SAKARIĀ 8 - TÖHET LĪPÖRE (Re-edited) Bible (BSI)

Ṙô Ṙinānyö Yeruselem Ngam Mā Tēv

¹ Ngaich ngam ṙô ngam Mā Tēv yip tömaṙôngö nö yih nö in chu, nö ngö ṙô,

² Ngö ṙô an ngam Mā Tēv yip tömaṙôngö: Līn chin tökūö Sīyôn töp tökiröng lanīnö, līn chin inrē in ò holtö öp tökiröng tanānyö.

³ Ngö ṙô an ngam Mā Tēv: Havantu chin i Sīyôn, ngaich min inrē iyöng ellōn Yērusalem: ngaich min inrē Yērusalem nö havëka nö ngam elpanam kanô-en: ngam rôngö ngam Mā Tēv yip tömaṙôngö nö ngam töhet rôngö.

⁴ Ngö ṙô an ngam Mā Tēv yip tömaṙôngö: Ṙòngmö ōtren yip min tököiny tarik tököiny kikānö inrē nö ūichhak nö el në talöökö Yērusalem, kö aṅhaṅv eltī yip min tarik tö kinchīṙöre tökūö ṙētö re.

⁵ Tööḵlö ël min minë tölöökö ngam elpanam tö nyīö kikōnyö nyīö kikānö inrē nö nyamtô nö el në talöökö e.

⁶ Ngö ṙô an ngam Mā Tēv yip tö maṙôngö: Yē e nö pinngangkūö tö mat vē chööḵṙen vē tarik i nup sakāmö anū-ö, röh öng min inrē nö pinngangkūö nö in në mat chu? ṙô ngam Mā Tēv yip tömaṙôngö.

⁷ Ngö ṙô an ngam Mā Tēv yip tömaṙôngö: Yĕh meuk,hayööken vē tarik re chin min im panam lā chūhöt, im panam lā sūng inrē:

⁸ Ngaich chū-ö min kēten cha, ngaich acha-a min nö iyöng ellōn Yērusalem; ngaich tarik chu min cha-a, ngaich chū-ö min Tēv cha inrē, im kanô-en im lanöökö inrē.

⁹ Ngö ṙô an ngam Mā Tēv yip tömaṙôgö. Kalēḵ nun yēḵ minë kël yīö yī-ö hamang në ṙô i në sakāmö nö löknyö elvāng yik pròfĕt, yik mu-umuh misī ik sakāmö ṙinātö chūökrööntö machööḵlö ngam patī ngam Mā Tēv yip tömaṙôngö, ngam töhet chūök, pò e nö hōtu nö mānlöngö.

¹⁰ Pòn urĕh misī tö në sakāmö ngòh tarik nö öt ṙāyu inṙūöngka, öt rēhĕn në töṙeūla nö ṙāyu inṙūöngka; öt rēhĕn nö kumchīkuṙen misī nö in ò ngam kumnyī-inyre hēk kuhēthötre tökūö tökunyaha elmat: pò chu vīten tarik nö ṙòkhöre nö kö lā-al holre.

¹¹ Ngaich pöri chū-ö töngamuh öich öt sā tösā re misī i nuk sakāmö lā urĕh öich in vē chööḵṙen vē tarik, ṙô ngam Mā Tēv yip tömaṙôngö.

¹² Pòn umuh min nö ngaich öp kulöl lanāmö; ṙôngu an min ngam vāin, ṙūhölre aṅkūö inrē min ngam tumlat, ngam halīöngö min inrē nö kētö tacham; ngaich tinī-īv chū-ö min tö vē chööḵṙen vē tarik nö amīnu tö në nö ṙòkhöre.

¹³ Ngaich ngö inlahen min angū-ö, pò yīö misī ranôich ṙô; in vē pumnāmö tarik, Ō patī Yūtā patī Israel inrē, ngaich chin min hayööken yīö, ngaich yin min inrē inkôlò: ui pa-ekūö hangëḵ minë këlre pöri.

¹⁴ Tön ngö ṙô an ngam Mā Tēvyip tömaṙôngö: Sā lōn chu hòṅ tī-iv tö tötlöök in yīö, hē yik muvöhngö yīö nö harunyö lānīnö chu, ṙôngam Mā Tēv yip tömaṙôngö, ngaich chū-ö öt ṙā-al lōnre misī;

¹⁵ Ngatī chin hēk lōnu i në sakāmö öich la-evṙen tö tölöök in Yērusalem i patī Yūtā inrē: uh yin pa-ekūö.

¹⁶ Në nun la-en yīö min; kö ṙôtö kanô-en yin i holre; kēken inkaha fālen im kanô-en lanāmö inrē i kuö inkūp yīö:

¹⁷ Un hĕng tak tö yīö tö ellōn re lōn tö tötlöök nö lā-al holre; ui hāngenlōn inrē chūökuṙô i minyôiny-aṅ tön anū-ömin ṙòkhöre surīkhö chu, ṙô ngam Mā Tēv.

¹⁸ Ngaich yih ngam ṙô ngam Mā Tēv yip tömaṙôngö nö in chu, nö ngö ṙô,

¹⁹ Ngö ṙô an ngam Mā Tēv yip tömaṙôngö: Ngam inhīkö im finënö chingëṅt, inhikö inrē im tinneūiyö, inhikö inrē im sinātö, inhīkö inrē im sinömö, min nö i patī Yūtā nö inṙamlōn ṙanāmölōn inrē, tökiröng nyinā-aṅ inrē nö tööḵlö tö kumchiklōn; lökten hāngenlōn tö kanô-en lanāmö inrē.

²⁰ Ngö ṙô ngamMā Tēv yip tömaṙôngö. Yih an ngam ṙētak tö yip tarik min nö yih, yip aṅ nup töṙōl elpanam inrē:

²¹ Yip aṅ öp töhĕng elpanam min inrē nö holröön re nö kiröönngöre, nö ngö ṙô, Tā-a töi kiröönngöre havëkö kumchiklōn im Mā Tēv, chöh ngam Mā Tēv yip tömaṙôgö inrē: ngaich kiröönngöre chū-ö min inrē.

²² Hôṅ, maṙôngö yip min tarik tökalēḵ pumnāmö tarik inrē nö yih nö i Yērusalem nö chöh ngam Mā Tēv yip tömaṙôngö, havëkö kumchiklōn ngam Mā Tēv inrē.

²³ Ngö ṙô an ngam Mā Tēv yip tömṙôgö: Yih öp min i nup sakāmö anū-ö tö yip tarik tösöm tak min nö kētö tīre, aṅ in yip tökeuheūttöre ëlô pumnāmö tarik, nö kôten min nö kētö tīre nö i kinfan ò öp Yahūti nö ngö ṙô, Hòṅ in meh in īhö kiröönngöre, pò ih hang tö ngam Tēv nö in yīö.