Biblia Todo Logo
Bib sou entènèt

- Piblisite -

SAKARIĀ 12 - TÖHET LĪPÖRE (Re-edited) Bible (BSI)


Ṙinānyö Yeruselem Mīnö

1 Ngam lumngan ngam ṙô ngam Mā Tēv tö inlahen Israel. Ngö ṙô an ngam Mā Tēv, ngam mahanyāknyö minë halīöngö ṙātö chūök rööntö machööḵlö ngam tumlat inrē, vamī ma-alaha tarik nö lā tuhēt nö in ò:

2 Yĕh meuk, vīten Yērusalem chin min nö kōp tökahööka nö in yip tarik, nö ṙòkhöre mahavīlen ò, i kui Yūtā inrē min angū-ö ip kinyīngö nö lā-al Yērusalem.

3 Ngaich ngö inlahen min angū-ö ip sakāmö angū-ö, öich vīten Yērusalem min nö ihong tölanganhu nö in vē tarik nö ṙòkhöre; ṙòkhöre min yip lumngānöre tö ò nö pōihangṙen min nö nyāhavö; ngaich ṙòkhöre vē pumnāmö tarik ngih tumlat minnö hamūlöre nö lā-al e.

4 Ip sakāmö angū-ö, ṙô ngam Mā Tēv, Öich hachök nup kōra min aṅtī tö unṙehe, aṅtī tö kintūöyen inrē ip mī-i uk ò: milaklö matre chū-ö min inrē i kui ngam patī Yūtā, ngaich chū-ö min inrē i kui ngam pati Yūtā, ngaich chū-ö min inrē kö hachök nup kōra yip tarik aṅtī tö ötmaneūkö.

5 Ngaich yip mākūö Yūtā min nö ngö ṙô nö ellōn re, Yip aṅ Yērusalem yip kumlēḵ chu im Mā Tēv yip tömaṙôngö ngam Tēv cha.

6 Ip sakāmö angū-ö chū-ö min vīten yip mākūö Yūtā nö sā kunrālö i kūö tameūyö nö i nup chōn, sā tanyukngö tameūyö nö in nup afō sāiny; ngaich cha-amin nö keuheūtngöre vahtī tö yip tarik mahavīlen cha lāhāmö lā tavē inrē: Ngaich Yērusalem min nö hēk nö iyöng im chūök re, nö i Yērusalem.

7 Ngaich ngam Mā Tēv min inrē nö hayööken nup inrūkui Yūtā nö urĕh, hòṅ ngam kanôlò ngam patī Tāvit tö ngam kanôlò yip aṅ Yērusalem inrē nö hapōilö-ngö nö i kui Yūtā.

8 Ip sakāmö angū-ö min ngam Mā Tēv nö laklö yip aṅ Yērusalem; ngaich anga-aṅ öp tötkalē-en in cha ip sakāmö angū-ö min nö sā Tāvit; ngaich ngam patī Tāvit min inrē nö sā ngam Tēv, sā öp ma-ahānga aṅ im mā Tēv nö i kūö cha.

9 Ngaich ngö inlahen angū-ö min ip sakāmö angū-ö, öich lukkenre min piyāingö yip pumnāmö tarik nö ṙòkhöre yip yamih nö lā-al Yērusalem.

10 Ngaich chū-ö min ṙöstö kui ngam patī Tāvit, ṙöstö kui yip aṅ Yērusalem inrē tö ngam ma-alaha inkôlò vine-elkui inrē; ngaich cha-a min nö hatīönkö kūö ò öp tösāpi tö cha: ngaich cha-a min nö haṙivhen ò, sā öp töhaṙivlōn töp töng hĕng maneuk kūön re kikōnyö, ngaich min inrē nö kiröngö miṙivlōn tö ò, sā kinröngö miṙivlōn tö lanòhre.

11 Ip sakāmö angū-ö min öp yöng miṙivlōn i Yērusalem sā miṙivlōn Hatatrīmòn el öp achāṙö Mekitō.

12 Haṙivlōn min ngam panam kö köhngen min töhĕng mupīhö tö höö; köhngen min töhĕng mupīhö aṅ patī Tāvit köhgen inrē yip pīhö cha; köhngen inrē öp mupīhö aṅ patī Nāta, köhngen yip pīhö cha inrē;

13 Köhngen inrē mupīhö aṅ patī Lēvi, köhngen inrē yip pīhö cha; köhngen öp mupīhö Sīmi, köhngen inrē yip pīhö cha;

14 ngaich yip mupīhö tö-ōtren, kö köhngen tö mupīhöre, köhngen inrē yip pīhö cha;

Car Nicobarese (Re-edited) Bible - TÖHET LĪPÖRE 

Copyright © 2010 by The Bible Society of India

Used by permission. All rights reserved worldwide.

Bible Society of India
Swiv nou:



Piblisite