T. LŪKÖS 1 - TÖHET LĪPÖRE (Re-edited) Bible (BSI)

¹ Pòn maṙôngö yik tö ngaichtī nö kūich inlahen nuk töngaichngen kinheūṅti nö in hī.

² Nup kahëtö cha nö in hī, yik mu-urĕh mameūkö u, ane inrē mumkahten;

³ Tölöök an, tö lōn chu inrē, öich töṙēmen mahaköp i ranëhel u, öich kūich tö līpöre meh, tölngö tö-akaha Tē-òfilös;

⁴ Hòṅ meh akahalōn tö nuk tökô-en inköptö meh.

Ahangka Kinyôḵnyi Ang Yôhān Ök Vamôk

⁵ Hĕng tak ök umuh kūönṙô, hē Hērôt nö rāchakūö panam Yahūti, Sakariā ök minënyö ò, lamā in Apīcha; pīhövö öku tö yik kūön Āròn, Ēlisöpet ök minënyö ò.

⁶ Nëtre taka cha-a nö tölöök nö i kūö ngam Tēv, ötfāluṙen tö töchōich; lök i nup chöngö, ane inrē nup la-en ahōtö ngam Mā Tēv.

⁷ Öt kūönu cha-a, pò Ēlisöpet nö tötmikūönlö; ngaich cha-a nö nëtre taka nö köiny.

⁸ Ngaich nö ngö inlahen, hē ò nö ṙònghöichṙen tök la-en ò nö kūönṙô, nö i kūö ngam Tēv, ik hēre;

⁹ Sā falngen la-en vē kūönṙô, anga-aṅ nö kuhēthötre nö ël ök töhet chūök ngam Mā Tēv: nö föng tötahūsa inrē.

¹⁰ Ngaich më tömaṙôngö tarik nöng vë-ekūötēv nö elkahôyö hē ël finöngö nup tötahūsa.

¹¹ Ngaich hĕng taka ök ma-ahānga tömeūkö tö ò, aṅ im Mā Tēv, nö sökhaka lahāmö ök chūök finöngö tötahūsa.

¹² Röiyö alaha ang Sakariā tö matre nö meukkūö ò, ngaich nö pa-ekūö inrē.

¹³ Ngö ṙô pöri tö ò ngam ma-ahānga, Um pa-ekūö Sakariā, tön hāngö ap ṙô meh ve-ekūöm tēv; kūönu ap min pīhö meh ang Ēlisöpet, Yôhan ap min minënyö ò.

¹⁴ Ṙanāmulōn man min; maṙôngö min inrē yip töṙāmölōn tö finötnyö ò.

¹⁵ Pò ò min nö töpōyö nö i kūö ngam Mā Tēv. Öt òk vāin ap min, ötrēhĕn nö òk ayëṅ. Tööḵlö ap min inrē tö ngam Töhet Fanöinylö, nö ṙā-ang ellōn ngam yöngre.

¹⁶ Maṙôngö min yip kūön Israĕl mahavantöre nö im Mā, ngam Tēv cha.

¹⁷ Lök kūö ngam Tēv ap min, nö sā inlahen Ēliya, im fanöinylö, im kanô-òṅ inrē; nö havantö ellōn yip yöng nö i yip nyīö, ane inrē yip tö-akaha; nö halēnken vē tarik, pòkūö ngam Mā Tēv.

¹⁸ Ngaich ngö ṙô Sakariā tö ngam ma-ahānga, Sitih mikahkūö öich min tö e? Tö chu ngaich öich köiny ngam pihö chu inrē nö sööḵngö tö ṙētöre.

¹⁹ Ngaich ngö ṙô ngam ma-ahānga nö sapṙô ò, Kēprīl chin kòl chu-ö, tösökhaka i kūö ngam Tēv. Ngaich öich tīntu öich ve-ekūö meh, ane inrē vë-eny nang meh tö në tölöök inhānga.

²⁰ Yĕh meuk, ngaich man min ötkô ṙô-òv, hanöng saha ap taneungtakūö u; pò meh öt ṙātö ellōnre i në ṙô chu, në töteūngen mīnö ip hē u.

²¹ Ngaich më tarik nöng hökken Sakariā; pingangkūö yik inrē hē ò nö ṙòngmö ël ngam töhet chūök ngam Tēv.

²² Kunyīhë anga-aṅ ngaich nö ötkô nö ve-ekūö cha; ngaich cha-a nö akahalōn tö ò nö meuk tötohtöre nö el ngam töhet chūök ngam Tēv. Höng iṙuhötī anga-aṅ nö fëikökūö cha; nöng ötkô nö ṙô-òvö.

²³ Ngaich hē nuk sakāmö kinheūṅten ò tö ök la-en ò, ngaich chuh patīre anga-aṅ.

²⁴ Keuheūthë angū-ö, ngaich Ēlisöpet nā röönngöre; ngaich taneui chumngëṅtö anga-aṅ nö hayunngöre, nö ngö ṙô,

²⁵ Ngati tī an ngam Mā Tēv nö in chu, töngamuh, nö ngëichtö kui chu, nö kēngö sumrōngkūö chu, i tarik.

