SAKARIĀ 4 - TÖHET LĪPÖRE (Re-edited) Bible (BSI)

Meuk Chūök Rööntö Manyaṅk

¹ Hēk ngam ma-ahānga nö yihtöre nö in chu ngam vamë-eṅkūö chu, ngaich kilanglen chu, öich sā tarik tökilanglöng nö ṙā-ang im inṙôhòre.

² Ngö ṙô ngaich anga-aṅ tö chu, Suāp maheūṅk meh? Ngö ṙô chū-ö ngaich, Yĕh meuk,meuk chūökröön tö manyak chin hĕk töng humlum nyöre, nö aṅhaṅv kui töp töchilū pingāṅl, sat inrē nup ëāṅvö i kui e; sat inrē nup inreū nö kö i nuk ëāṅvö, nup mī-i kui e;

³ Nët māṅ nuk ôliv chōn ranghö e, hĕng lā hāmö ngam töchilū pingāṅl, ngaich ngam tahëng nö lātavē e.

⁴ Sapṙô chū-ö ngaich vë-ekūö ök ma-ahānga inrē ök vamë-eṅkūö chu-ö, öich ngö ṙô, Mā chu, asuh ön në?

⁵ Ngaich ök ma-ahānga ök vamë-eṅkūö chu nö sapṙô chu, nö ngö ṙô, Hö-ö meh akahakūö tö në? Ngö ṙô chū-ö ngaich, Hö-ö, Mā Tēv chu.

Ṙô Ngam Tēv Lamöö In Serupāpěl

⁶ Ngaich sapṙô anga-aṅ nö vë-ekūö chu, nö ngö ṙô, Ṙô ngam Mā Tēv an nö in Sērupāpĕl, nö ngö ṙô: Öt lökten i kumlēḵ, öt rēhĕn nö lökten minā-aṅ, lökten im Fanöinylö chu pöri, ṙô ngam Mā Tēv yip tömaṙôngö.

⁷ Achīöm me-eṅ, Ō tökiröng rôngö? Töṙā-akūö man min panam i kūö Sērupāpĕl: Ngaich anga-aṅ min nö kēnyö öpkui ihong nö pōitô nö holtö Inkôlò, inkôlò nö in e!

⁸ Hēk inrē nö yih nö in chu ngam ṙô ngam Mā Tēv, nö ngö ṙô,

⁹ Ṙātö chūökröön tö machöḵlö ngih patī nun minë kuntī Sērupāpĕl; keuheūtngen e min inrē minë kuntī ò; ngaich akahalōn min me-eṅ tö ngam Mā Tēv yip tömaṙôngö nö tīnten chu in meh.

¹⁰ Achīö ṙöng ap tömihôiṅ lōn tö ngam sakāmö nup tökūöṅnen chehen? Pò cha min nö haṙamlōnre, ngaich meuk ngam kinlah kūö panam min nö eltī Sērupāpĕl. Anū-ö në tösat, në mat ngam Mā Tēv: keuheūt kū-ö mat re nun nö keuheūtngöre ing tumlat.

¹¹ Sapṙô ò chū-ö ngaich, öich ngö ṙô, Asuh ön në tönët māṅ ôliv chōn lā hamö ngam chūök rööntö manyak lā tavē e inrē?

¹² Ngaich chū-ö hēk sapṙô im innët heuh, öich ngö ṙô tö ò, Asuh ön në tönët pak ôliv, minë, mi-i minë tönët humlum löklö töpöklö, ngam mahatngö tavī-i nöng kahngenre ṙā-ang el ngam humlum chūök tavī-i?

¹³ Ngaich sapṙô chu anga-aṅ nö ngö ṙô, Hö-ö meh akahakūö tö në? Ngaich ngö ṙô chū-ö, Hö-ö Mā chu.

¹⁴ Ngö ṙô ngaich anga-aṅ, Anū-ö nun në tönët tak kikōnyö kūön ngam tavī-i, tösökhak nö ranghö ngam Mā-kūö ngih tumlat nö ṙòkhöre.