaicha.

6 Pò ò nö öt akahalōn tö ṙôre lang; pò cha nö pa-ekūö takô,

7 Ngaich teungtöre ök taṙul nö hanyattökui cha; ngaich hĕng ök ṙô lamöktö el ök taṙul, tö ngö, Hanāngen Chu Ön ngòh nö Kūön Chu; hang ṙô Ò yin.

8 Ngaich iṙūö havīngömatre cha-a nö ngëcha, ngaich öt hĕngtit tak maheuṅk, höng Yēsū nö hol cha.

9 Ngaich hē yanôntö cha, nö ṙā-ang kui ngam ṙôngö, ngaich sōten cha Anga-aṅ nö vahënyu nang tö tarik tö nuk maheuṅk cha, höng yē ngam Kūön Tarik nö ngaich nö choholre nö hēk, nö ṙā-ang yip tökapah.

10 Ngaich haköpngö ngam ṙô cha-a; hatönöre tö manah ngam chinôhòlre nö ṙā-ang yip tökapah.

11 Ngaich hatönan cha-a, nö ngö ṙô, Sitih yip kamūich nö ngö ṙô, tö Ēlaicha nö mu-urĕh tö yihih?

12 Ngaich ngö ṙô Anga-aṅ tö cha, Kô ap Ēlaicha nö urĕh tö yihih, ngaich halēn taṙòkhöre. Ngaich Sitih kinūichngö ngòh Kūön Tarik, tö Ò nö ötkôn rö-ö nö pōiyen kanihngen, sōḵovö inrē?

13 Ngö ṙô pöri Chu-ö tö yīö, Ngaich ap Ēlaicha nö yih ngaich ngaich tī cha-a tö ò, ip töng lōnre; sā ṙô ngam töhet līpöre tö ò.


Halanken Ök Kunnyīö Tö Aṅhav In Tö Sī-ö Ang Yēsū
( Mt 17.14-21 ; Lk 9.37-43 )

14 Ngaich hē cha nö yihtöre nö i yik mahaköp, ngaich meuk yik tömaṙôngö cha-a nö havīlen cha; ve-ekūö cha inrē yik kamūich.

15 Ngaich hē yik tömaṙôngö nö meūkan, ngaich uṙeh alaha cha-a; ngaich iṙūö faltöre nö salāman.

16 Ngaich hatön yik kamūich Anga-aṅ, nö ngö ṙô, Asuh ap ṙô yīö, ve-ekūö cha?

17 Ngaich hĕng tak ök aṅ i yik tömaṙôngö, tö ngö ṙô tö Ò, Mahaköphöti; kētö ngòh kūönre chin, ngòh tö īnu tö sī-ö tötkô nö ṙô-òv.

18 Afukngen ò ap, yē ò nöng yihtöre nö in ò; pēhĕv elvāng anga-aṅ, kap kui kanapre inrē; ngaich an nöng lëvngö. Ngaich chu-ö ve-ekūö më haköptö Meh, nö ahōngen ò; ngaich öt kô cha-a.

19 Ngaich ngö ṙô Anga-aṅ tö cha, Ō yī-ö tötakaha tūmö; irô-òten Öich min in yīö? Irô-òtö manööyö Öich min in yīö? Kēten ò in Chu.

20 Ngaich kēten ò cha-a nö in Ò. Ngaich hē ngam nyīö nö meūkö Yēsū, iṙūö hangihire tī ngaich ngam sī-ö tö ò, nö pōihangen; fukngö ngaich nö el tumlat, pilönöre, nöng pēhĕv elvāng.

21 Ngaich hatön ök yöng ò Yēsū, nö ngö ṙô, I ṙô-òten ang nö ngaich tök hētö yanihih e nö in ò? Ngaich ngö ṙô anga-aṅ, Hētentö ò nö ṙòngmö nyīö.

22 Ṙōlheuh an nö hòṅ fëlngen ò. Yē Meh pöri kô, aheūkölōn Man yēḵ tö ih, holṙen ih.

23 Ngaich Yēsū nö ngö ṙô tö ò, Yē meh kô; tökô nun në taṙòkhöre nö i ngòh ṙamātö ellōnre.

24 Ngaich iṙūö peuiny ök yöng ök nyīö, nö ngö ṙô, Ṙātö ellōnre chin. Meukṙen hanāṅten mikah chu.

25 Ngaich hē Yēsū nö meuk yik tömaṙôngö nö hufālö nö yihtöre; ngaich Anga-aṅ nö vëkö ök tötlöök sī-ö, nö ngö ṙô, Me-eṅ tötkô ṙô-òv, töthang inrē sī-ö; Chu-ö Chin tamölṙô meh, Meutnyi, ṙā-ang in ò; um hēk meuthöt in ò.

26 Keuheūthëṙen nö hūḵa, ngaich hangihire tī tö ò, nö pōihangen; meutnyi ngaich, nö ṙā-ang in ò, ngaich ngam nyīö nö sā kupah; lökten nö maṙôngö yik tö ngö ṙô, kapah an.

27 Kēḵ kël ò pöri Yēsū, ngaich hachohlen ò; ngaich choholre anga-aṅ.

28 Ngaich hē Ò nö yòhlö nö el patī. Ngaich yik haköptö Ò nö ulāikôre nö hatönan, nö ngö ṙô, Kūöyòh öi ihö öt kô ahōngen ò?

