NAHIMIĀ 5 - TÖHET LĪPÖRE (Re-edited) Bible (BSI)

Katīptökui Yāīch

¹ Ngaich yöng inyôṙa ök umuh tö yik tarik tö yip pīhö cha inrē nö in yik Yahūti hol cha.

² Pòn umuh yik tö ngö ṙô, Holtö vē kūön re in kikōnyö kikānö inrē, öi maṙôngö; tā-a töi kē sāiny, hòṅ hī nyā-avkūö ngaich aṅ.

³ Umuh yik inrē tö ngö ṙô, Kēngö taṙeūre in nö ṙāyu inchūökka kūö, panô-òṅ vāin, patī ih inrē tökūö kinë-eṅ sāiny kūö ngih inyāchö.

⁴ Umuh yik inrē tö ngö ṙô, Haṙūöng rupīö in tökūö masūl ap rācha nö i nuk taṙeū ih panô-òṅ vāin ih inrē.

⁵ Sā alaha yip hol ih nun në alaha ih, vē kūön ih inrē sā yip kūön cha; ngaich pöri īhö vītö kūönre tö kikōnyö kikānö inrē töhakövö rīkre yik kūön ih kikānö tö ngaich nö hakövö; öt huveū-en pöri īhö lakngen e, pò yip tahëng tarik nö inū tö taṙeū ih panô-òṅ vāin inrē.

⁶ Tainy chū-ö ngaich hē chu hang inyôṙö ṙô cha hang në ṙô inrē.

⁷ Höng kahngenre chū-ö ngaich chöh ellōn re, ngaich kētö fālen yik mā tö yik mākūö inrē. Ngö ṙô chū-ö tö cha, Hateung tī re yin tö ṙāi inṙūöngkö rupīö, öi kö i holre. Ngaich chū-ö hamūl yik tömaṙôngö nö lā-al cha,

⁸ Ngaich ngö ṙô tö cha, Ngaich in ayī-ö, ip tölngö kanô-òṅ hī, öi hēk havah yip Yahūti hol re yip tö inyīhiyö nö in vē pumnāmö tarik; ngaich pöri yī-ö inyihngö holre pòn hōtu cha-a nö inyihtu nö in hī? Öt ṙô-òvö cha-a ngaich, ötkô nö hĕng milôhò ṙô.

⁹ Lökten chu ngö ṙô, Hö-ö an nö tölöök ngam la-en yīö. Hö-ö öyih töhòṅ lök i pinhë-eṅkūö tö ngam Tēv hī öi lakngö inyëngenre tö vē pumnāmö tarik vē lā-al hī?

¹⁰ Ngaich chū-ö inrē tö yip hol chu tö yip tarik chu inrē kē-ĕkūö cha tö rupīö töhaṙūöngka sāiny inrē. Tā-a töi ṙāngö ṙāi inṙūöngkö rupīö.

¹¹ Havantö nup taṙeū cha yin töngamuh, panô-òṅ vāin cha, panô-òṅ òlīv cha inrē, tö nup patī cha, i tö hēngòng rupīö, sāiny, vāin tavī-i inrē nup töhateūngö kinë-eṅ ṙāi inṙūöngka tö yīö.

¹² Ngö ṙô cha-a ngaich, Ngaich in min havantö në ngaich ötlōnu tö ṙāi u in cha sā ṙô meh. Ngaich in min lā-evṙen sā ṙô meh. Ngaich chū-ö havëtö yik kūönṙô, ngaich kēḵ ṙô cha nö chūöku ṙô nö lā-evṙen sā ṙô cha nö kilēḵngôre.

¹³ Piyònglö takeun re chū-ö inrē ngaich ngö ṙô, Ngatī tī an yēḵ ngam Tēv nö kö piyòngngö tarik nö ṙā-ang i patī re, ṙā-ang i la-en re inrē öp töt mahateungngö ngih kinlēḵngô. Hòṅ ò nö ngatī nö piyôngi ngaich öt aṅhav. Ṙòkhöre ṙô ngaich yik tömaṙôngö nö ngö ṙô Āmen ngaich ha-öiny ngam Mā Tēv. Ngaich yik tarik nö la-evṙen asā ök kinlēḵngô.

Öt Hönglōntöre Ang Nehemiā

¹⁴ Löktökūö ngam hē chu vīlöngö mahayöng im panam Yūtā, löktökūö im tönët anāi samyeūheu söl im tölūöi anāi nët samyeūheu Artāsörsös ök rācha, nët sīön samyeūheu, öt rēhĕn chū-ö öt rēhĕn yip hol chu nö nyā nuk nyā-aṅkūö aṅ in ök mahayöng.

¹⁵ Langānö hakeunlö yik mu-urĕh mahayöng mu-urēhĕkūö chu nö in vē tarik, kēḵ nyā-aṅkūö cha-a nö in cha, vāin inrē, nö holre tö töfën anāi siköl rupīö. Uroh yik tarik cha nö mā nö i kui yik tarik. Hö-ö pöri chū-ö ngatī, kūö pinhë-eṅkūö tö ngam Tēv.

¹⁶ Haköpngenre chū-ö inrē im la-en ngam kinlōngö, öt kē taṙeū; ṙòkhöre inrē yik tarik chu nö mūl nö umuh ik la-en.

¹⁷ Umuh inrē in ök mīs chu hēngòng taneui anāi yik tarik, Yahūti mākūö inrē, nö holre tö yik yamih nö in ih aṅ i pumnāmö tarik nö havīlen ih.

¹⁸ Ngaich ök töhalēnö i töhĕng sakāmö hĕng nòng kōiny nuā taneui nòng tö-atöllöng sīṅp, hayöm ngatī inrē töhalēnö nyā-aṅkūö chu, kaheuk tösöm sakāmö el pilön nuk vāin nö pōyen; sönngenre chū-ö öt havëkö nuk nyā-aṅkūö aṅ ip mahayöng, pò ngam lā-en nö langan nö in vē tarik.

¹⁹ Köpölōn tö ngam tölöök tī chu in vē tarik, Ō Tēv chu.