T. MĀKÖS 14 - TÖHET LĪPÖRE (Re-edited) Bible (BSI)

Inkīkö Yēsū

¹ Unôichrit tö nët sumkam ngam Paska Töt aföhlöng Ròtī.

² Ngaich yik mākūö kūönṙô, yik kamūich inrē, nö chöh inlahenre nö kē an nö ulāikenre, ngaich fëlngen Ò. Pò cha nö ngö ṙô, Un hē el paratīn, tön lohten min nö taṙōlaṙen yip tarik.

Hachāmökūi Yēsū Nö I Petenī

³ Ṙòngmö i Petenī Anga-aṅ, nö i patī Sīmōn, ök töyeūnyu, ngaich hē Ò nö ūichhak nö nyā; hĕng tak ngaich ök kikānö tö hēngö kum tö ihong pilön tötahūsa töpōi ṙāi. Likuknyökūö e ngaich anga-aṅ; ngaich ṙöhtö e nö i kui Ò.

⁴ Rēvre yik umuhtö ngö ṙô tö höö, nö i kumnyahlōnre, Asuh ap minëchngö ngam tötahūsa?

⁵ Inyihyö an öre yih, ngaich kô-òren nö lūöyòng ṙāi tö rupīö; ngaich kētu nö i yāich. Ngaich cha-a nö uyëken ò,

⁶ Ngaich ngö ṙô Yēsū, Hökngen ò; kūöyòh öi vëken ò? Tölöökö la-en an nö in Chu.

⁷ Tö-örheūheu yin vē yāich nö holtöṙah yīö; ngaich kô-òren yī-ö haṙūötken cha, yē öp hē lōn yīö. Rö-ö pöri yī-ö örheūheu īnu tö Chu.

⁸ Tö teūngen an ip tölngöre. Mu-urĕhtö tīre an nö fòh alaha Chu, tö ngam i nulngö Chu.

⁹ Tökô-ò ṙô Chin tö yīö, ip chūök ngih tölöök inhānga min nö ahangka, i në taṙòkhöre panam, ngaich ngam tī ngòh kikānö min nö eūka nö inköpkölōn tö ò.

Hō, Yūtā Nö Kēngen Yēsū

¹⁰ Ngaich ang Yūta Iskaryôt, öt töhĕng tak aṅ i yik tö nët sīön, nö chuh i yik mākūö kūönṙô, pòn hòṅ kēten Ò anga-aṅ, nö in cha.

¹¹ Ngaich hē cha nö hāngö e, ngaich ṙāmölōn cha-a; ngaich kilēḵngôre nö kē-ĕkūö ò tö rupīö. Ngaich chöh öp tölöök ṙētakre anga-aṅ nö kēten Ò.

Holkūö Yik Mahaköp Ang Yēsū Nö Nyā Ngam Pāska (Chinööḵngö)

¹² Im raneh sakāmö ngam Tötaföhlöng Ròtī, hē cha nö fëlngö ngam Paska, ngaich ngö ṙô yik haköptö Ò, Isuh lōn Öm tö ih halēna, hòṅ Meh nyā ngih paska?

¹³ Ngaich nët tak tahīnngö Anga-aṅ, tö aṅ i yik haköptöre, nö ngö ṙô tö cha, Kuṙòh, chuh im panam nan. Hĕng taka ap min tarik umuh, tamyukkö chūök mak, maheuṅkkūö nāṅ; tömrit ò panchö.

¹⁴ Yē öp töng chūök ò patī, nö kuhēthötre; ngaich ngö ṙô nā-aṅ töp töpatī-ivö, Ngö ṙô ap Mahaköphöti, Isuh ap lööṙö yamih urôhò, chūök Chu nyā ngih paska, holtö vē haköptöre.

¹⁵ Ngaich anga-aṅ mīnö nö hameukhömat nāṅ, töp lātulöng tökiröng urôhò, tö ngaich nö lēn. In e panchö halēnö hī.

¹⁶ Kiröönngöre ngaich nak mahaköp, ngaich höng sā ṙô Ò kanôtökūö cha-a.

¹⁷ Ngaich im harap yih ngaich Anga-aṅ, nö holtö yik tö nët sīön.

