Sòlòmön 2 - TÖHET LĪPÖRE (Re-edited) Bible (BSI)

¹ Rōschin chū-ö aṅ Sāròn, lilō aṅ el nup achāṙö.

Kikōnyö

² Sā lilī i nup töchökhukūö, ngatī hanāngenlōn chu tö rēlö.

Kikānö

³ Sā ēpöl chōn i nup chōn el inchōn ngatī ngam hanāngen chu i ṙāl tarik. Uichngöre chin elnyat, pachāka nup ṙòng ò inrē tökūö chu.

⁴ Kēten chu anga-aṅ el patī nyamā, ngaich hanāngenlōn ò öp pantēra kinṙum chu.

⁵ Ha-aṅlen chu tö tönyô angkūr, hakaplö nômö chu tö ēpöl: tön vahtö hanāngenlōn chin.

⁶ Ō tanômkui chu ap öre lātavē kël ò, ngaich yūmö chu öp lahāmö kël ò.

⁷ Chūöku ṙô chin in yīö. Ō kikānö kūön Yērusalem, i nup kāsöl hēk el kahôyö hain, hòṅ meh öt halöinyköre öt rēhĕn āṅhënnö tī töp hanāngen hanöng saha kanahanglōn e.

Innëtö Tinkökö Kikānö

⁸ Hangṙô öp hanāngenre chin. Faltöre ap nö löktö kui rung tisòktöre nö löktö in minë rôngö nö chuh in chu.

⁹ Sā kāsēl ap hanāngen chu, hēk kūön istāk. Yĕh meuk, umuh ap nö sökhaka lā uk kinlōngö, hatīönkö nup lökhöt kuföt inkūp, tilachmatre nö i tanang.

¹⁰ Ṙô-òv öp hanāngen chu nö ngö ṙô tö chu: Choholre, hanāngen chu, tövai chu, ta-a kiröönngöre;

Kikōnyö

¹¹ Yĕh meuk ngaich ök laneūchö, keuheūt ök kumṙah ngaich nö rö-ö.

¹² Meūkö nup pūl nö el tumlat, yih öp nö ngaich ṙētak tinkökṙôre hāngö ṙô inrē nyö-öṅ nö ing panam.

¹³ Sīöpnyi ṙòng ngam anychīr chōn, pöpnyö ṙòngre vāin inrē; tahūsa tinôngö nup. Choholre, hanāngen chu, tövai chu, tā-a kiröönngöre.

¹⁴ Ō pumpa chu, el linrākö ihong, el kinluhu kaha panam, hökngen chu ngëichkö kūö meh, hökngen chu hang ṙô meh tön kuchik ap ṙô meh, vai inrē ap kūö meh.

¹⁵ Kētö aṅ el inchōn am in hī, tökūöṅnö aṅ el inchōn am, mahayëḵngen panô-òṅ vāin, tön pöpnyö kūö ṙòng re nup vāin el panô-òṅ hī.

Kikānö

¹⁶ Chū-ö chu ap hanāngen chu anga-aṅ chū-ö inrē, ha-aṅlö nup sīṅpre an nö i nup lilī.

¹⁷ Hanöng saha sakāmö unhômö fanalnyö nyat inrē, havöökūöre, hanāngen chu, sā kāsēl, hēk tö-ayal istāk i kui töngasngö rôngö.