T. MĀKÖS 11 - TÖHET LĪPÖRE (Re-edited) Bible (BSI)

Ha-öinytu Yīhi Nö I Yeruselem

¹ Ngaich hē cha nö röhta nö i Yerūsalem, nö i Petfēkē, Petenī inrē, i kui ap Rôngö Òliv; nët tak tahīnngö ngaich Anga-aṅ, tö mahaköp;

² Ngö ṙô tö cha Kūṙòh; chuh im tuhēt nan, ngam i kūö nāṅ, iṙūö kôtökūö nan min tap tö kapòkhak kūön köttö, tö kunhēthöt nāṅ in e; öp tö öölu nö ūichka uk tö tarik. Luhlen ò, ngaich kēten ò.

³ Ngaich yĕn hĕng tak min tö ngö ṙô tö nāṅ, Kūöyòh an ngatī? Ngö ṙô panchö, Hòṅ īnu öp Mā tö ò; ngaich ilööṙen min anga-aṅ nö tīnten ò nö ihih.

⁴ Kiröönngöre ngaich cha-a, ngaich kôtökūö tök kūön köttö, nö kapòkhak nö i kūö inkūp, elkahôyö, nö el talöökö. Luhlen ò cha-a ngaich.

⁵ Ngaich yik töng sökhak nö ngö ṙô tö cha, Kūöyòh an luhlö ngam kūön köttö?

⁶ Ngaich cha-a nöng sā ṙô Yēsū nö kilēḵngen cha, ngaich hökiṙen cha-a nö kiröönngöre.

⁷ Kētö ök kūön köttö cha-a ngaich, nö in Yēsū, ngaich haṙĕhtö uk ò tö nuk hilā cha, Ūichlöre ngaich Anga-aṅ nö i uk ò.

⁸ Maṙôngö yik mahaṙĕhtö hilāre nö el talöökö haṙĕh törōi chōn yik inrē, nuk ṙahal cha nö el-inchōn.

⁹ Ngaich yik mu-urĕh, yik mu-unôich inrē, nö hūḵa, nö ngö ṙô, Hōsanna, tökôlò An ngam yamih nö, i Mine-eny ngam Mā Tēv.

¹⁰ Tökôlò an ngam yamih pūlngö ngam yöng hī Tāvit, Hōsanna, nö lātulöng.

¹¹ Kuhēthötre ngaich Anga-aṅ nö i Yerūsalem; ngaich kuhēthötre nö ël ök töhet chūök. Ngaich havīngömatre Anga-aṅ nö ngëichkö tökeuheūttöre, hòṅ harap angū-ö nö ngaich; kunyi-inyre ngaich Anga-aṅ, holtö yik tö nët sīön tak, nö chuh Petenī.

Ötlēkôre Yēsū Tök Anchīr Chōn

¹² Ngaich im huṙöich, hē cha nö yih nö ṙā-ang Petenī, kapahare Anga-aṅ.

¹³ Ngaich hĕng māṅ ök anychīr chōn, tömeūkö nö marôvat, nöng rōyuvö; yihtöre Anga-aṅ ngaich, lohten nö amahtuṙen nö kôtökūö tö ṙòng ò. Ngaich hē Ò nö ngaich nö sölta nö in ò, ngaich öt kanôtukūö, höng rōi. Pòn öl nö hē ṙòng anychīr.

¹⁴ Ngaich ngö ṙô Anga-aṅ tö ò, Töngamuhangen, söl môkö inrē örheūheu, öm öt nyā-aṅ ṙòng tö tarik. Hāngö e yik haköptö Ò.

Chuh El Ök Töhet Chūök Ang Yēsū

¹⁵ Chalô cha ngaich nö i Yerūsalem. Ngaich kuhēthötre Anga-aṅ nö el ök töhet chūök, ngaich ahōngö yik mahavah inrē, nö el ök töhet chūök. Kuringngö nuk mīs yik mahaṙīkö rupīö, nuk anūichö yik mi-inyih, yik mahavah inrē, nö el ök töhet chūök. Kuringngö nuk mīs yik mahaṙīkö rupīö, nuk anūichö yik mi-inyihkö nyö-öṅ inrē.

¹⁶ Öt halöngten tarik Anga-aṅ nö tayuk neū-euṅ nö lök ël ök töhet chūök.

