T. MĀKÖS 15 - TÖHET LĪPÖRE (Re-edited) Bible (BSI)

Kētu Yēsū Nö I Kūö Pailět

¹ Ngaich ka-euilökūö im peuheū yik mākūö kūönṙô, nö hol tö yik yöngṙen, yik kamūich inrē, ṙòkhöre yik kamhôṅka nö ve-ekūöre; ngaich nyëkö Yēsū; kēḵngen Ò ngaich, ngaich kēten Ò nö in Pailĕt.

² Ngaich hatönan Pailĕt, nö ngö ṙô, Rāchakūö Yahūti Öm Me-eṅ? Ngaich ngö ṙô Anga-aṅ nö sapṙô ò, Kô-ò ṙô man.

³ Ngaich yik mākūö kūönṙô nö pōyen vahë-eny tö fālen Ò.

⁴ Ngaich hēk Pailĕt nö hatönan, nö ngö ṙô Öt sahāpu Ömeh? Yĕh meuk, iṙôken ṙô aich nö ve-eny fālen Meh.

⁵ Ngaich pöri Yēsū nöng öt ṙô-òv; ngaich pingangkūö ang Pailĕt.

Hōtu Kinpāhangvah Ang Yēsū

⁶ Tö hĕng tak ṙahānyi Pailĕt tö tökē-ĕ, hē el paratīn, öp töng havëkö cha nö in ò.

⁷ Ngaich hĕng tak ök umuh, Pārapas minënyi, tönyëki; nö hol yik tumṙōlkenre, yik famël tarik nö ik tinṙōlen.

⁸ Ngaich yik tömaṙôngö nö yòhlö, kaknyöre ngaich nö ve-ekūö ò nö sā tīre i töṙung nö in cha.

⁹ Ngaich ngö ṙô Pailĕt tö cha, Hōḵ öyih, töich ṙānyö ngòh Rāchakūö Yahūti nö in yīö.

¹⁰ Pòn akahalōn anga-aṅ tö yik mākūö kūönṙô, nö kūö kumnyahelmatre, nö kēten Ò nö in ò.

¹¹ Ṙuhöl alaha yik tömaṙôngö pöri yik mākūö kūönṙô, nö hōten ò nö ṙānyen Pārapas nö in cha.

¹² Ngaich hēk Pailĕt nö ngö ṙô tö cha, Sitih tī öich pökeh, tö ngòh Rāchakūö Yahūti, tö ṙô yīö?

¹³ Harāten Ò, ngö cha-a, nö hēk,

¹⁴ Ngaich Pailĕt nö ngö ṙô tö cha, Kūöyòh? Asuh ap tötlöök fālen Ò? Ṙūönyôre pöri cha-a nö ngö ṙô, nö hūḵa, Harāten Ò.

¹⁵ Ngaich Pailĕt nö ṙānyen Pārapas nö in cha, pò ò nö hòṅ hakô-ònglōn yik tömaṙôngö; ngaich kēten Yēsū nö harātu, tö kinheūṅtö tī ò nö fōhan.

Hayëngen Yēsū Yik Kumyung

¹⁶ Ngaich yik kumyung nö hachōḵngen Ò nö latuhēt, el chūök mahayöng; ngaich havëtu yik kumyung tö hĕng kiteūm.

¹⁷ Hayūtan cha-a ngaich tö töngāvö mat. Sāt sapīöv Ò inrē, tö töchökhukūö; ngaich sumpīövlö e cha-a, nö i kui Ò.

¹⁸ Kētöre ngaich nö salāman, nö ngö ṙô, Salām, Rāchakūö Yahūti.

¹⁹ Fohtö kui Ò cha-a ngaich, nö aṅtītö ök tafūyö, kösngö elmat Ò inrē, simtö kuikinmônöre, nö salāman.

²⁰ Keuheūthëṙen ngaich cha-a nö hayëḵngen Ò, ngaich luhngö ök töngāvömat inyut Ò, ngaich hayutlen Ò tö nuk inyut Ò. Hachōḵngen Ò cha-a ngaich, nö harātu.

Harātu Ang Yēsū

²¹ Ngaich cha-a nö līpten ök tö hĕng tak chamööḵngöre nö in cha, nö keun ök töhakālö Ò, ang Sīmōn aṅ Kurēnī, ṙamā-ang tavat, yöng nāṅ Aleksantör, nāṅ Rūfös.

²² Ngaich kēten Ò cha-a nö i Kòlkòta, (ngam töngö manah, chūök kui kupah).

²³ Ngaich kē-ĕkūö Ò cha-a tö vāin, tö katēhĕ tö mūr, öt hōḵo e pöri Anga-aṅ.

²⁴ Harāten Ò ngaich cha-a; ngaich katölöre tö nuk hilā Ò, kalah taneūngenre tö u, tö kahëḵ ngòh tö hĕng tak.

