T. MĀKÖS 1 - TÖHET LĪPÖRE (Re-edited) Bible (BSI)

Minkahaten Tö Yôhan Ök Vamôk

¹ Ranehnyö ngam tölöök inhangkö Yēsū Kristū, ngam Kūön ngam Tēv.

² Sā kinūichngö e tö yik pròfĕt. Yĕh meuk: tīntö ngam ma-ahānga Chin, nö urēhĕkūö Meh, ngam mahalēnkö talöökö Meh min.

³ Hĕng tak ṙô ap hamūḵa nö el-inchōn, Halēnkö talöökö ngam Mā Tēv yin; hachipkö kanröönö Ò.

⁴ Yih ngaich ang Yôhan ök Vamôk nö el-inchōn, ngaich mikahten tö ngam vinôkö invöötö ellōn nö inṙē-ĕl tökööl.

⁵ Ngaich chuh in ò nö ṙòkhöre yik aṅ panam Yūta, aṅ Yerūsalem inrē; ngaich vōkö cha-a tö ò, nö el ap tahël Yôtön, ve-eny tököölre cha-a.

⁶ Inyuttö sanôi ūṅt ang Yôhan; inmöpṙat tö uk inrē; nya-aṅkūö tö mufākö, tö pachāka inrē aṅ el-inchōn.

⁷ Ngaich ahānga anga-aṅ nö ngö ṙô, Hĕng taka öp yamih, tömötlö kanô-òṅ tö chu. Öt kô chin rēhĕn, sōntöre luhnyö rehen kunröpö Ò.

⁸ Aṅtī tö mak chin chu-ö vōkö yīö; vōkö yīö pöri Anga-aṅ min nö aṅtī tö ngam Töhet Fanöinylö.

Ngam Vinôk Tö Kui Tö Ngam Kinlāha Yēsū

⁹ Ngaich ik hē u anu-ö sakāmö, Ang Yēsū nö yihtöre, nö ṙā-ang Nāsaret ap i Kelelī; ngaich vōkö tö Yôhan, nö i Yôtön.

¹⁰ Ngaich meuk ngam halīöngö Anga-aṅ nö takaichköṅnykūö, ilööṙen tö maneutlö Ò nö, ṙā-ang el mak; ane inrē meuk ngam Töhet Fanöinylö nö teungtöre nö i kui Ò, sā nyö-öṅ.

¹¹ Ngaich hĕng ök ṙô lamöktö el halīöngö, tö ngö, Me-eṅ Man Kūön Chu, Öm hanāngenlōn Chu; in Meh Chin ṙāmölōn takô.

¹² Ilööṙen ngam Töhet Fanöinylö nö kēḵngen Ò nö el-inchōn.

¹³ Ngaich kalaha Anga-aṅ nö fën anāi sumkam, nö el-inchōn, tö Sātān. Holtöṙah tö chehechōn. Meukṙen Ò yik ma-ahānga.

Havëken Yik Töfëntak Kamëkāḵ Ang Yēsū

¹⁴ Keuheūthëṙen kine-eṅ ang Yôhan yihtöre ngaich Yēsū nö i Kelelī, ahangkö ngam tölöök inhānga aṅ im Tēv;

¹⁵ Nö ngö ṙô, Ngaich an ngam ṙētak nö teungta; röhta an ngam pūlngö ngam Tēv. Havöötö ellōnre yin; ṙātö ellōnre im tölöök inhānga.

¹⁶ Ngaich lök kūö mai Anga-aṅ nö i Kelelī; ngaich meūkö nāṅ Sīmōn, nāṅ Antaru, ök kahëm Sīmōn, nö kavalngö inhāṅl nö el mai; pò cha nö yōm kine-eṅ kāk.

¹⁷ Ngaich Yēsū nö ngö ṙô tö cha, Ta-a, tömrit Chu nan; töich vīten nāṅ kamëḵ tarik, nö kāḵ.

¹⁸ Iṙūö ṙāngö nuk inhāṅlre cha-a, ngaich tömrit Ò.

¹⁹ Rĕh rô-òlkūö Anga-aṅ, ngaich meūkö Yāköp ök kūön Sepetī, tök kahëm ò inrē Yôhan, nak me-el kupòk nö ngattit inhāṅlre.

²⁰ Ngaich havëken cha Anga-aṅ. Ṙā-ang cha-a tök yöngre Sepetī, nö el kupòk, hol tö yik kamūönkūö; ngaich kiröönngöre, nö tömrit Ò.

Ök Tarik Tö Aṅhav In Tö Sī-ö

²¹ Ngaich chuh i Kafarnahum cha-a. Kuhēthötre Anga-aṅ ngaich nö el chūök vine-eṅkūötēv, nö haköphöti, hē el töhet sakāmö.

²² Ngaich cha-a nö pingangkūö tö ṙô Ò nö haköphöti; pòn haköpten cha Anga-aṅ, nö sā töchönguvö, öt sā yip kamūich.

