TAITÖS 1 - TÖHET LĪPÖRE (Re-edited) Bible (BSI)

¹ Töhakövö an Pôl tö ngam Tēv, ane inrē tanīnöṙô Yēsū Kristū, sā ngam ṙinātö ellōn yip katöllö ngam Tēv, ane inrē sā ngam inkaha ngam tökô-en, ngam tö sā lanöökö,

² I mineūkkö ngam tö örheūheu-aṅ nômö, ngam ṙô ngam Tēv nö kilēḵngôre misī töt chanūhuvṙen;

³ I nup ṙētak Ò pöri nö hameuktö nup ṙôre im inhānga, ngam tökētu nö in chu, sā chöngö ngam Tēv mahayööken hī;

⁴ Löö in Tāitös, ngam tökô-en kūön chu im ṙinātö ellōn taṙòkhöre: Inlōntī, lanāmö aṅ im Tēv ngam Yöng, Kristū Yēsū inrē ngam Mahayööken hī.

La-en Taitös Nö I Krětē

⁵ Angū-ö an chööḵnyö chu ṙāngen meh i Krētē, hòṅ meh halēntö nup töhāṅten, ane inrē vīlö mahaköphöti kö kö hĕng tak i tö hĕng elpanam, sā ṙô chu tölṙô meh:

⁶ Yĕn tarīku tötyô-òv fālen, tö hĕnglö tö pīhöre, kūönu tö ṙamātö ellōnre, yip töt fāluṙen nö i tinṙōlen, hēk töt fāluṙen tö tötṙanāpen.

⁷ Pòn ngòh Pisköp nö töt hòṅ yô-òv fālen, sā yōm nup aṅ im Tēv: öt hakeū chöngöre, öt ka-eūyö lanīnö, öt lamā-alkūö, öt töyal tö töt kôlò taneūngen;

⁸ Kētöre pöri nö i miṙūöt, tö hāngen tö lanöökö, öt saṙāki lōn, ötmichūṙen, het, haṙāttökūöre;

⁹ Ṙapkö ngam tökô-en ṙô, ngam tö sā ngam inköphöti, hòn kô ang nö ṙuhöl alaha nö im tölöök inköphöti: ngaich hameuktö minyôiny yip ma-ahôngöṙô.

¹⁰ Tön pōyen yip tarik ma-ahôhangen, töng kamhôka, mahachīl, mötlö tal yip aṅ i yip tö tunyīnyi;

¹¹ Yip tö hòṅ tilūpi elvāng, yip tarik tö keuheūtngöre tī nö tiṙōlngö tö hĕng mumtī-i, haköphöti tö nup sinôtöre, chööḵnyö tö nup tötkôlò taneūngen.

¹² Hĕng tak ap aṅ in cha kanahngen cha nö pròfĕt, töngö ṙô, Töṙahata yin vē aṅ Krētē tö örheūheu nö minyôinyaṅ, tötlöök nö töṙeūla, töṙahata, töpōivat.

¹³ Tökô-en nun anū-ö tö-eūka. Lökten man, kalēḵĕṙô vëken cha, hòṅ cha nö lööken nö im mikah,

¹⁴ Un hangihtöre tö nup minônṙô aṅ i yip Yahūti, chöngö tarik, yip mahavööngökūöre nö ṙā-ang im tökô-en.

¹⁵ Ṙòkhöre nun nö het nö i vē töhet; in cha pöri nö öt töhëtu yip töhachōichi nö ngaich, töt ṙamātö ellōnre inrē; nëtngöre pöri tö ap lōn cha, kuilōn inrē nö ngaich nö hachōichi.

¹⁶ Eūköre cha-a nö akahakūö töm Tēv; ngaich i nup la-enre nö mahngen Ò, tösōḵov, töminôṙô, samô-òṅ nup taṙòkhöre tölöök la-en.