¹⁸ Ūichngöre ngaich cha-a nö nyā; ngaich Yēsū nö ngö ṙô tö cha, Hĕng taka ap min tö yīö, kamëḵngen Chu, öp nyamā nö holkūö Chu.

¹⁹ Kaknyöre cha-a ngaich nö kö unôichrit höö ṙô, nö ngö, Chu-ö Chu.

²⁰ Ngaich ngö ṙô Anga-aṅ tö cha, Hĕng tak öp aṅ i yip tö nët sīön, öp anòngtö tī Chu nö el ngih töchilū nö kasumtö nya-aṅre.

²¹ Kiröönngöre Ön ngòh Kūön Tarik, sā kinūichngö Ò; tötkôlò pöri öp tarik, lökten Ò nö kē-ĕyö. Löök öp öre anga-aṅ tarik, yē ò nöng ötfötnyu.

Töhet Inmūlkūö

²² Ngaich hē cha nö nyā, kētam Anga-aṅ tö ròtī; keuheūthëṙen nö hakôlò e, ngaich fôkö e; ngaich kē-ĕkūö cha nö ngö ṙô, Euṅh, nyā-aṅ e yin; Alaha Chu an.

²³ Kētam Anga-aṅ tök kulah; keuheūthë ṙô nö ha-öiny ngam Tēv ngaich kē-ĕkūö cha; ṙòkhöre cha-a ngaich nö ôkö e.

²⁴ Ngaich ngö ṙô Anga-aṅ tö cha, Mahām Chu ön ngih, tufömngöre kinlēḵngô, tökitaktu tö pòkūö tömaṙôngö.

²⁵ Tökô-ò ṙô Chin tö yīö, Rö-ö Chin min hēk òk ṙòng vāin, hanöng saha ngam sakāmö hē chu min òk tufömngöre im pūlngö ngam Tēv.

²⁶ Keuheūthë ṙô cha-a nö tikökṙôre, kunyī-inyre ngaich, nö i kui ök Rôngö Òliv.

Vënyen Pītör Ang Yēsū Min Nö Mahngen Ò

²⁷ Ngaich Yēsū nö ngö ṙô tö cha, Ṙòkhöre yin min ṙāngenre; pòn ngö kinūichngö, Fël öp yōm pököre chin min; ngaich parāti min në pököre.

²⁸ Unôichrit chanôhòl Chu pöri, chuh Kelelī Chu-ö min, urēhĕkūö yīö.

²⁹ Ngö ṙô pöri ang Pītör tö Ò, Pòrô min nö ṙòkhöre nö ṙāngenre, hö-ö pöri chu-ö.

³⁰ Ngaich Yēsū nö ngö ṙô tö ò, Tökô-ò ṙô Chin tö meh, tö meh ing tötaheui, i ngih hatööm, urēhĕkūö ṙô hayöm nö nët vīöl ṙô nö takeūk, lūöi heuh min me-eṅ mahngen Chu.

³¹ Ngëḵeṅ ṙô pöri anga-aṅ, nö ngö ṙô. Pòrô chu-ö kapah hol Meh, sön öich öt hētu mahngen Meh. Ngatī ṙô cha-a inrē nö ṙòkhöre.

I Ketseminī Nö Vë-ekūötēv Ang Yēsū

³² Chalô cha-a ngaich nö ip panô-òṅ, Kĕtsemenī mine-eny; ngaich ngö ṙô Anga-aṅ tö yik haköptöre, Ūichngöre yin ihih, töich ve-ekūötēv sin.

³³ Ngaich ngô-òṅ hēḵ Pītör Anga-aṅ, Yāköp, Yôhan inrē; kētöre ngaich nö pōyen ranöingö alaha, ane inrē kanihngen ellōn,

³⁴ Ngaich ngö ṙô Anga-aṅ tö cha. Hòṅ kapah Chin, tö ṙôkö miṙivlōnre. Ngöhören yin ihih; aṅhaṅti inrē.

³⁵ Rĕh rô-òlkūö Anga-aṅ nö kiröönngöre, afukngöre ngaich nö el tumlat; ngaich ve-ekūötēv, yĕn kô ngam ṙētak nö chööḵngen Ò.