²³ Hĕng taka ök umuh tarik el chūök vine-eṅkūötēv cha, tö sī-u aṅ in hūḵa anga-aṅ.

²⁴ Nö ngö ṙô, Asuh Öm Me-eṅ in ih, Me-eṅ Yēsū aṅ Nāsaret? Yih Ömeh Öm öthakôlò ih? Akahakūö chin tö meh; töhet Man aṅ im Tēv.

²⁵ Ngaich Yēsū nö vëken ò, nö ngö ṙô, Ṙāngôre mana; kunyī-inyre, ṙāngen ò.

²⁶ Ngaich ngam tötlöök sī-ö nö hangīhire tī tö ò, ngaich pōitô nö hūḵa; ṙāngen ò ngaich.

²⁷ Ṙòkhöre cha-a ngaich nö uṙeh; ngaich hatönöre, nö ngö ṙô. Asuh öng angu-ö? Tufömngöre inköphöti! Holtö chöngö An nö tölṙô më tötlöök sī-ö; ngaich hang ṙô Ò cha-a.

²⁸ Ngaich ngam hināngö Ò, nö iṙūö sölngö i nup taṙòkhöre panam i Kelelī.

Pōyen Halanken Ang Yēsū

²⁹ Ilööṙen tö kunnyī-iny cha, nö ṙā-ang el ök chūök vine-eṅkūötēv; yihtöre cha-a ngaich nö i patī nāṅ Sīmōn, nāṅ Antaru, nö holten nāṅ Yāköp nāṅ Yôhan.

³⁰ Ngaich ök yöng pīhö Sīmōn nö hulalhaka, nö vūöi; ngaich iṙūö ve-eny nang Ò cha-a tö ò.

³¹ Yihtöre ngaich Ang Yēsū, ngaich kēḵ kël ò; hachohlen ò ngaich, Ṙāngen ò ngaich ngam anūöyö, ngaich meukṙen cha anga-aṅ.

³² Ngaich im harap, tö maneuttö ngam tavūöi, kētö yik taṙòkhöre tövahavö cha-a, nö in Ò, yik tö sī-u aṅin inrē.

³³ Ngaich ṙòkhöre yik aṅ ngam panam nö hamūlöre nö i kūö inkūp.

³⁴ Ngaich maṙôngö halanken Anga-aṅ, tö yik tö ṙōlkangen in vah; maṙôngö ahōngö tö sī-ö inrē. Öt halöngten yik sī-ö Anga-aṅ nö ṙô-òv; pò cha nö akahakūö tö Ò.

Mikāhaten Yēsū nö i Kelelī

³⁵ Ngaich im peuheū, ṙôngmö sangūla, choholre Anga-aṅ, kunyi-inyre ngaich; ngaich kiröönngöre nö chuh el-inchōn; in e ngaich nö ve-ekūötēv.

³⁶ Ngaich Sīmōn nö tömrit Ò, tö yik hol ò inrē,

³⁷ Kôtökūö ngaich cha-a tö Ò, ngaich ngö ṙô tö Ò, Chöhö Man tö taṙòkhöre.

³⁸ Ngaich ngö ṙô Anga-aṅ tö cha, Ta-a, töi chuh i tahëng tö röhta panam, hòṅ Chu mikahaten in u inrē. Tön angu-ö an lökten Chu yih.

³⁹ Ngaich chuh el chūök vine-eṅkūötēv cha Anga-aṅ, nö keuheūt nö i Kelelī, mikahaten, ahōngö sī-ö inrē.

Halanken Ök Hěngtaka Tarik Ang Yēsū

⁴⁰ Ngaich hĕng tak ök töyeūnyu yamihtöre nö in Ò, nö ve-ekūö Ò, nö ngö ṙô, Yē Meh öre hōḵ, ngaich kô-òren Me-eṅ löökentī tö chu.

⁴¹ Hateutnyö këlre ngaich Anga-aṅ, nö i miṙēlōnre, ngaich lūölken ò, ngö ṙô tö ò, Hōḵ Chin; lööken man yēḵ ngaich.

⁴² Iṙūö ṙāngen ò ngaich ök yeūnyö; ngaich lööken anga-aṅ.

⁴³ Ngaich kësô Anga-aṅ nö tölṙô ò ngaich tīnngörit ò;

⁴⁴ Nö ngö ṙô tö ò, Mah; uh man rahëchyen ṙô i tarik. Kiröönngöre pöri kuṙòh, me-eṅ; hameuktöre ip kūönṙô, ngaich kētö tökētuvö tökūö lanööken meh, ap hachöngten Môsös,, nö inmeukhöti nö in cha.

⁴⁵ Kiröönngöre pöri anga-aṅ, kaknyöre ngaich nö ahangkö e, nö pirātngö chūök e; ngaich Yēsū nö öt kô nö hangāṅlkenre nö kuhēthötre nö i panam; höng lā-uk nö el-inchōn. Keuheūttöre lā-a lökta cha-a ngaich nö yihtöre nö in Ò.