Ahangka-Kinyôḵnyi Ang Yēsū

²⁶ Im tinfūöl chumngëṅtö, ngam ma-ahānga Kēprīl nö tīniyö nö ṙā-ang im Tēv, ip tö hĕng panam i Kelelī, Nāsaret ap mine-eny e;

²⁷ Ik rēlö tö mikahayö nö pīhö ök tö hĕng taka tarik, Yôsĕf ök mine-eny ò, lamökngörit Tāvit, Mariā ök mine-eny ök rēlö.

²⁸ Yihtöre anga-aṅ nö in ò ngaich ngö ṙô, Salām; me-eṅ tö-inlōntuvö; holtöṙah meh An ngam Mā Tēv; tökôlò man i tum tak vē kikānö.

²⁹ Hē ò nö meūkan, pōyen ranöiyö alaha anga-aṅ tö ngam ṙô; ngaich nö ngö lōn, tö sitih inlahen öngvö min ngih sinlāmö.

³⁰ Ngaich ngö ṙô ngam ma-ahānga tö ò, Um pa-ekūö Mariā; tön tö inlōntuvö man tö aṅ im Tēv.

³¹ Yĕh meuk kikōnyö öp fahötnyö meh min, öp pirūkö meh ellōn meh; Yēsū öp min mine-eny Ò.

³² Töpōyö öp min, ane inrē Kūön ngam Lamātulöng, invëkö Ò min. Kē-ĕvkūö öp min tö ngam Mā Tēv tö ngam kantēra ök yöng Ò, Tāvit;

³³ Hayöngken vē kūön Yāköp Öp min örheūheu; öt chanūhuvṙen min ngam pūlngö Ò.

³⁴ Ngaich ngö ṙô ang Mariā tö ngam ma-ahānga, Sitih öng min? tö chu öt akahakūö tö kikōnyö.

³⁵ Ngaich ngö ṙô ngam ma-ahānga nö sapṙô ò, Yih An min ngam Töhet Fanöinylö nö in meh; ane inrē ngam kanô-òṅ ngam Lamātulöng min nö hanyat tö kui meh; lökten min Öp töfötnyuvö, nö töhëtö invëka nö Kūön ngam Tēv.

³⁶ Yĕh meūkö Ēlisöpet, ap hanöngkisānö meh, pirūkö nyīö ap anga-aṅ inrē, nö i kanöinyöre; tinfūöl chumngëṅtö ò ön ngih öp tötmikūönlö ṙung tö ṙô.

³⁷ Pòn rö-övö nup ṙô ngam Tēv nö ötkanô-òṅvö.

³⁸ Ngaich ngö ṙô Mariā, Yĕh meuk ngòh kikānö kūön ngam Mā Tēv, Hökngen e yēḵ sā ṙô meh. Ngaich ngam ma-ahānga nö ṙāngen ò.

Chöhken Elīsöpet Ang Mëri

³⁹ Choholre ngaich ang Mariā, hē e, nö ka-eūinyen nö chuh ik panam i kui rôngö nö ip panam Yūtā.

⁴⁰ Kuhēthötre anga-aṅ nö el patī Sakariā, ngaich salāmö Ēlisöpet.

⁴¹ Höng hangtöre Ēlisöpet tö ṙô Mariā nö salāman; ngaich ök nyīö ellōn ò nö tisôköre; tööḵlö anga-aṅ tö ngam Töhet Fanöinylö;

⁴² Ngaich pōitô anga-aṅ nö ngö ṙô, Tökôlò man me-eṅ, i tum tak vē kikānö; ane inrē, tökôlò ap kūön meh ellōn meh.

⁴³ Sitih tal öng min nö in chu, tö ngam yöng ngam Mā chu nö yihtöre nö in chu.

⁴⁴ Höng hangtöre chu-ö tö ök ṙô meh salām, ngaich öp nyīö ellōn chu, nö tisôköre kūö ṙanāmölōnre.

⁴⁵ Tökôlò ön ngòh ṙamātö ellōnre; pòn hēṙu öp taneungtökūö nup ṙô ṙamā-ang i ngam Tēv.

Tikökkö Nöi-nyö Ang Mëri (Tinkökö Mëri)

⁴⁶ Ngaich Mariā nö ngö ṙô; Ha-öiny Ha-öiny ngam Tēv ön ngih nômö chu,

⁴⁷ Im Tēv Mahayööken chu nö ṙāmölōn ngòh ma-alaha chu.

⁴⁸ Pò Ò nö môktökui ngòh yāich kūönre kikānö; lökten nö tökôlòṙô tö chu min, yip mu-unôichngöre yanīhih tarik;

⁴⁹ Pò ngam takeuheūttöre chöngö nö pōihöltī tö chu: töhet an ngam Mine-eny Ò.

⁵⁰ I tumö yip töpa-ekūö tö Ò, ap neūkölōn Ò.

⁵¹ Hameuktö kumlēḵre An nö im këlre; yip mahakeūlen ellōnre ngaich nö pirātiṙen tö Ò.

