Sòlòmön 7 - TÖHET LĪPÖRE (Re-edited) Bible (BSI)

Kikōnyö

¹ Yöng vanāyö minë röön meh nö el hanīöt röön, Ō tösā ranī kikānö tarik alaha! Minë takeun meh tö milön sā yanöṅtö, vahī tö milichngen huneū-en.

² Ngam fun meh töchuvī töchilū pingāṅl töt hāṅten chūök kintēhĕ vāin. Aich meh sā töfônghak sāiny havīlöng tö lilī.

³ Minë tönët teh meh sā tönët nòng kūön, tumnëtö kūön kāsöl.

⁴ Likeun meh sā kanël elifan töchônghaka. Minë mat meh sā törūngö mak i Hespòn, i inkūp Patrappim. Ngam elmeh meh sā chūök chamông i Lepanön, môktökui Tamāskös.

⁵ Sapīövu ngam kui meh sā Kārmel, minë töpahīöya keūyö meh inrē sā inmëlö tö huring hilā; kô-òngvahtī töp rācha tökūö minë tölöiny keūyö.

⁶ Yöng vanāyö meh, Ō hanāngen, tölöökö mineūkö kikānö tarik alaha!

⁷ Sā lanöökö kachūr chōn man, minë teh meh inrē sā mupōkö ṙòng.

⁸ Hòṅ yônlö chin im kachūr chōn kētötīre inrē i pak ò. Mah, sā mupōkö ṙòng vāin nun minë teh meh, sā tinôngö ēpöl inrē unhôṅmö meh,

⁹ Sā öp tölngö vāin inrē ngam hināmökūö tö meh öp tölööṙen inôkö, nö meuthöt lökhöt i minuh tö kanap inrē.

Kikānö

¹⁰ Aṅ im hanāngen chin chū-ö, mī-in chu öp inrē lōn ò.

¹¹ Tā-a, hanāngen chu, tai chu el panô-òṅ, ngaich iyöng i tuhēt;

¹² Tā-a tai ka-euilökūö chuh el panô-òṅ vāin, ai ngëichkö nup vāin yēn meunylö, yĕn pöpnyörekūö nup ṙòng yĕn pöpnyörekūö inrē ṙòng anār, In e chū-ö min kētö hanāngen re in meh.

¹³ Taveūka nup chōn hanāngen, i kūö inkūp hī inrē nup ṙòng tö atöllöngö, tufömngöre hötṙeh inrē, nup hinöngken meh tö chu, Ō hanāngen chu.