T. MĀKÖS 4 - TÖHET LĪPÖRE (Re-edited) Bible (BSI)

Ök Tameūich (Inchōkoṙô)

¹ Hēk Anga-aṅ nö haköphöti nö i kūö mai, ngaich maṙôngö takô yik mahamūlöre nö in Ò. Lökten Ò nö yôklö nö ël kupòk; ūichngöre ngaich nö ël ò, nö ël mai, Höng i kūö mai yik tömaṙôngö, nö el tanyô.

² Ngaich ṙōlö ṙô Anga-aṅ nö haköpten cha, nö inchōḵovṙô; nö ngö ṙô tö cha, nö i inköphöti,

³ Hangihtöre yin. Yĕh meuk ngam tameūich nö kiröönngöre nö teūich.

⁴ Ngaich hē ò nö teūich, rēvre nup kulöl ngaich famuk taseū talöökö. Yihtöre ngaich nup chehechōn, nö nyāḵngö u.

⁵ Fukkui ihong nup tahëng, i chūök tötpōiyen tumlat. Ilööṙen ngaich nö meuinylö, pòn öt aṙū-uti tumlat.

⁶ Ngaich yē ngam tavūöi nö meutlö, ngaich harātö u, nyangngö ngaich anū-ö, pòn öt ṙēhĕvö.

⁷ Fuk ël töchökhukūö nup tahëng; sīöplö ngaich nup töchökhukūö, ngaich harāingökui u, ngaich öt ṙônguvö anu-ö.

⁸ Fuk ël tölöök tumlat nup tahëng, ngaich ṙônguvö. Sīöplöre, ngaich ṙuhölre ṙôken ṙòng, lūöi anāi, tafūöl anāi, hēngòng inrē.

⁹ Ngaich ngö ṙô Anga-aṅ, Ngòh tö elnānguvö, hökngen ò yēḵ nö hang.

Chööḵnyö Ngam Inchōḵoṙô

¹⁰ Ngaich hē Ò nöng hĕng taka, ngaich yik mi-in Ò tö yik tö nët sīön tak inrē, nö hatönan tö ngam inchōḵoṙô.

¹¹ Ngaich ngö ṙô Anga-aṅ tö cha, Yī-ö yin tökē-ĕvkūö tö ngam ötmikahkūö sin, aṅ i ngam pūlngö ngam Tēv, höng inchōḵoṙô pöri nö in cha, yip aṅ lā uk;

¹² Hòṅ cha nöng meuk, öt akaha elnang pöri, hòṅ cha nö öt havantöre nö hēk ngaich aṙēlöngö cha-a,

Ve-eny Manah Ngam Inchōḵoṙô I Ngam Tameūich

¹³ Ngaich ngö ṙô Anga-aṅ tö cha, Öt akahalōn öi tö ngih inchōḵoṙô? Sitih mikahlōn öi min tö në inchōḵoṙô nö ṙòkhöre?

¹⁴ Teūichtö ngam ṙô an ngam tameūich.

¹⁵ Cha-a yin vē mi-i taseū talöökö, chūök ngam ṙô nö teūichtu, ilööṙen ngaich Sātān nö yihtöre, nö kēḵngö ngam ṙô tö teūichtuvö nö in cha.

¹⁶ Ngatī yin vē tö teūichtuvö inrē nö i kui ihong, vē hamang ngam ṙô, ngaich ilööṙen nö holtö ṙanāmölōn nö hōḵo e.

¹⁷ Öt ṙēhĕvö pöri nö inre; ngaich lökten nö töng rahëchtaṙen. Ngaich yē nup kanihngen hēk öt inkôlò, tö kūö ngam ṙô; ngaich iṙūö ṙāngenre cha-a.

¹⁸ Tahëng yin vē töteūichtuvö nö el töchökhukūö: cha-a yin vē hamang ngam ṙô;

¹⁹ Ngaich ngam pinṙūtölōn aṅ ngih panam, inchīlö inrē tö kanôlò, nup lōn inrē tö tökeuheūttöre, nö meuthöt; harāingökui ngam ṙô, ngaich öt ṙônguvö anū-ö.

²⁰ Cha-a yin vē tö teūichtuvö nö el tölöök tumlat, hamang ngam ṙô, ngaich hōḵo e; ngaich ṙônguvö, lūöi anāi, tafūöl anāi, hēngòng inrē.

