T. MĀKÖS 5 - TÖHET LĪPÖRE (Re-edited) Bible (BSI)

Halanken Ök Tö Sī-u Aṅ In Ang Yēsū

¹ Chalô cha-a ngaich nö im tahëng lā kaha ngam mai, ip panam Keresēn.

² Ngaich hē yanôktö Ò, nö ṙā-ang el kupòk, ilööṙen ngaich hĕng tak ök tarik mameuk kūö Ò, ṙamā-ang kui kupah; tö īnu tö tötlöök sī-ö.

³ Ök töng mi-iyöng kui kupah. Öt hĕng tak tarik tökô nö nyëkan; ötrēhĕn nö kô në sayōk.

⁴ Ṙōl heuh anga-aṅ nö nyëkö kalröön kël inrē; ngaich minë sayōk nö litôki tö ò; nuk nyanëk kalröön ò inrē nöng latôki. Öt hĕng tak tökô nö pumlāman.

⁵ Ngaich örheūheu anga-aṅ tö hatööm, sakāmö inrē, nö i kui kupah, i kui rôngö inrē; nöng hūḵa, ṙātöre inrē nö aṅtītö ihong.

⁶ Ngaich hē ò nö meūkö Yēsū nö marôvat, faltöre ngaich, nö ve-ekūö Ò;

⁷ Ngaich pōitô nö hūḵa, nö ngö ṙô, Sitih öich chu-ö in Meh, Yēsū, Me-eṅ Kūön ngam Tēv lātulöng? Im Tēv ṙô Chin ve-ekūö Meh, Uh chin öthakôlöngṙô tö Meh.

⁸ Pò Yēsū nö ngö ṙô tö ò, Me-eṅ töt löök sī-ö; kunyī-inyre man, ṙāngö ngam tarik.

⁹ Ngaich hatönan Anga-aṅ nö ngö ṙô, Achīö ap mine-eny meh? Ngaich ngö ṙô anga-aṅ, Līkiön, öp mine-eny chu; pò ih maṙôngö.

¹⁰ Ngaich ve-ekūö Ò anga-aṅ nö sōten Ò nö tīnngen cha, nö ṙāngö ngam panam.

¹¹ Ngaich i kui rôngö nuk umuh tömaṙôngö ha-un, tö ha-ôkö.

¹² Ngaich ve-ekūö Ò cha-a, nö ngö ṙô, Tīnngen ih i nup ha-un, hòṅ ih meuthöt in u.

¹³ Ngaich halöngten cha Anga-aṅ. Meutnyi ngaich yik tötlöök sī-ö, ngaich meuthöt nö i nuk ha-un. Ngaich nuk ha-un nö faltöre nö ik töyūöti nö el mai. Nët köṅny tum nòng nuk; ngaich pökngö nö el mai.

¹⁴ Ngaich yik maha-ôkö u nö falngöre; ngaich ve-eny e nö im panam, i tavat inrē. Ngaich cha-a nö yihtöre nö ngëichkö inlahen ök töngati.

¹⁵ Yihtöre ngaich cha-a nö in Yēsū; ngaich meuk ök tarik nö ūichhaka, ök tösī-u aṅin sin hilāṙuvö, löökö ellōn inrē, ök tö īnu tö līkiön. Ngaich pa-ekūö cha-a.

¹⁶ Ngaich yik mameūkö e, nö ve-eny nang cha tö inlahen ngam tö īnu tö sī-ö, tö nuk ha-un inrē.

¹⁷ Ngaich ve-ekūö Ò cha-a nö hōten Ò nö kiröönngöre nö ṙā-ang chīṙö cha.

¹⁸ Ngaich hē yanôklö Ò nö el kupòk, ngaich ök tö-īnu tö sī-ö sin, nö ve-ekūö Ò, pò ò nö hòṅ in Ò.

¹⁹ Ngaich öt halöngten ò Anga-aṅ; ngö ṙô pöri tö ò, Kuṙòh, chuh patīre man, i yip holre; ve-eny nang cha tö ṙòkhöl tī ngam Mā tö meh; tö neukölōn Ò inrē tö meh.

²⁰ Kiröönngöre ngaich ngam tarik; kaknyöre ngaich nö ahangkö ṙôkhöl tī Yēsū tö ò, nö i Tekapòlis; ngaich ṙòkhöre yik tarik nö pingangkūö.

Kūön Yairös Tö Ök Kikānö Lamūölkö Hilā Yēsū

²¹ Ngaich hē Yēsū nö havāngngöre nö hēk, nö el kupòk, nö im tahëng lā; maṙôngö yik tarik nö hamūlöre nö in Ò; ngaich Anga-aṅ nöng i kūö mai.