³⁶ Appā, Kayöngö, ngö ṙô Anga-aṅ; taṙòkhöre nun nö tökô nö in Meh; kēḵngö ngih kulah Man yēḵ, nö ṙā-ang in Chu. Uh pöri yēḵ nö sā lōn Chu; sā ngam lōn Meh pöri.

³⁷ Yihtöre Anga-aṅ, ngaich kôtökūö tö cha nö haṙòh. Ngaich ngö ṙô tö Pītör, Sīmōn, haṙòh ömeh? Öt kô ömeh höng hĕng köṅny ṙô rô-òten aṅhaṅtī?

³⁸ Aṅhaṅti yin, ve-ekūötēv inrē, hòṅ yīö öt im kanihngen. Hōḵ takô ön ngòh ma-alaha; öt kalēḵ pöri ngih alaha.

³⁹ Kiröönngöre Anga-aṅ hēk; ngaich ve-ekūötēv, nöng hĕngre ṙô.

⁴⁰ Yihtöre hēk, ngaich kôtökūö tö cha nö haṙòh; pò cha nö öt manlaklen mat. Ngaich nöng öt huveū-eu ṙô cha-a, nö sapṙô Ò.

⁴¹ Ngaich yihtöre Anga-aṅ im linūöi heuh, ngaich ngö ṙô tö cha, Heūheure yin; iṙuhö mat haṙòh. Ngaichchö; sölta an ngam ṙētak nö ngaich, Yĕh meuk, ngòh Kūön Tarik nö kē-ĕyö nö eltī tököölö fālen.

⁴² Choholre; ta-a, töi ngaich kiröönngöre. Yĕh meuk, ngòh kamëḵngen Chu nö röhta nö ngaich.

Kinë-e Yēsū

⁴³ Öt vīngen ang Yūta nö yih, i saha ṙô Ò nö ṙô-òv, tö hĕng tak aṅ i yik tö nët sīön; maṙôngö yik hol ò inrē, tösanëtu, tinkūngu inrē, ṙamā-ang yik mākūö, kūönṙô, yik kamūich, yik yöngṙen inrē.

⁴⁴ Ngaich ök kamëḵngen Ò, nö halēnngö minkahtökūö, nö ngö ṙô, Öp töng ahāmkūö chu min, Anga-aṅ Ap min; kēḵ an ngaich, hachōḵngen Ò, köptī

⁴⁵ Chalô anga-aṅ, ngaich iṙūö yihtöre nö in Ò, ngaich ngö ṙô, Rappi; ngaich hāmkūö Ò.

⁴⁶ Kētötīre ngaich cha-a tö Ò, ngaich kēḵngen Ò.

⁴⁷ Ngaich hĕng tak tö yik töng sökhaka, hamôknyö sanëtre, ngaich fël ök mahalanṙen mākūö kūönṙô ngaich fangngö nang ò.

⁴⁸ Ngaich Yēsū nö ngö ṙô tö cha, Yih öyih, öi sā kamëḵ tötūmu, öi sanëtu, tinkūngu inrē, öi kē-ĕ Chu.

⁴⁹ Öt hĕng hang sumkam Chin in yīö, haköphöti el ngam töhet chūök; ngaich rö-ö yī-ö kē-ĕ Chu. Kinheūṅtngen ṙô minë līpöre pöri, ngih.

⁵⁰ Ṙòkhöre cha-a ngaich nö ṙāngen Ò nö falngöre.

⁵¹ Ngaich hĕng tak ök ṙāl tarik tamömrit Ò; tö kinṙūmu tö hilā, töt inyūtu alaha. Ngaich kēḵ an cha-a.

⁵² Ṙā-ang anga-aṅ tök hilā, ngaich falngöre, nöng öt aṅhav alaha.

I Kūö Kamhòṅka Ang Yēsū

⁵³ Ngaich cha-a nö kēngen Yēsū, nö ik mākūö kūönṙô; ngaich hamūlöre nö ṙòkhöre yik mākūö kūönṙô yik yöngṙen, tö yik kamūich inrē.

⁵⁴ Ngaich Pītör nöng tömkörit Ò nöng marôvat, söl latuhēt nö el patī ök mākūö kūönṙô. Ūichhaka anga-aṅ ngaich nö i yik tösökhaka; nö hameūyöre nö i kūö tameūyö.