29 Ngaich anga-aṅ nö ngö ṙô tö cha, Öt anhôngen ön ngòh töngati sī-ö, höng lökten i vine-eṅkūötēv, inhīkö inrē.


Ve-eny Inlāha Kinpāhare Hēk Anga-aṅ
( Mt 17.22-23 ; Lk 9.43-45 )

30 Kiröönngöre ngaich cha-a nö ṙā-ang umuh, ngaich lök i Kelelī; ngaich sōtö tarik Anga-aṅ nö akahalōn tö e.

31 Pò Ò nö haköptö yik haköptöre, nö ngö ṙô tö cha, Kētu Ön min ngòh Kūön Tārik, nö eltī tarik; ngaich fëlngen Ò min cha-a. Keuheūthëṙen finëlngö min Anga-aṅ, ngaich choholre hēk, unôichrit tö lūöi sumkam.

32 Ngaich pöri cha-a nö öt akaha elnang tö ngam ṙô; pa-ekūö inrē nö hatönan.


A Chīö ap Töpōyö?
( Mt 18.1-5 ; Lk 9.46-48 )

33 Chalô cha-a ngaich nö i Kafarnahum. Ngaich hē Ò nö yòhlö nö el patī, ngaich hatönö cha Anga-aṅ, nö ngö ṙô, Asuh ök ṙô yīö taheui ve-ekūöre, eltalöökö?

34 Ngaich pöri cha-a nö öt ṙô-òv; pò cha nö ve-ekūö höö, nö el talöökö, töp töpōyö tö cha.

35 Ūichngöre ngaich Anga-aṅ, ngaich havëtö yik tö nët sīön tak; ngaich ngö ṙô tö cha, Yē ngòh tö hòṅ urĕh tarik, manā-angkūö taṙòkhöre min anga-aṅ, mameukṙen taṙòkhöre inrē.

36 Kētam Anga-aṅ tök kun nyīö, ngaich asöklen ò nö ellōn cha. Ngaich fullen ò Anga-aṅ;

37 Ngaich ngö ṙô tö cha, Ngòh tö hĕng tak ahōḵo tö töngatī kun nyīö, nö i Mine-eny Chu, hamôḵen Chu anga-aṅ. Ngòh hamôḵen Chu, öt höng hamôḵen Chu anga-aṅ; hamôḵòṅ ngam taminten Chu pöri.


Ngam Töt Lā-alhī Holhī Anga-aṅ
( Lk 9.49-50 )

38 Ngaich Yôhan nö ngö ṙô tö Ò. Mahaköphöti, hĕng taka ök maheuṅk ih ma-ahōngö sī-ö nö i Mine-eny Meh; ngaich tahngen ò īhö, pò ò nö öt tömrit ih.

39 Ngö ṙô pöri Yēsū,, Un tāhaiyö ap; tön rö-övö nö tarīku töla-evṙen min tö minhôiṅyö nö i Mine-eny Chu, öp tökô-òren nö iṙūö ötlöökö ṙô tö Chu.

40 Pòn hol hī ngam töt lā-al hī.

41 Yĕn hĕng tak min kamëtö òk yīö tö mak, nö pò yīö aṅ in Kristū; tökô-òṙô Chin tö yīö, Öt hōḵ öp min nö löhlö tö raneushöre.


Kinlāha I Tökööl
( Mt 18.6-9 ; Lk 17.1-2 )

42 Ngaich yē ngòh tö hĕng tak pòkūö tö vē kunkūöṅnö nö palā-aiṙen, vē ṙamātö ellōnre nö in Chu; ĕhten öp öre misī, yĕn kapòktu likeun tö tökiröng ihong, ngaich sūmi nö el mai.

43 Ngaich yē ngam kël meh nö pô-òvkūö tö meh palā-aiṙen, rökngö e. Lahëḵ man min höng kurong, öm kuhēthötre imnômö; ĕhten tö meh yē meh āṅngöre lā kël, chuh el chūök ötinkôlò, i kūö öp töthannyangngen tameūyö;

44 I chūök nup kamlökö nö öt kapah; öt nyangngö öp tameūyö inrē.

45 Yē ngam kalröön meh nö pô-òvkūö tö meh palā-aiṙen, rökngö e. Lahëḵ man min höng karòk, öm kuhēthötre im nômö; ĕhten tö meh yē meh āṅngöre lā kalröön öm kavāli el chūök ötinkôlò;

46 I chūök nup kamlökö nö öt kapah; öt nyangngö öp tameūiyö inrē.

47 Yē ngam mat meh nö pô-òvkūö tö meh palā-aiṙen, pëôknyö e. Lahëḵ man min höng hēngö mat, öm kuhēthötre in pūlngö ngam Tēv; ĕhten tö meh yē meh āṅngöre lā mat, kavāli el chūök ötinkôlò;

48 I chūök nup kamlökö nö öt kapah; öt nyangngö öp tameūyö inrē.

49 Pòi ṙòkhöre min kö asāli töp sāl,

50 Tölöök ön ngih sāl. Yē e pöri nö öt ngöhöre inṙeihu, Sitih tī öi min kumchiklö e? Sālu in yin yēḵ; ngaich kö kuchīken in höö.

Car Nicobarese (Re-edited) Bible - TÖHET LĪPÖRE 

Copyright © 2010 by The Bible Society of India

Used by permission. All rights reserved worldwide.

Bible Society of India
Swiv nou:



Piblisite