SAKARIĀ 1 - TÖHET LĪPÖRE (Re-edited) Bible (BSI)

Havëken Yip Tarik Re Ngam Tēv Nö Havantöre Nö In Ò

¹ Im hinëvhöre chingëṅt, im innët sameūheu Tērīö, ngam ṙô ngam Mā Tēv nö yih nö löö in Sakariā ök kikōnyö kūön Pērikayā, ök kikōnyön kūön Aitō, ök pròfĕt, nö gö ṙô,

² Pōyen kumnyahlōn an ngam Mā Tēv nö in yik muvöhngö yīö.

³ Lökten man ngö ṙô tö cha, Ngö ṙô an ngam Mā Tēv yip tömaṙôgö: Havantöre yin in chu, ṙô ngam Mā Tēv yip tömaṙôngö, ngaich chū-ö min havatöre in yīö, ṙô ngam Mā Tēv yip tömaṙôngö.

⁴ Uh yin sā yik muvöhgö yīö, yik tövë-evkūö tö yik pròfĕt mu-urĕh, nö ngö ṙô, Ngö ṙô an ngam Mā Tēv yip tömaṙôngö, Havan yin ṙā-ang minë tötlöök talöökö yiö,töngamuh, ṙā-ang, minë tötlöök la-en yīö inrē: hö-ö pöri cha-a nö hang, öt rēhĕn nö hangihtöre tö ṙô chu, ṙô ngam Mā Tēv.

⁵ Yik muvöhngö yīö isuh yip? Yip pròfĕt inrē örheūheu yip nö aṅ?

⁶ Në ṙô chu tö në chöngö chu inrē, në hachöngten chu in yip tarik chu pròfĕt, röh yik nö kô-òl nö in yik muvöhngö yīö? Ngaich havöökūöre cha-a nö ngö ṙô, Sā lōn ngam Mā Tēv yip tömaṙôngö nö tī-iv nö in hī, asā nuk talöökö hī, asā nuk la-en hī inrē, ngatī tī anga-aṅ nö lök alaha hī.

Meuk Nuk Kōra Ngam Pròfět

⁷ Im tönët anāi sakāmö ngam kinhuk sīönö chingëṅt, ngam chingëṅ Sēpāt, im innët samyeūheu Tērīös,ngam ṙô ngam Mā Tēv nö yih nö löö in Sakariā ök kikōnyö kūön Pērikayā, ök kikōnyö kūön Aitō, ök pròfĕt, nö ngö ṙô,

⁸ Meuk chin töhatööm, yĕh meuk hĕng tak öp tarik i uk öp tangāṅv kōra, ngaich sökhak anga-aṅ nö i nup chōn martil nup lamātaṙeū; ngaich lā uk ò nuk kōra, töturë, tököinyö tunëṙö, tö-isoh inrē,

⁹ Ngaich ngö ṙô chū-ö, Ō Mā chu, asuh ön në? Ngaich ngö ṙô tö chu ök ma-ahānga vamë-eṅkūö chu, Hameukhömat meh chin tö u.

¹⁰ Ngaich ök tarik ök tö sökhaka nö i nuk chōn martil nö ngöṙô nö sapṙô, Acha-a yin vē tötīntu tö ngam Mā Tēv nö keuheūt kū-öre nö lök ing tumlat.

¹¹ Ngaich cha-a nö sapṙô ngam ma-ahānga aṅ im Mā Tēv ök tösökhaka nö i nuk chōn martil, nö ngö ṙô, Keuheūt kū-öre in lök im tumlat, ngaich; yĕh meuk, ṙòkhöre nun në tumlat nö ūichhakṙen nöng öt halöinyköre, nö heūheure.

¹² Ngaich ök ma-ahānga aṅ im Mā Tēv nöngö ṙô nö sapṙô, Ō Mā Tēv yip tömaṙôngö I ṙôktöre lōn öm öt arē-ĕlōn tö Yērusalem tö në elpanam Yūtā inrē, në chūök lanīnö meh nö sat anāi samyeūheu nö ngaich?

¹³ Ngaich ngam Mā Tēv nö sapṙô ök ma-ahānga ök vamë-eṅkūö chu tönë tölöök ṙô, në ṙô inṙamlōn.

¹⁴ Lökten ök ma-ahānga ök vamë-eṅkūö chu nö ngö ṙô tö chu, Hū-a man, ngö ṙô, Ngö ṙô an ngam Mā Tēv yip tömaṙôngö, Kiröngö lanīnö chin pòkūö Yērusalem pòkūö Sīyôn inrē öich kiröngö kumlēḵ lōn.

¹⁵ Pōyen kumnyahlōn chin inrē in vē pumnāmö tarik vē töng kumchikngenre; pò chu sin töng rahëchyen kumnyahlōn, ngaich cha-a nö ṙūölö ngam kanihngen.

¹⁶ Lökten an ngam Mā Tēv nö ngö ṙô: Kumtö miṙēlōn chin havan i Yērusalem; mānlöngö öp min patī chu nö in e, ṙô ngam Mā Tēv yip tömaṙôngö hateutnyu öp min tökuvaha nö i kui Yērusalem.

¹⁷ Iṙūöhö ṙô hū-a, ngö ṙô, Ngö ṙô an ngam Mā Tēv yip tömaṙôngö, Ṙòngmö taṙēchlöngö nup min elpanam chu tö kanôlò nö parāti; ṙòngmö haṙamlōn Sīyôn min inrē ngam Mā Tēv, ṙòngmö atöllen Yērusalem min inrē.

Meuk Nuk Sinrōl

¹⁸ Môklökūöre chū-ö ngaich, fën nuk sinrōl tömeūkö.

¹⁹ Ngö ṙô chū-ö ngaich tök ma-ahānga ök vamë-eṅkūö chu, Asuh ön në? Sapṙô chu ngaich anga-aṅ, Anū-ö nun në sinrōl töparāti tī tö Yūtā, Israel, Yērusalem inrē.

²⁰ Ngaich ngam Mā Tēv nö hameukhömat chu tö yip töfën tak ramöm vët.

²¹ Ngö ṙô chū-ö ngaich, Suh ap la-en vē nö yih? Kaknyöre ngaich anga-aṅ nö ngö ṙô, Anū-ö nun në sinrōl töparāti tī tö Yūtā, lökten nö öt tarīku mahachōhol kui re: yih pöri vē nö piyôngen cha, nö kavalngö minë sinrōl pumnāmö tarik, yip mahachônglö sinrōl re nö lāḵlö ngam panam Yūtā nö pirātngö e.