⁵⁵ Ṙònghöichṙen yik mākūö kūönṙô, ṙòkhöre yik kamhôṅka inrē, nö chöh vamënyen Yēsū; pò cha nö hòṅ kumpahan. Ngaich öt kôtökūö cha-a.

⁵⁶ Maṙôngö yik vamënyen Ò; ngaich pöri nuk ṙô cha nö öt hōḵen höö.

⁵⁷ Ngaich rēvre yik samöklöre, vamënyen Ò, nö ngö ṙô,

⁵⁸ Hang ṙô Ò in īhö, nö ngö ṙô, Tiṙōlngö ngih töhet chūök Chin min, ngih vahī-il kuntī; ngaich höng lūöi sumkam tī Chu-ö min mānlö öp tahëng tötvahī kuntī.

⁵⁹ Ngaich öt rēhĕn nuk ṙô cha nö hōḵen höö.

⁶⁰ Söklöre ngaich ök mākūö kūönṙô nö ellōn; ngaich hatönö Yēsū, nö ngö ṙô, Öt ṙahônyu Ömeh? Asuh ön në ṙô vē tö Meh?

⁶¹ Öt ṙô-òvö pöri Anga-aṅ; öt sapṙô cha inrē. Hēk ök mākūö kūönṙô nö hatönan, nö ngö ṙô, Me-eṅ Öm Kristū, Öm Kūön ngam Tökôlò?

⁶² Ngaich ngö ṙô Yēsū, Chu-ö Chini. Meuk ngòh Kūön Tarik yin min nö ūichhaka nö lahāmö ap kanôlò, ngaich yih nö löktö el taṙul.

⁶³ Ngaich ök mākūö kūönṙô nö tikaichngö ök aṅ ël inyutre; ngaich ngö ṙô, Iṙôktöre lōn öi tö vame-eny?

⁶⁴ Hang ṙô Ò yin ngaich, nö öt lēḵkôre. Sitih lōn öi? Ngaich ṙòkhöre ṙô cha-a tö Ò, nö tö hòṅ kumpaha.

⁶⁵ Ngaich rēvre yik kamösngö elmat Ò; nyëkngömat Ò inrē, ngaich ngö ṙô tö Ò, Ve-eny Man. Ngaich yik tösökhaka inrē nö fōhan.

Mahngen Yēsū Ang Pītör

⁶⁶ Ngaich pītör nö i taṙeūk nö el urôhò; hĕng tak ngaich ök mahalanṙen mākūö kūönṙô kikānö, nö yihtöre;

⁶⁷ Ngaich meūkö Pītör anga-aṅ nö hameūyöre; hatīönken ò ngaich, ngaich ngö ṙô; Me-eṅ man inrē hol ngam aṅ Nāsaret, ang Yēsū.

⁶⁸ Mahangre pöri anga-aṅ, nö ngö ṙô, Öt akahakūö chin; öt rēhĕn öich akahalōn tö ṙô meh. Kunyī-inyre ngaich anga-aṅ nö i kūö ök urôhò. Ngaich takeūk hayöm.

⁶⁹ Ngaich ök kikānö mahalanṙen nö meūkan, kaknyöre hēk nö ngö ṙô nö i yik töng sökhaka umuh, Tö hĕng tak ön ngòh aṅin cha.

⁷⁰ Hēk pöri anga-aṅ nö mahangre. Rĕh rô-òten hēk yik töng sökhak umuh nö ngö ṙô tö Pītör, Kô man me-eṅ tö hĕng tak aṅin cha; pò meh aṅ Kelelī, ngatī ëlô man inrē.

⁷¹ Kaknyöre pöri anga-aṅ nö rūtngövahre, nö chūöku ṙô inrē, nö ngö, Öt akahakūö chin tö ngòh tarik ngòh ṙô yīö.

⁷² Ilööṙen ngaich nö takeūk hayöm, im innët heuh. Ngaich fē-ĕlre ang Pītör tö ṙô Yēsū tö ò, nö ngö, Lūöi heuh man min mahngen Chu, urēhĕkūö tö nët köṅny ṙô hayöm. Peuiny ngaich anga-aṅ, hē ò nö afēken u.