¹⁷ Ngaich haköphöti Anga-aṅ nö ngö ṙô tö cha, Röh öng nö ngö kinūichngö, Patī chūök vine-eṅkūötēv invëka ap min, patī Chu, chūök vē taṙòkhöre tarik? Ngaich pöri yī-ö vītö e, nö kinluhu tötūmu.

¹⁸ Ngaich yik mākūö kūönṙô yik kamūich inrē, nö hāngö e; ngaich lukkö inlahenre cha-a nö fëlngen Ò. Pòn pa-ekūö cha-a tö Ò; pòn ṙòkhöre yik tömaṙôngö nö pingangkūö tök ṙô Ò inköphöti.

¹⁹ Haraptöre harap, kunyi-inyre ngaich Anga-aṅ, nö ṙā-ang el ap panam.

Töhaköpö Ṙamā-ang Im Anychīr Chōn

²⁰ Ngaich hē cha nö chööḵöng, tö peuheū, ngaich meuk ök anychīr cha-a nö löktö ṙĕhre nyanangngö.

²¹ Ngaich fēḵlen Ò ang Pītör, nö ngö ṙô, Rappī; yĕh meuk, ngam anychīr chōn nö nyangngö, ngam öthakôlò Meh.

²² Ngaich ngö ṙô Yēsū tö cha, Mikahav yin im Tēv.

²³ Tökô-ò ṙô Chin tö yīö, Ngòh tö ngö ṙô min tö ngih rôngö, Ateuklöng man yēḵ: ngaich fuk el mai, nö öt kintöngulōn, ṙātö ellōnre pöri, tö e min nö teungten; ngaich teūngen min anga-aṅ tö e.

²⁴ Lökten Chin ngö ṙô tö yīö, Nup tökeuheūttöre ṙô yīö ve-ekūötēv, have-a inrē; ṙātö ellōnre yī-ö, töre öi teūngen tö u ngaich teūngen yī-ö min tö u.

²⁵ Yē yīö söklöre ve-ekūötēv, aṙē-ĕl, yĕn hĕng tak öp töfāluṙen nö in yīö, hòṅ ngam Yöng yīö inrē, el halīöngö, nö aṙēlen yīö tö nup fālen yīö.

²⁶ Yē yīö öt aṙē-ĕl, öt rēhĕn min ngam Yöng yīö el halīöngö nö aṙēlö nup fālen yīö.

Intön Töre I Alaha Minë Minhôiyö La-en

²⁷ Chalô cha-a nö hēk nö i Yerūsalem. Ngaich hē Ò nö kiröönngöre nö el ök töhet chūök, ngaich yihtöre yik mākūö kūönṙô nö in Ò, yik kamūich, yik yöngṙen inrē.

²⁸ Ngaich ngö ṙô cha-a tö Ò, Asuh ap chöngö Meh, la-evṙen tö në? Achīö ap kamëḵ-eṅkūö Meh tö chöngö, Öm la-evṙen tö u?

²⁹ Ngaich ngö ṙô Ang Yēsū tö cha, Hĕng öp ṙô Chu Chu-ö inrē, hatönö yīö. Sapṙô Chu pöchö; ngaich Chu-ö min ve-eny nang yīö töp chöngö Chu, la-evṙen tö në.

³⁰ Ök vinôkö tī Yôhan, aṅ el halīöngö ök? Aṅ i tarik ṙöng? Sapṙô Chu.

³¹ Ngaich ve-ekūöre cha-a, nö ngö ṙô, Yē hī min ngö ṙô, Aṅ el halīöngö; ngaich ngö ṙô min Anga-aṅ, Kūöyòh pöri öi öt ṙātö ellōnre in ò?

³² Yē hī pöri min, Aṅ i tarik; ngö ṙô, pa-ekūö cha-a tö yik tarik pò Yôhan nö pròfĕt takô, tö lōn cha nö ṙòkhöre.

³³ Ngaich cha-a nö ngö ṙô, nö sapṙô Yēsū, Öt akahalōn in. Ngaich Yēsū nö ngö ṙô tö cha, Öt rēhĕn Chin chĕi Chu-ö hòṅ ve-eny nang yīö töp chöngö Chu, la-evṙen tö në.