⁵² Kē-ĕyö yip rācha nö el chūökre; hapōilöng pöri vē yāich.

⁵³ Vē tökapahare hatööḵöiṙen tö nup tölöök chehen; tīnirit tö Ò vē tökôlò nöng öt kūmuṙen;

⁵⁴ Hayööken Israĕl An, ngam kūön Ò;

⁵⁵ Pò Ò nö sā ṙôre, i yik yöng hī, köpölōn tö ap neūkölōn nö in Aprahām, i vē kūön ò inrē nöng örheūheu.

⁵⁶ Ngaich ang Mariā nö lūöi chumngëṅtö nö höngngöh nö in ò; ngaich havantöre nö ik patīre.

Kinyôḵnyö Yôhān Ök Vamôk

⁵⁷ Ngaich ök hē finötö Ēlisöpet, nö teungtökūö, ngaich kikōnyö ök nyīö fahötnyö ò.

⁵⁸ Hāngö anga-aṅ tö yik holre, hanöngkisānöre inrē, tö ngam Mā Tēv nö pōyen neūkölōn nö in ò, ngaich aholtö ṙanāmölōnre cha-a nö in ò.

⁵⁹ Ngaich hē ngam hinëvhör sumkam, yihtöre yik tö hòṅ tunyinyngö ök nyīö; ngaich hòṅ kaheūkan cha-a nö Sakariā, nö sā mine-eny ök yöngre.

⁶⁰ Ngaich ngö ṙô ök yöng ò kikānö, nö sapṙô cha, Röön ngatī Yôhānö invëka an min.

⁶¹ Ngaich ngö ṙô cha-a tö ò, Öt hĕng taka ap töngatī mine-eny, nö i yp hanöngkisānö meh.

⁶² Hatöntöre cha-a nö ik yöng ò kikōnyö, töp mine-eny ò nöng minkahngu tī.

⁶³ Have-eti anga-aṅ tö chūöktīre nö kūich; ngaich kūichhöti anga-aṅ nö ngö tī, Yôhan ap mine-eny ò. Ṙòkhöre cha-a ngaich nö pingangkūö.

⁶⁴ Ilööṙen ngaich ök elvāng ò nö löpnyörekūö tayōlköny ök litāk ò; ngaich ṙô-òvö anga-aṅ, nö ha-öiny ngam Tēv.

⁶⁵ Ngaich pa-ekūö yik tömaṙôngö ramanghen ò; ngaich hāngö anū-ö tö taṙòkhöre mi-iyöng ik rôngö panam i Yūtā.

⁶⁶ Ngān höng ellōnre lōn yik hamāngö u, nö ngö ṙô, Tösitih tal angvöh min ngòh? Pò ngam eltī ngam Mā Tēv nö i kui ò.

Ṙô Sakarīa

⁶⁷ Ngaich ök yöng ò Sakariā, nö tööḵlö tö ngam, Töhet Fanöinylö, ngaich ngö ṙô anga-aṅ, nö ṙô-òvö tö aṅ im Tēv;

⁶⁸ Tökôlò An ngam Mā, ngam Tēv Israĕl: pò Ò nö ngaich nö meukṙen, ane inrē ṙānyö vē tarikre.

⁶⁹ Hachohlö tö kalēḵ An inyööken hī i vē kūön ngam kūön ò, Tāvit;

⁷⁰ Sā ṙô Ò tö nuk ṙô yik töhet pròfĕt: nuk töha-ëhelen hē ranehlö ngih panam;

⁷¹ Inyööken i yip tökunyahaṅelmat; ane inrē i yip taṙòkhöre tösumrīk tö hī;

⁷² Mahameuktö neūkölōnre i yik yöng hī; ane inrē tö köpölōn tök töhet kinlēḵngô;

⁷³ Ngam ṙô Ò nö kilēḵngôre nö in Aprahām; ök yöng hī.

⁷⁴ Nö kē-ĕti, hòṅ hī ṙānyuvö, ṙā-ang eltī yip tökunyahaṅelmat tö hī: öt pinhëṅ-eṅvkūö öi lök nup la-en Ò.

⁷⁵ Im hanëtö, im ötmichūṙen inrē, i kūö Ò: i rô-òtö në sakāmö hī.

⁷⁶ Me-eṅ nyīö havëka man min öm pròfĕt ngam Lamātulöng; pò meh min öm urēhĕkūö ngam Mā Tēv, öm halēnken talöökö Ò;

⁷⁷ Ve-eny ngam inyööken i yip tarik Ò; inṙē-ĕl nup tökööl cha;

⁷⁸ Lökten im tölngö neūkölōn ngam Tēv hī; ngam lökten ngam hanātö nö meukṙen nö ṙā-ang lātulöng.

⁷⁹ Inhatlömat yip amūichhaka nö el sinngūlö im kinpaha; ane inrē inchōköröön hī el ngam talöökö kumchikṙen.

⁸⁰ Pōyö ngaich ngam nyīö, ngaich kalēḵĕ ellōn; ngaich höng iyöng el-inchōn anga-aṅ, hanöng saha inmeuktöre nö i yik Israĕl.