MANEUTNYI 6 - TÖHET LĪPÖRE (Re-edited) Bible (BSI)

¹ Ngaich ngöṙô ngam Mā Tēv tö Môsös, Min man meuk tī chu tö Fërō: Pò ò min nö hökngöröön cha nö aṅtī tö ngam tökalēḵ këlre, ahōnyen cha min angā-aṅ nö ṙā-ang im panam ò, nö aṅtī tö ngam tökalēḵ këlre.

Havëken Môsös Ngam Tēv

² Ngaich ngam Tēv nö vë-ekūö Môsös, ngöṙô tö ò, Chū-ö Chin Yāvē.

³ Meūkö chin misī, tö Aprahām tö Isāk, tö Yāköp inrē, öich Tēv tökeuheūttöre Chöngö, hö-ö pöri Chū-ö öich akaha tö cha tö ngam minë-eny chu, nö Yāvē.

⁴ In cha tī pöri Chū-ö ngaich, haköpngö ngam kinlēḵngô, öich kētö ngam panam Kanā-an nö in cha, ngam panam chūök cha nö rahëichtaṙen nö iyöng.

⁵ Ane Chin inrē, hang inlöinyö yip kūön Israĕl, yip töHakövö tö yip aṅ Aikup, köpölōn chin inrē tö ngam kinlēḵngôre.

⁶ Lökten nö ngöṙô tö yip kūön Israĕl, Chū-ö Chin Yāvē, kēnyen yīö chin min ṙā-ang i nup lumngan tī yip aṅ Aikup, kēnyen yīö chin ṙā-ang el inkövö tī cha, aṅtī tö töteuthak kël min Chū-ö ṙānyen yīö, aṅtī tö öp yöng inkaha fālen inrē;

⁷ Kē-ĕ yīö Chin min öi tarik Chu, ngaich Chū-ö min öich Tēv yīö: ngaich akahakūö min yī-ö tö Chu Öich Yāvē, Öich Tēv yīö kamënyen yīö ṙā-ang elkatòh lumngan tī yip aṅ Aikup.

⁸ Ngaich chū-ö min kēten ap panam yīö, ngam lökten Chu hachônglö këlre Öich kēten e in Aprahām, in Isāk, in Yāköp inrē; kētö e Chin min in yīö nö amin yīö; Chū-ö Chin Yāvē.

⁹ Ngaich Môsös nö vë-ekūö yik kūön Israĕl: hö-ö pöri chā-a nö hangṙô Môsös tökūö kanihngen ellōnre, kūö ngam ötlinëken inkövö.

¹⁰ Ngaich vë-ekūö Môsös ngam Mā Tēv, nö ngöṙô,

¹¹ Kuhēthötre nan vë-ekūö Fërō, ap rācha aṅ Aikup, hòṅ ò nö hökngen yip kūön Israĕl nö kunyī-inyre nö ṙā-ang im panam.

¹² Ngaich ngöṙô Môsös tö ngam Mā Tēv, Yĕh meuk, öthangṙô chu yip kūön Israĕl; sitih kanô-òṅ öp Fërō nö hangṙô chu, chū-ö töthëtö minuh?

¹³ Ngaich ngam Mā Tēv, nö vë-ekūö nā Môsös, nā Āròn ngaich kētö Chöngö cha nö i yip kūön Israĕl, in Fërō inrē ök rācha aṅ Aikup, nö kēnyö yik kūön Israĕl nö ṙā-ang ngam panam Aikup.

Kinṙötngö Mikūönö Môsös Nāṅ Āròn

¹⁴ Vē, yöngkūö patī yik yöng cha; kūön Rūpön, ök lanòh kūön Israĕl, Hanòk, Pallu inrē, Hesròn, Karmi inrē; chā-a yin kūön Rūpön

¹⁵ Ngaich vē kūön Sīmōn, Yemuel, Yamin inrē Ohat, Yakin, Sohār, Sāul kūön aṅ Kanā-an kikānö; cha-a yin vē kūön Simōn.

¹⁶ Ngaich në minë-eny yik kūön Lēvī, i tumköl chap cha; Kersōn, Kōhat, Merarī inrē: në nun samyeūheu Lēvī nö aṅ, hëngòng lūöi anāi sat samyeūheu.

¹⁷ Vē kūön Kersōn; Lipni, Simei inrē, nö i tumköl chap cha.

¹⁸ Vē kūön Kōhat; Amrām, Ishar, Hepròn, Yusiel inrē: në nun samyeūheu Kōhat nö aṅ, hēngòng lūöi anāi lūöi samyeūheu.

¹⁹ Vē kūön Merarī; Mahli, Mushi inrē. Chā-a yin kūön Lēvī, nö i tumköl chap cha.

²⁰ Ngaich Amrām nö kē-ĕ Yōkepet ök kanānö ök yöng ò kikōnyö nö pīhöre; ngaich angā-aṅ nö kayôḵnyen Āròn, Môsös inrē: në nun samyeūheu Amrām nö aṅ, hēngòng lūöi anāi samyeūheu.

²¹ Vē kūön Ishar; Kōhar Nefek, Sikrī inrē.

²² Vē kūön Yusiel; Misael, Elsafan, Sitrī inrē.

²³ Ngaich ang Āròn, nö kēḵ pīhöre tö Elisīpa, ök kikānö kūön Amīnatap, kanānö Nahsōn, ngaich kayôḵnyen Natap, Apihu inrē, Elīasar, Itamar inrē.

²⁴ Vē kikōnyö kūön Kōrah; Asir, Elkana, Apiasaf: cha-a yin vē kūön Kōrah.

²⁵ Ngaich ang Elīasör, ök kikōnyö kūön Āròn, nö hĕngtak kahë tö pīhöre tö kikānö kūön Putīel; ngaich kayôḵnyen Finehas, chā-a yin vē yöngkūö aṅ patī Lēvī, nö tumköl chap cha.

²⁶ Chā-a yin ṙô ngam Mā Tēv, nö in nā Āròn, nā Môsös, nö ngöṙô, Kēnyö yip kūön Israĕl, nö ṙā-ang panam Aikup, sā ṙôngö cha.

²⁷ Chā-a yin vē vamë-ekūö Fërō ök rācha aṅ Aikup, nö kēnyö yik Israĕl nö ṙā-ang Aikup; chā-a nā Môsös, nā Āròn.

Tölṙô Môsös Nāṅ Āròn Ngam Tēv

²⁸ Ngaich im sakāmö hē ngam Mā Tēv nö vë-ekūö Môsös, nö im panam Aikup,

²⁹ Nö ngöṙô ngam Mā Tēv nö vë-ekūö Môsös, Chū-ö Chin Mā Tēv: ṙò-òv man in Fërō ap rācha aṅ Aikup keuheūtnyöṙôre tönup ṙô Chu in meh.

³⁰ Ngaich Môsös nö ngöṙô nö ikūö ngam Tēv töt hëtö minuh chin, sitih inlahen öp min Fërō nö hang ṙô chu?