NAHIMIĀ 8 - TÖHET LĪPÖRE (Re-edited) Bible (BSI)

Vë-ekūö Ngam Chöngö Esrā Nö I Kūö Yip Tömaṙôngö

¹ Ngaich yik tarik nö hamūlöre nö sā tarik töng hĕng taka nö ël töluvë-aka i kūö ök Inkūp Mak; ngaich cha-a nö tölṙô Esrā ök kamūich nö kētö ök līpöre chöngö Môsös ök kahëtö ngam Mā Tēv nö in Israĕl.

² Ngaich Esrā ök kūönṙô nö kētö ök chöngö nö i kūö yik tömūl, hĕnghöre kikōnyö kikānö inrē ṙòkhöre inrē yik tö akaha elnang nö hang, ik raneh sakāmö ngam sinātö chingëṅt.

³ Vë-ekūö e ngaich anga-aṅ havöötökūöre nö ik töluvë-aka nö i kūö ök Inkūp Mak löktö kūö peuheū söl sakāmö, i kūö yip tarik kikōnyö kikānö inrē yik tökô inrē nö akaha elnang; afītö elnangre inrē yik tarik nö ṙòkhöre tö ṙô ngam līpöre chöngö.

⁴ Söklöre ngaich Esrā ök kamūich nö ik chōn chūök mumkahten ök vahī cha nö chö-önytö e; hol ò inrē nö söklöre Matitīyā, Sēma, Anaiyā, Uriya, Hilkīyā, Ma-asayā inrē nö lā hāmö ò; Petayā, Mīsa-el, Malkiyā, Hasum, Haspatanā sakarīysā Mesūlām, inrē nö lātavē ò.

⁵ Fehnyö mat ök līpöre ang Esrā nö i kūö yik tarik nö ṙòkhöre. Pò ò nö lātulöng tö yik tarik nö ṙòkhöre; ngaich hē ò nö fehnyö mat e ṙòkhöre ngaich yik tarik nö söklöre.

⁶ Hakôlò ngam Mā Tēv ngaich ang Esrā, ngam tökiröng Tēv; ṙòkhöre ṙô ngaich yik tarik nö ngö ṙô nö sapṙô, ʽʽĀmen, Āmen,ʼʼ nö hachônglö këlre cha-a; sōntö kuire inrē cha-a ngaich salām ngam Mā Tēv nö kū-ötö el tumlat kūö.

⁷ Yēsūa inrē, Panī, Serepiyā Yamin, Akkup, Sapētai, Hōtiyā, Ma-asēyā, Kēlita, Asariyā, Yōsapāt, Hanan, Pellayā, yik Lēvī holṙen yik tarik nö hōten cha nö akaha elnang töm chöngö, i saha yik tarik nö hōten cha nö akaha elnang töm chöngö, i saha yik tarik nöng ngöh nö i chūök re.

⁸ Löökö ṙô cha-a inrē nö vë-ekūö aṅmat ngam līpöre, aṅmat ngam chöngö ngam Tēv inrē; vë-eny manah e cha-a inrē, pòn hōtö yik tarik nö akaha elnang tö ṙô re yĕn vë-ekūö e.

⁹ Ngaich Nahimiā, ök mahayöng, Esrā inrē ök kūönṙô kamūich inrē, tö yik Lēvī yik mahaköptö yik tarik nö ngö ṙô tö yik tarik nö ṙòkhöre, ʽʽTöhet ön ngih sakāmö nö im Mā Tēv ngam Tēv yīö; Uh yin haṙivlōn hēk peuiny.ʼʼ Pò yik tarik nö peuiny hē cha nö hang ṙô ngam chöngö.

¹⁰ Ngaich ngö ṙô anga-aṅ tö cha, ʽʽKiröönngöre yin ngaich nyā-aṅkūö tö tösangöö òk töpachāka vāin inrē ngaich söömngö kintölö ò öp töt halēnkuṙen: tön töhet ön ngih sakāmö nö im Mā hī; uh yin haṙīvölōn, tön ngam kumlēḵ yīö an ṙanāmölōn nö im Mā Tēv.ʼʼ

¹¹ Ngatī yik Lēvī nö tahngö ṙô yik tarik, nö ngö ṙô, Hachēvngenre, tön töhet ön ngih sakāmö; ui haṙīvölōn.ʼʼ

¹² Ṙòkhöre ngaich yik tarik nö kiröönngöre nö nyā nö vīken tökiröng ṙanāmölōn, pò cha nö akaha elnang tö nuk ṙô tövënyu nö in cha.

Nyinā-aṅ Ngam Inrūkui

¹³ Ik innëtö sakāmö yik yöngkūö patī yöng yik tarik nö ṙòkhöre, nö holtö yik kūönṙô tö yik Lēvī, nö ṙongtö röön nö yih nö in Esrā ök kamūich pòn hòṅ haköp në ṙô ngam chöngö.

¹⁴ Kôtökūö cha-a ngaich tö e nö kūichiyö nö im chöngö ngam Mā Tēv nö kētö chöngö nö lökten in Môsös tö yik tarik Israĕl nö hōtu mi-īyöng el sanrā i rô-òten ök tökiröng nyinā-aṅ ngam sinātö chingëṅt,

¹⁵ Tö cha inrē nö hōtu nö ahangkö e i nup elpanam cha i Yērusalem inrē ʽʽKuṙòh chuh kui nup rung kēḵ nup pak òliv, aṅ el inchōn òliv, martil, kachūr, nup törōyu inrē chōn öi vī sanrā, sā kinūichngö e.ʼʼ

¹⁶ Lökten yik tarik nö kiröönngöre ngaich kēten u ngaich vī sanrā re kö i kui patī re, elmilūkö patī re inrē elmilūkö ngam patī ngam Tēv inrē, el öp töluvë-aka ip Inkūp Mak ip töluvë-aka inrē Inkūp Ifrēm.

¹⁷ Ngaich yik tömūl nö ṙòkhöre cha-a yik mahavan nö ṙā-ang el inkövö nö vī sanrā re ngaich iyöng el nuk sanrā; pòn löktökūö nuk sakāmö Yôsuā ök kikōnyö kūön Nön söl i sakāmö yik tarik Israĕl nö öt ngatī. Ngaich kiröngen ök ṙanāmölōn umuh.

¹⁸ Kaheuk sakāmö ngaich, löktökūö ök raneh sakāmö söl ik manā-aṅ sakāmö, anga-aṅ nö vë-ekūö ngam līpöre chöngö ngam Tēv. Sat sumkam cha-a nö haköpken ngam nyinā-aṅ; ngaich im hinëvhöre sakāmö ök töchēv manūlö, sā ngam chöngö.