Sòlòmön 8 - TÖHET LĪPÖRE (Re-edited) Bible (BSI)

¹ Ō sā mak alaha chu man öre in chu, öm töharuklöngö tö aṅteh öp yöng chu kikānö! Yē chu meuk kūö meh lā el kahôyö, ngaich hāmkūö meh öre chū-ö, ngaich öthō nö hĕng tak öre mumṙēngen chu.

² Ngaich chū-ö öre hachōten meh kēten meh inrē el patī öp yöng chu kikānö, el urôhò ò inrē öp kamyôḵnyen chu. Kē-ĕkūö meh öre chū-ö tö vāin òk meh tö tumhuslöng, öp mak ṙòng anār chu.

³ Ō el katòh kui chu ap öre lātavē kël ò, ngaich yūmö chu inrē öp lāhāmö kël ò!

⁴ Chūöku ṙô chin in yīö, Ō yī-ö kikānö aṅ Yērusalem hòṅ yīö öt haröthöl öt rēhĕn kilangkö hanāngenlōn i rò-òtö lōn e.

Tinfūölö Tinkökö Kikānö

⁵ Achīö ap anga-aṅ yamih nö ṙā-ang el tönyaṅlnyi, harônhaka nö im hanāngenlōn? Kilanglen meh chin elkatòh ap chōn ēpöl. In e öp yöng meh kikānö nö halöiny kinyôḵnyen meh nö halöinyöre.

Kikānö

⁶ Vīten chu sā inpanngö ellōn meh, sā inpanngö i kël meh; tön kalēḵ an ngam hanāngenlōn sā kinpaha, kumnyahlōn sā anūlö tötmilēḵ. Öp pinchôllökūö e pinchôlö tameūyö, tökalēḵ nö töhū.

⁷ Öt kô töpōyen mak nö hanyangngö kūö hanāngelōn, öt rēhĕn ṙanööingö nö kô nö hapökngen e. Yē öp tarik nö kētö kanôlòre el öp patī re nö ṙāi hanāngenlōn, ngaich angū-ö nö töng ahū-öyö öre.

Kanônyö ngam Kikānö

⁸ Hĕng tak öp kun kanānö ih, hö-övö ap nö tö tëhevö. Sitih inlahen tī öi min töp kanānö re? Ip sakāmö yē ò nö kakkaṙen?

⁹ Yē ò nö kinlōngö, vīlö rupīö ihö min i kui öp chūök kumyung in e; yē ò pöri nö inkūp, ngaich īhö min tangö e tö savaich sītör:

Kikānö

¹⁰ Kinlōngö chin chū-ö sā chūök chamônga inrē minë teh chu; ngaich chū-ö i mat ò sā töhĕng tak tökumtö lanāmö.

Kikōnyö

¹¹ I pē-alhamòn; ap panô-òṅ vāin Sòlòmön; hökiṙen ngaich öp panô-òṅ vāin nö i yip mahayōm; kö kētö ṙāi ṙòng u cha-a tö rupīö hĕng köiny tum tāk.

¹² Panô-òṅ vāin chu, kanahngen chu, lumnööṙö chu; Ō Sòlòmön, in meh nup yēḵ töhĕng köṅny, nëtòng inrē in yip yōm ṙòng.

¹³ Ō me-eṅ mi-iyöng el panô-òṅ hangihtöre yip nôlö chu tö ṙô meh töich hāngö e chū-ö.

Kikānö

¹⁴ Ka-eūyen hanāngen chu, öm sā kāsöl hēk ṙālö istôk i kui minë rôngö tötahūsa.