²⁵ Machūötöre köṅny ṙô angu-ö tö peuheū, hē cha nö harāten Ò.

²⁶ Ngaich kūichiyö nö i kui Ò, nuk vine-eny fālen Ò, nö ngö Ngam Rāchakūö Yahūti.

²⁷ Nët tak nak tötūmu hol Ò nö harātu, hĕng tak lahāmö, hĕng tak latavē inrē.

²⁸ Ngaich keuheūtiṙen ṙô ngam töhet līpöre, töngö, Ngaich kaheuktu Anga-aṅ nö i tötlöök.

²⁹ Ngaich yik chamööḵöng nö ötlēkôre tö Ò, kileung kuire nö ngö ṙô, Ā, Me-eṅ tumṙōlngö ngam töhet chūök ngaich vi-il e Öm höng lūöi sumkam;

³⁰ Hayöökenre Man yēḵ; yônti, ṙā-ang rōi ngam töhakālö.

³¹ Ngaich inrē yik mākūö kūönṙô nö hayëḵngen Ò, nö in re, tö yik kamūich; nö ngö ṙô, Hayööken tahëng An; öt kô Anga-aṅ nö hayöökenre!

³² Hökngen Kristū, ngam Rāchakūö Israĕl, nö yônti töngamuh, nö ṙā-ang rōi ngam töhakālö; hòṅ hī meuk, ṙātö ellōnre inrē. Sumrōngngökūö Ò inrē nak töharātu nö hol Ò.

Kapah Ang Yēsū

³³ Hē ngam tö nët sīön köṅny ṙô, söl im tö lūöi köṅny ṙô ök sinngūlö nö keuheūtngöre chūök nö ip panam.

³⁴ Ngaich im tö lūöi köṅny ṙô Yēsū nö pōitô, nö ngö ṙô, Ēli, Ēli, lāma sapaktānī; ngam tö ngö manah, Tēv Chu, Tēv Chu, kūöyòh Öm ṙāngen Chu?

³⁵ Rēvre yik mi-i yik töng sökhaka, tö ngö ṙô, hē cha nö hāngö e, Yĕh meuk, havëken Ēlaicha An.

³⁶ Ngaich hĕng tak ök famaltöre, ngaich kasumtö ök ṙòng ihong nö ik töhikīölhu vāin; ngaich lòktö e nö i kūö ök tafūyö; ngaich kē-ĕkūö Ò nö ôkö e, nö ngö ṙô, Ngösin, töi ngëcha yē Ēliaicha min nö yih, nö kēten Ò.

³⁷ Ngaich Yēsū nö pōitô, ngaich kēngö nômöre.

³⁸ Ngaich ök tananglö ël ök töhet chūök nö nët tit nö takaich, löktökūö lātulöng, söl lātaṙeūḵ.

³⁹ Ngaich hē ök yöngṙen kumyung nö meūkan nö ngatī kinpaha, ök töng samökhak nö ranghen Ò; ngaich ngö ṙô anga-an, Kô Ön ngòh tarik nö Kūön ngam Tēv.

⁴⁰ Kikānö yik umuh inrē, töng marôvat nö meuk; in cha hēḵ Mariā aṅ Mektelā, Mariā ök yöng Yāköp tökūöṅnö, yöng Yôsĕs inrē, hēḵ Salōmī.

⁴¹ Yik tamömrit Ò, hē Ò nö i Kelelī, meukṙen Ò inrē; maṙôngö yik tahëng kikānö, hamòlröön Ò nö yih nö i Yerūsalem.

Inulngö Yēsū

⁴² Hē e nö ngaich nö harap, pò e nö inlēnken nö sakāmö, urēhĕkūö ngam töhet sakāmö;

⁴³ Hĕng taka ök yamihtöre, ang Yôsĕf aṅ Arimataya, kamhôṅka ök nö tökôlò, mameūkkö ngam pūlngö ngam Tēv inrē, chuh in Pailĕt anga-aṅ, nöng öt pa-ekūö; ngaich havëkö ök alaha Yēsū.

⁴⁴ Uṙeh alaha ang Pailĕt tö Ò nö ngaich nö kapah; ngaich havëtö ök yöngṙen kumyung, hatönan ngaich, yē Ò nö rĕh rô-angen nö kapah.

⁴⁵ Ngaich hē ò nö akahalōn tö e, kūö ṙô ök yöngṙen kumyung; kētö ök alaha anga-aṅ ngaich, nö in Yôsĕf.

⁴⁶ Ngaich anga-aṅ nö havah hilā; kēten Ò ngaich, ngaich haṙūngan nö el hilā; ṙāten Ò ngaich nö el anūlö, ök töhulhötvö nö el ihong. Pilëôngtö ihong anga-aṅ nö i kūö ök anūlö.

⁴⁷ Meuk chūök ṙinātö Ò, nāṅ Mariā aṅ Meketelā, nāṅ Mariā yöng Yôsĕf inrē.