TAITÖS 3 - TÖHET LĪPÖRE (Re-edited) Bible (BSI)

Tinrīken Kristīön

¹ Fēḵlen cha, nö tumṙeūtöre tö mahayöng, yip töchöngu, nö hang chöngö, hīnöre nö i tölöök la-en.

² Un ötlöökuṙô tö tarik, un lā-alkūö, ṙēm, hameuktö yanāichö i tarik nö ṙòkhöre.

³ Tön töt akaha in ayī-ö misī, töminôṙô, hachīlö, ṙōlö lahök tö töchōich lōn, intööḵngen minyam inrē, iyöng i kumnyah elmat inrē, sunrīkhö, kö sumrīkhen höö.

⁴ Hē ngam neūkölōn ngam Tēv Mahayööken hī pöri nö meūkö,

⁵ Ngam hanāngenlōn Ò inrē nö lā i tarik, öt kūö la-en i lanöökö, nup tī hī, tön sā ap neūkölōn Ò nö hayööken hī, i sinöichlö tinfömlö finötnyi, ane inrē tinfömlö aṅ im Töhet Fanöinylö,

⁶ Ngam vahōknyö Ò nö i kui hī nö pōyen tī, lökten ngam Mahayööken hī Yēsū Kristū;

⁷ Halööklöngö lökten im inlōnti aṅ in Ò, hòṅ hī min vītu tö-amīnu sā ngam mineūka aṅ im tö-örheūheu-aṅ nômö.

⁸ Tökô-en an nö ṙô. Ngaich hōten meh chu-ö in u öm kalēḵĕṙô vë-eny u nö kô-en, öm ṙātö ellōnre, hòṅ cha yip ṙāmātö ellōnre nö im Tēv, nö ṙēmen nö kēkö kaha tölöök vahīṙen. Anū-ö nun në tölöök, tökôlò tī tö tarik:

⁹ Hakūnngö nup ṙô tötakaha intönö, inkaha lökngörit, lina-alkūö töng hòṅ mihôiṅhöre, linā-alkūö chööḵnyö töm chöngö, tön öt kanôlòvö tī nun anū-ö, chanök alaha inrē.

¹⁰ Hakūnngö ngam tarik, maharēvngöre unôichrit ngam raneh, innëtö inrē finë-el inlēnö;

¹¹ Akahngen tö ngatī nö halīpnyöre ellōn, köölö fālen inrē, ngaich öthakôlòre nöng kahngenre.

Inlēnö

¹² Yē chu min tīnten Artēmas nö in meh, kömayēḵĕ tö Tikikös, pītnyöre pömchö yih in chu i Nikōpòlis: tön in e chin ip laneūchö.

¹³ Ṙēmen kiröönngö röön Sēnas, ap mahaköptö chöngö, Apòlòs inrē nö im kinröönngö cha, hòṅ cha nö öt hēngö hanāten.

¹⁴ Hökngen yip tarik hī inrē nö haköptöre nö kēkö kaha tölöök vahīṙen nup töt ṙanāngen, hòṅ cha nö ṙônguvö.

¹⁵ Salāmö meh yin nö ṙòkhöre vē mī-in chu. Salāmö cha yip töhāngenlōn tö hī im mikah. Inlōnti yēḵ in yīö ṙòkhöre.