Tö Ruptukui Ëāṅvö

²¹ Ngaich ngö ṙô Anga-aṅ tö cha, Kētu ön ṙung në ëāṅvö, ngaich hakūptukui tö kuvôkö, elkatòh chamam inrē; nö öt vītu nö i kui chūök ëāṅvö?

²² Pòn öt tönyatnguvö, höng töhameuktunyöre min; öt rēhĕn nö töhayūnivö, höng yamihnyöre min nö im hanātö.

²³ Hökngen ngòh tö elnānguvö nö hang.

²⁴ Ngaich ngö ṙô Anga-aṅ tö cha, Haṙēmngenre yin tö nup ahangre. Öp kinlaha tī yīö tö e, angu-ö min kinlaha yīö; ṙūötuṙen kine-eṅkūö yī-ö min.

²⁵ Ngòh tö īnu, anga-aṅ min tö kē-ĕvkūö. Ngòh töt īnuvö pöri, kē-ĕyö min öp töng mi-in ò.

Inchōḵoṙô I Alaha Saniöplö Ngam Kulöl

²⁶ Ngaich ngö ṙô Anga-aṅ Sā öp tarik an ngam pūlngö ngam Tēv, tamūingö kulöl nö el tumlat;

²⁷ Ngaich haṙòh tö hatööm, choholre ngaich tö peuheū. Meuinylö ngaich minë kulöl, nö sīöp; öt akahalōn pöri anga-aṅ tö inlahen u.

²⁸ Ngam tumlat an töṙôngu nö kahngenre, urĕh ngam elkui, hēk ngam chūök ṙòng, ngaich hēk ngam ṙòng takô, nö el chūökre.

²⁹ Köinyhë pöri ngam ṙòng, ngaich kētökūö kanötre anga-aṅ; pòn ngaich ngam kanöinyòng nö yih.

Inchōḵoṙô I Ngam Kun Kulöl

³⁰ Ngaich ngö ṙô Anga-aṅ. Sitih tī öi min asātö ngam pūlngö ngam Tēv? Asuh öp min inchōḵoṙô hī tö e?

³¹ Sā öp kun kulöl an, yē e nö teūichtu nö el tumlat, öp tö pòrô nö manā-angkūö në kulöl nö ṙòkhöre me-el tumlat;

³² Yē e pöri nö teūichtu, sīöplö ngaich; ngaich tökiröngkūö në tö nya-aṅ chōn. Sīöpnyöre pak ngaich tö tökiröng; ngaich nup chehechōn nö kô-òren nö hanyatlöre nö el katòh rōi ò.

³³ Pōiyen nup tö ngatī inchōḵoṙô Ò tö cha, ip tölngö kanô-òṅ cha nö hāngö u.

³⁴ Öt ve-ekūö cha Anga-aṅ, nö öt inchōḵovṙô; ulāikenre pöri nö ve-eny inlahen u nö i yik haköptöre.

Vëkö Ngam Chanôchö Ang Yēsū

³⁵ Ngaich im hē e angū-ö sakāmö tö harap, ngö ṙô Anga-aṅ tö cha, Ta-a, töi havāngngöre lā mu-aṅ.

³⁶ Ṙa-ang tö yik tömaṙôngö, ngaich kēḵ An cha-a nö holre nö ël kupòk, nöng sāre Anga-aṅ. Tahëng nòng nuk inrē kupòk hol Ò.

³⁷ Chalô ngaich ök yöng chanôchö kuföt, ngaich yôkhu ngam kupòk tö elmai; ngaich hòṅ tööḵlö ngam kupòk.

³⁸ Ngaich Anga-aṅ nöng lārit nöng haṙòh nö el tinnyik; ngaich kilanglen Ò cha-a, nö ngö ṙô; Mahaköphöti; öt chumkūöṙen Öm tö hī ötkôlò?

³⁹ Choholre ngaich Yēsū, ngaich vëkö ngam kuföt; nö ngö ṙô tö ngam mai, Heūheure; um halöinyköre. Ṙāngenre ngaich ngam kuföt; ngaich kalūöng takô angū-ö.

⁴⁰ Ngaich ngö ṙô Anga-aṅ tö cha, Kūöyòh öi ngatī pinhe-eṅkūö? Öl öi mikahavö?

⁴¹ Ngaich cha-a nö pōi pinhe-eṅkūö; ngaich ngö ṙô tö höö, Achīö Ang min ngòh, tö uroh nö hāngö chöngö tö kuföt, mai inrē?