Sòlòmön 3 - TÖHET LĪPÖRE (Re-edited) Bible (BSI)

¹ El chamam tö hatööm chū-ö chöh ap hanāngenlōn re; chöhan chū-ö, öt kôtökūö pöri tö ò; havëken ò chū-ö, öt sapṙô pöri anga-aṅ.

² Hòṅ chōholre chin ngaich öich kiröönngöre chuh elpanam, el talöökö el tölungāṅhaka inrē; hòṅ chöhan chin öp hanāngenlōn chu. Chöhan chū-ö, ötkôtökūö pöri tö ò.

³ Kôtökūö tö chu yip amahati, i saha cha nö kiröön im elpanam, Meūkan öm me-eṅ öp hanāngenlōn chu?

⁴ Öl chū-ö chööḵngen cha, hē chu kôtökūö tö ò öp hanāngenlōn chu. Haköpan chū-ö ngaich, öt halöngngen ò nö kiröönngöre hanöng saha chu kēten ò i patī öp yöng chu kikānö, el urôhò ò inrē öp kamyôḵnyen chu.

⁵ Chūökuṙô chin in yīö, Ō yī-ö kikānö aṅ Yērusalem, i kāsĕl hēk hain nup el kahôyö, hòṅ meh öt halöinyköre öt rēhĕn ahëṅnö tī töp hanāngen hanöng saha kanahanglōn e.

Linūöyö Tinkökö Kikānö

⁶ Asuh ap umuh yamih löktö el tönyaṅlnyi, sā tinfūnlö lul, tumhuṅslöng tö mūr, lōpān inrē, sā tinhūsö töpaṙōnga tötahūsa mī-inyihkö chehen?

⁷ Yĕh meuk, chūök tökeūnö Sòlòmön ap! I kaha e yip tö tafūöl anāi tökalēḵ tarik aṅ in yip tökalēḵ tarik Israĕl.

⁸ Ṙòkhöre nö i ṙātre sanët töhuveū-en inrē nö i kinyūngö, kö i takeun re sanët, hanöng pinhë-eṅkūö tö hatööm.

⁹ Vī chūökre öp rācha Sòlòmön nö keūnö tö chōn aṅ Lepanön.

¹⁰ Vī rupīö anga-aṅ machööḵlö, uktö humlum, lingūṅ elmat öp anūchö; vāyö vinī-iṅ angū-ö nö lā-ël tö yip kikānö kūön Yērusalem.

¹¹ Kuṙòh Ō kikānö kūön Siyôn, ngëichkö öp rācha Sòlòmön nö sapīövu tö öp tö sumpīövlöng nö in ò töp kikānö yöng ò ik sakāmö inpīhö ò, ik sakāmö ṙanāmö ellōn ò.