NAHOM 1 - TÖHET LĪPÖRE (Re-edited) Bible (BSI)

¹ Ngam lumngan Ninevē. Līpöre ap tömeūkö tö Nahom aṅ Elkòs.

Lanīnö ngam Tēv nö in Ninevē

² Tölīn an ngam Mā Tēv, ngam Tēv, mahavahal an inrē; mahavahal an ngam Mā Tēv tööḵngen tö lanīnö inrē; kēḵ invahlö an ngam Mā Tēv nö in yip lā-al ò, höngken lanīnö an nö in yip tökunyaha elmat tö ò.

³ Öt ka-euyö lanīnö an ngam Mā Tēv, tökiröng inrē nö i minhôinyö, öthētu inrē nö hatngö tī tö fālen: el ngam kuföt lamfeui an ngam talöökö ngam Mā Tēv el chanôchö panam inrē, pitung röön ò nun inrē minë taṙul.

⁴ Vëkö ngam mai anga-aṅ, ngaich vīten e nö nyôngö, hanyôngö nup tahël inrē; öt kalē-en ngaich Pāsan, Kārmel inrē ap pūl inrē Lëpanön nö nyīkngö.

⁵ Tī ò minë rôngö nö kayīna, yëngö inrē minë rung; laruklöng ngam tumlat inrē nö i kūö ò, hôṅ, töng panam, ṙòkhöre inrē yip aṅ e.

⁶ Chiāp tökô nö sökhak nö i kūö ngam lanīnö ò? Achīap inrē tökô nö köp im tanānyö lanīnö ò? Sā hanūlö kūö tameūyö an ngam inngeṅṙö tanānyö ò, kö laruk ngaich nuk ihong tö ti ò.

⁷ Tölöök an ngam Mā Tēv, töngëḵ nö chūökṙen hē sakāmö kanihngen; akahakūö anga-aṅ inrē tö cha yip mahayönglenre nö in ò.

⁸ Yē ngam ṙanööingö pöri nö hëmlö ngaich anga-aṅ min nö ahatngen öp chūökö in e ngaich lūḵ yip lā-al re min inrē, nö el singūlö.

⁹ Suāp halēnngö yīö ellōn yīö öi lā-al ngam Mā Tēv? Ahatngen e an min; öt chōholre min inkihten ip innët heuh.

¹⁰ Pòn pòrô anū-ö nö sā tövönngökūö vòknūötö, ngaich nyôp inrē tö kūö cha nö ôkö e, keuheūtngöre yip min nö hatgö sā tönyô kaṙālö sāiny.

¹¹ Hĕng hang tak ök nö ngaich ṙā-ang in meh nö kiröönngöre, öp töchōichö ellōn nö lā-al ngam Mā Tēv, ök mahalēnlö ötlanöökö.

¹² Ngö ṙô an ngam Mā Tēv: Pòrô cha-a nö sööḵlö kumlēḵ, ngatī nö maṙôgö pòrô cha-a nö ngatī sön min nö fāngiyö, chaṙēviyö anga-aṅ min inrē. Pòrô chū-ö hakihten meh, hö-ö chin min hēk hakihten meh.

¹³ Ngaich chin töngamuh likölngö ngam kaneun nö ṙā-ang in meh, litòkngö minë nyanëk inrē nö hatöki.

¹⁴ Kētö chöngö an ngam Mā Tēv nö in meh töp minë-eny meh nö öt hēk nö teūichtu: ṙā-ang ël ngam patī yip tēv meh chin min ṙökngen tö ka-īpö insātēv töhaṙöichö inrē insātēv: vī anūlö meh chin min; pò meh töchōich.

¹⁵ Yĕh meuk, i kui rôngö nup röön ò öp tö kumtö tölöök inhānga,ap ma-ahangkö nup tökiröng nyinā-aṅ, hateugngö nup töchūöku kinlēḵngô meh, pò ngam tötlöök min nö öt hēk nö lök in meh; rökiṙen takô an nö ngaich.