NAHOM 2 - TÖHET LĪPÖRE (Re-edited) Bible (BSI)

Fanukngö Ninevē

¹ Yih an nö i kūö meh ngam pumnyāchten meh nö panyënyö tī: halinngen nup aṅtī kumyung man, aṅtö kūö talöökö, hangëḵ ṙat re, kalē-ĕtī öm hangëḵlö ngam kumlēḵre.

² Tön hēk an ngam Mā Tēv nö kētö kumlēḵ Yāköp, nö sā kumlēḵ Israel: pò yip chamapngö aṅ nö ngaich nö hatngö tī tö cha, hachökö ngaich nup pak nup vāin cha.

³ Öp lanaklö yip tökalēḵ tarik cha nö ngaich nö vītu nö ngāṅv elmat, yip töt pinhë-eṅvkūö tarik nö inyuttö laturë: pachāla elmat nup inröl tö nup āṅsa hē sakāmö öp inlēnken ò, nup vöi inrē nö kiyinlöng alaha.

⁴ Ṙô-òv nup inröl nö el talöökö, kö singngen höö anū-ö nö el nup töpōiti ël talöökö: sā mineūkö tanyukngö anū-ö töhūkūö, fal anū-ö nö sā röön hanyālö.

⁵ Köpölōn anga-aṅ tö kanô-òṅre: kavē-ĕre cha-a ik kinröönngö cha; haveuttöre cha-a nö i kaha ngam kinlōngö halēn ap inrāngö inrē.

⁶ Löpnyukūö nup inkūp nup tahël, piyāyi ngaich ngam patī rācha.

⁷ Ṙònglöng kui inrē Husap, kē-ĕyö ngaich anga-aṅ, ngaich yip tarik ò kikānö nö haṙivlōn nö sā ṙô pumpa nö peuiny, kilölhaka öp töpongnyu ṙô nö elngòh cha.

⁸ Ha-ëhangrit pöri Ninevē nö tösā tömūlgö mak: sönen cha-a nö falngöre; Söklöre! Söklöre! ṙô cha nö hū-a; öt hĕng tak pöri tamëk ukre.

⁹ Kē nup kahil re yin rupīö, kē nup kahilre humlum; tön öt kinheūtu aṅ ap chūök chehen, tövai nup chehen patī.

¹⁰ Öt aṅhāṅv an nö ngaich, hönglungāṅhaka, Ötaṅhāṅvkūö inrē: Paṙööyi nômö inrē, ponghen höö nup kui kinmônö, keuheūtngöre ngam ṙat inrē nö chök ngaich nup kūö cha nö ṙòkhöre nö lunyī.

¹¹ Asuh apa kinlulu nup lāyön, öp chūö nup kūön lāyön inrē nö nyā-aṅvkūö, öp talöökö öp kōiny lāyön töp kan inrē, töp kūön lāyön, ngaich öt hĕng tak vamīten u nö pa-ekūö?

¹² Patīkö kūö ngaich ngam lāyön tökanô-òngkūö nup kūönre, löinyngö likeun inrē nö nyā-aṅkūö nup kan lāyön, hatööḵlö nup kinluhure ngaich tö pôḵ re, nup chūök ò inrē nö aṅhaṅvö tö nup tökāpö tö ò.

¹³ Yĕh meuk, lā-al meh chin, ṙô ngam Mā Tēv yip tömaṙôngö föngngö nup inröl ò chin min nö i kūö lul, ngaich ap fël min nö keuheūtökūö tö nup kun lāyön: rökngen nup pôḵ ngih tumlat, öt ōtre hināngö ṙô min inrē yip ma-ahānga aṅ in meh.