MANEUTNYI 7 - TÖHET LĪPÖRE (Re-edited) Bible (BSI)

¹ Ngaich ngö ṙô ngam Mā Tēv tö Môsös, Yĕh meuk, vīlen meh chin öm Tēv i kūö Fërō: ngaich ap mëm meh min Āròn, nö Pròfĕt meh.

² Keuheūtnyöre ṙô pömchö tö nup tinöölôre tö chu: ngaich ap mëm meh min Āròn nö vë-ekūö Fërō, hòn hökngen yip kūön Israĕl angā-aṅ nö kiröönngöre nö ṙā-ang im panam ò.

³ Hangëḵngö ellōn Fërō Chin min, ngaich ṙūölö ṙôken nup minkahngö, pinngangkūö inrē im panam Aikup.

⁴ Hö-ö pöri min Fërō nö hang ṙô meh, ngaich Chū-ö min kētö tīre i kui Aikup, ngaich kēnyö yip tömaṙôngö, yip tarik chu kūön Israĕl, nö ṙā-ang im panam Aikup: aṅtī tö yöng kinṙôka.

⁵ Ngaich akahahakūö min yip aṅ Aikup tö Chu öich Chū-ö Mā Tēv, yē Chu öich Chū-ö Mā Tēv, yē Chu min hateutnyö këlre i kui Aikup, Öich kēnyö yip kūönre Israĕl nö rā-ang in cha.

⁶ Ngaich ngatī nā Môsös, nā Āròn; sā tinöölô cha tö ngam Mā Tēv, ngatī chā-a.

⁷ Hëvhöre anāi samyeūheu ṙēti Āròn, hē cha nö vë-ekūö Fërō.

Tinkung Āròn

⁸ Ngaich vë-ekūö nā Môsös nā Āròn, ngam Mā Tēv, nö ngö ṙô,

⁹ Yē Fërō min nö vë-ekūö nā nö ngö ṙô, Hameuktö pinngangkūö nan: ngaich ngö ṙô min më-eṅ tö Āròn, Kēḵ ngam tinkungre man, kavalten ò i kūö Fërō, i kūö yip tarik ò inrē, ngaich vīngöre min angā-aṅ nö pēch.

¹⁰ Ngaich nā Môsös, nā Aròn, nö chuh in Fërō, ngaich ngatī chā-a, sā ṙô ngam Mā Tēv nö ṙöltô cha; kavaltö ök tinkungre ang Āròn, nö i kūö Fërō, i kūö yik tarik ò inrē, vīngöre angā-aṅ ngaich nö pēch.

¹¹ Ngaich Fërō nö havëtö yik tö-akaha tarik chamòng alaha inrē; ngaich sā tī cha, achā-a inrē yik tömilūönö aṅ Aikup nö lökten i inchūṙö tö cha.

¹² Pò cha nö kavalngö nuk tinkungre, ngaich vīngöre anū-ö nö pēch; ngaich pöri ök tinkung Āròn nö lānngö nuk tinkung cha.

¹³ Hangëḵngö ellōnre ngaich ang Fërō, öt hang ṙô cha angā-aṅ; sā ṙô ngam Mā Tēv.

LANËLNGÖ I AIKUP Mahām

¹⁴ Ngaich ngö ṙô ngam Mā Tēv tö Môsös, ngëḵ ap ellōn Fërō, sōḵ ap nö hökngen yip tarik nö kiröönngöre.

¹⁵ Yihtöre man in Fërō ip peuheū: yĕh meuk, chuh ip mak apa; sökhak pömchö i kui ap tahël öm höngkūö ò; kēḵ ngam tinkung eltīre ngam tö vīngöre nö pēch.

¹⁶ Ngaich ngö ṙô pömchö tö ò, Tīntu chin in meh tö ngam Mā Tēv, ngam Tēv yip Hīprū, nö ngö Ṙô, Hökngen yip tarik Chu nö kiröönngöre, hòṅ cha nö lök la-en Chu nö el nyaṅlnyi: meuk mana, tö meh höng öl hang.

¹⁷ Ngö ṙô an ngam Mā Tēv, Ihih man min akahalōn tö Chu öich Chū-ö Mā Tēv: yĕh meuk, fohkö ngam mak chin min tö ngòh tinkung, ngòh eltī chu ngaich min ngam mak el ngam tahël nö vīngöre min nö mahām.

¹⁸ Ngaich nup kāḵ nup me-el ngam tahël min nö kapah, ngaich hangūṅtu min ngam tahël; ngaich min yip aṅ Aikup nö sā-òkkūö nö òk mak aṅ ngam tahël.

¹⁹ Ngaich ngö ṙô man tö Āròn, Kē ap tinkungre man, hateutnyö këlre i kui minë mak i Aikup, i kui minë tahël, i kui nup tö-ūlö talöökö mak, i kui nup tö rūḵngö mak nö ṙòkhöre, hòṅ u nö vīngöre nö mahām; ngaich keuheūtngöre chūök min nup mahām nö im panam Aikup, el tökachāvu, el ihong chūökṙen inrē.

²⁰ Ngati tī nā Môsös, nā Aròn, sā Chöngö ngam Mā Tēv; hachônglö ngam tinkungre angā-aṅ, ngaich foh minë mak el ngam tahël, nö i kūö Fërō, i kūö yik tarik ò inrē; ngaich keuheūtngöre ngam mak el ngam tahël nö vīngöre nö mahām.

²¹ Ngaich kapah nuk kāḵ el ap tahël; hangeūṅtu ngaich ngam mak, ötkô yik aṅ Aikup nö òk mak aṅ ngam tahël; keuheūtngöre chūök inrē ngam mahām nö im panam Aikup.

²² Ngaich ngati tī inrē yik tömilūönö aṅ Aikup nö lökten i inchūṙô tö cha: ngëḵngöre ellōn ngaich ang Fërō, ngaich öthang ṙô cha.

²³ Havan ngaich Fërō nö i patīre, ötrēhĕn angā-aṅ nö ṙātö ellōnre nö in e.

²⁴ Ṙòkhöre ngaich yik aṅ Aikup nö ul makre nö havīlö ök tahël, tö tö-ôkö; pò cha nö ötkô nö òk mak aṅ ök tahël.

²⁵ Keuheūt tö sat sumkam, unôichrit tī ngam Mā Tēv nö fohtö el ngam tahël.