Sòlòmön 1 - TÖHET LĪPÖRE (Re-edited) Bible (BSI)

¹ Tinkökö aṅ i nup Tinkökö Sòlòmön.

Ngam Raneh Tinkökö Kikānö

² Ō hāmkūö chu man öre öm hāmkūö chu tö minuh re! Pòn mötlö ngam hanāngenlōn meh tö vain,

³ Tahūsa ap tavī-i incham alaha meh, ṙöhnyu ap minë-eny meh nö tavī-i; lökten yip mahalanṙen kikānö nö hāngenlōn tö meh.

⁴ Sarōkö chu unôichrit meh, tai ka-eūyen. Kēhöt chu ap rācha el nup urôhò ò. Kiröngö ṙanāmölōn in min in meh; hapōilö hanāngenlōn meh in min mötlö tö vāin; huveū-en yip nö hāngenlōn tö meh.

⁵ Saha elmat takô chin chū-ö, vai pöri, Ō kikānö kūön Yērusalem; sā nup rūkui Kētār, sā nup ranangkūö Sòlòmön.

⁶ Uich hatīönka tön saha el mat chin, kūö ngam tavūöi nö ngehngö tī tö chu. Tainy yip nö in chu kikōnyö kūön öp kikānö yöng chu, vīten chu yip yōm panô-òṅ vāin; hö-ö pöri chū-ö hayōmken panô-òṅ vāin re.

⁷ Vë-enynang chu, me-eṅ hanāngenlōn chu, tö chūök meh ha-aṅlö nup sīṅp meh, tö chūök meh vīten u nö ṙōlhaka tö el sakāmö; kūöyòh ṙöng öich min höng karööna sā öp töhĕng tak i nup sīṅp meh nôlö meh?

Kikōnyö

⁸ Yē meh öt akahakūö, Ō tölngö tövai aṅ in yip kikānö, tömkö röön nup sīṅp, ha-āṅlö nup kūön inrē i nup rūkui öp yōm sīṅp.

⁹ Haṙōngten meh chin hanāngen chu, i kan kōra inröl Fërō.

¹⁰ Vāyö arëkūö man nö yanöṅtu, öm tahūötuvö tö yanöṅtö.

¹¹ Vī yanöṅtö meh in min tö humlum, holtö rupīö nö haṙākö.

Kikānö

¹² I saha ngam rācha nö el anūichö, ngaich öp rōi chōn tötahūsa nö taveūka.

¹³ Sā tö hĕng misakö mūr öp hanāngen chu nö in chu, öp muhulalhaka nö ihôi teh chu.

¹⁴ Sā töhĕng tum panöpnyö ṙòng henna öp hanāngen chu nö in chu el panô-òṅ vāin i Engkēti.

Kikōnyö

¹⁵ Yĕh meuk, hanāngen chu, vai man; yĕh meuk, vai man;

Kikānö

¹⁶ Yĕh meuk, hanāngen chu, vai man, kô-en lanöökö. Uhāvö elmat ap anūichö hā;

¹⁷ Sītör nup mikeūnö patī hā, pāin nup kum maha-uk patī hā.