²² Ngaich hĕng tak ök yamihtöre, aṅ i yik yöngṙen chūök vine-eṅkūötēv, Yāirös ök mine-eny ò; afukngöre anga-aṅ nö i röön Ò, tö mat ò nö meūkan.

²³ Ngaich ve-ekūö Ò anga-aṅ, nö kô-ò ṙô takô nö ngö ṙô, Hòṅ kapah ap kun kūön chu kikānö. Ve-ekūö Meh chu-ö, hòṅ Meh yihtöre, ṙātö eltīre in ò; hòṅ ò nö lööken, ngaich aṅ.

²⁴ Ngaich kiröönngöre Anga-aṅ nö hol ò. Ngaich maṙôngö yik tamömrit Ò, ngaich cha-a nöng singngen Ò.

²⁵ Ngaich hĕng taka ök kikānö tö nët sīön samyeūheu rô-òten nö kunyahen;

²⁶ Ök tö vaichtö chök tökūö tī yik tö ṙōl tak lame-en tövahavö; ngaich nöng keuheūt tö rupīöre; ngaich nöng öt anehtuṙen, vaichtö hanṙūöhangen pöri.

²⁷ Höng hangtöre anga-aṅ tö Yēsū, ngaich yihtöre nö i uk yik tömaṙôngö; ngaich lūölkö hilā Ò;

²⁸ Pòn ngö ṙô anga-aṅ töre, Lööken chin min, yē chu höng lūölkö nup hilā Ò.

²⁹ Ilööṙen ngaich ök kunnyahen ò nö nyôlö; akahaiṙen alaha ngaich anga-aṅ tö lanöökenre tök invahre.

³⁰ Akahaiṙen Ang Yēsū nö in re, töp kanô-òṅ Ò nö kēkaṙen; havöötökūöre Anga-aṅ ngaich nö i yik tömaṙôngö; ngaich ngö ṙô. Achīö ap lamūölkö hilā Chu?

³¹ Ngaich yik haköptö Ò nö ngö ṙô, Meuk më tömaṙôngö Man, nö singngen Meh, ngaich Öm ngö ṙô, Achīö ap lamūölken Chu?

³² Chuvīngö matre ngaich Yēsū nö ngëichken ò, ök tö tī-ivö.

³³ Ngaich pöri ngam kikānö nö pa-ekūö, kichëyöre inrē, pò ò nö akahangenre nö ngaich; yihtöre ngaich, nö afukngöre nö i kūö Ò. Ngaich ve-eny re nö kô-òṙô.

³⁴ Ngaich ngö ṙô Anga-aṅ tö ò, Kakūönö; ngam mikah meh an tölöökentī tö meh. Im kumchikṙen man ngaich kuṙòh. Ngaich lööken yēḵ tö ngam invahre.

³⁵ Ngaich hē Ò nö ṙònghöich ṙô nö ṙô-òvö, yihtöre ngaich yik ṙamā-ang patī ök yöngṙen chūök vine-eṅkūötēv, ngaich ngö ṙô, Kapah ap kūön meh nö ngaich. Kūöyòh öm iṙuöhen öm haṙeikö ngam Mahaköphöti?

³⁶ Ngaich pöri Yēsū nö öthanglöre; ngö ṙô tö ök yöngṙen chūök vine-eṅkūötēv, Um pa-ekūö, höng ṙātö ellōnre man.

³⁷ Öt hĕng tak halöngten Anga-aṅ tö tamömritre, höng hēḵ Pītör, Yāköp Yôhan inrē, ök kahëm Yāköp.

³⁸ Chalô cha-a ngaich nö i patī ök yöngṙen chūök vine-eṅkūötēv; ngaich Anga-aṅ nö meuk tö taṙōlaṙen, pameuiny, maharāmöre inrē, nö pōitô.

³⁹ Ngaich hē Ò nö kuhēthötre, ngö ṙô ngaich Anga-aṅ, Asuh öng ngam tinṙōlen yīö, pineūinyö inrē? Höng haṙòh an ngam nyīö; rö-ö an nö kapah.

⁴⁰ Ngaich hayīölngen Ò cha-a. Keuheūthëṙen Anga-aṅ tö nak yöng ök nyīö, yik hol Ò inrē; ngaich chuh i chūök ök nyīö.

⁴¹ Ngaich kēḵ kël ök nyīö Anga-aṅ, ngaich ngö ṙô tö ò, Talitā kūmi, ngam tö ngö manah, Me-eṅ nyīö kikānö, choholre, ngö ṙô Chin tö meh.

⁴² Ilööṙen ngaich ök nyīö nö choholre, kiröönngöre ngaich pò ò nö tö nët sīön samyeūheu. Ngaich pōyen pinngangkūö cha-a.

⁴³ Ngaich sōten cha Anga-aṅ nö eūkö e nö i tarik. Ngaich hōten cha nö kē-ĕkūö ò tö nya-aṅkūö.