MANEUTNYI 4 - TÖHET LĪPÖRE (Re-edited) Bible (BSI)

Kē-ěvkūö Môsös tö la-en pinngangkūö tö ngam Tēv

¹ Ngaich ngöṙô Môsös nö sapṙô, Yĕh meuk, hö-ö pöri min chā-a nö ṙātö ellōnre nö in chu, ötrēhĕn nö hangṙô chu: pòn ngöṙô min chā-a, Rö-ö an ngam Mā Tēv nö meūkö tö meh.

² Ngaich ngöṙô ngam Mā Tēv tö ò, Asuh öng ngam eltī meh? Ngaich ngöṙô angā-aṅ, Tinkung an.

³ Ngaich ngöṙô Angā-aṅ, Sukngen ò el tumlat. Sukngen ò ngaich angā-aṅ nö el tumlat, vīngöre ngaich angā-aṅ nö pēch; falngöre ngaich Môsös tö ò.

⁴ Ngaich ngöṙô ngam Mā Tēv tö ò, Hateutnyö këlre man, kē rit ò. (Hateutnyö këlre ngaich angā-aṅ, ngaich kē an, ngaich vīngöre angā-aṅ nö tinkung nö eltī ò:)

⁵ Hòṅ cha nö ṙātö ellōnre tö ngam Mā Tēv, ngam Tēv yik yöng cha, Tēv Aprahām, Tēv Isāk, Tēv Yāköp inrē, nö meūkö tö meh.

⁶ Ngöṙô inrē ngam Mā Tēv tö ò, Hayulhöt këlre man elngòhre. Ngaich hayulhöt këlre angā-aṅ nö elngòhre: ngaich hē ò nö hōknyö e, yeūnyu ngaich ök kël ò, sā insōho tacham tökënngöre.

⁷ Ngaich ngöṙô angā-aṅ nö hēk, Hayulhöt këlre man elngòhre hēk. (Ngaich angā-aṅ nö hayulhöt këlre nö hēk. Ngaich hē ò nö hōknyö e nö ṙā-ang elngòhre, vīngöre angū-ö hēk nö sā nup alaha ò tahëng.)

⁸ Ngaich min, yē cha nö öthòṅ ṙātö ellōnre nö in meh, ötrēhĕn nö hangṙô ngam raneh minkahngö, ṙātö elōnre Cha-a min nö im innëtö minkahngö.

⁹ Ngaich yē cha min nö ötrēhĕn nö ṙātö ellōnre im innëtö minkahngö ötrēhĕn nö hangṙô meh, ngaich më-eṅ kē mak ngam tahël, ngaich ṙöhtö e nö el tanyô; ngaich ap mak ap kahë meh el ngam tahël, nö vīngöre min nö mahām nö el tanyô.

¹⁰ Ngaich Môsös nö ngöṙô tö ngam Mā Tēv, Ō Mā, hö-ö chin tösötô, ötrēhĕn chin töngamuh, ötrēhĕn misī, ik hēten Meh vë-ekūö ngòh kūönre; pò chu töha-aṅṙô töha-aṅ litāk inrē.

¹¹ Ngaich ngöṙô ngam Mā Tēv tö ò, Achīö ap vamī elvāng tarik? Hēk achīö vamī tarik nö öthuveū-euṙô, hēk öthang, hēk meuk, hēk ötmeuk? Röh Öich, Öich Chū-ö Mā Tēv?

¹² Kuṙòh lökten kiröönngöre elvāng meh Chin min, Öich haköpten meh töp ṙô meh min.

¹³ Ngaich ngöṙô angā-aṅ, Ō Mā, vë-ekūö Meh chin, tīntö e löktö eltī öp tahīntö Meh min.

¹⁴ Ngaich hūlökūö lanīnö ngam Mā Tēv nö in Môsös, ngaich ngöṙô Angā-aṅ, Röh ap kahëm meh Āròn nö umuh, ap kūön Lēvī? Akahalōn Chin tö ò nö töhuveū-euṙô. Yĕh meūkan inrē, yih ap min nö höngkūö meh: hē ò min nö meukkūö meh, ngaich ṙāmölōn min angā-aṅ.

¹⁵ Ngaich vë-ekūö ò min më-eṅ, chaphöt minë ṙô elvāng ò: hol ngam elvāng meh Chin min, hol ap elvāng ò inrē, ngaich sumlohten meh min töp inlahen meh.

¹⁶ Angā-aṅ ap min tö ṙôtö ṙô meh nö i yip tarik: ngaich angā-aṅ min inrē nö elvāng meh, ngaich më-eṅ in ò öm sā ṙēngen ngam Tēv.

¹⁷ Ngaich më-eṅ kē ngòh tinkung nö eltī meh, aṅtī meh tö nup minkahngö.

Havantöre Môsös Nö I Aikup

¹⁸ Ngaich Môsös nö havantöre nö ik yöng pīhöre ang Yītörō, ngaich ngöṙô tö ò, Vë-ekūö meh chin, öm halöngngen chu öich havantöre in yip holre yip i Aikup, öich ngëichken cha yē cha nö ṙòngmö aṅ. Ngaich ngöṙô Yītörō tö Môsös, Ngaich man kuṙòh im kumchikṙen.

¹⁹ Ngaich ngöṙô ngam Mā Tēv tö Môsös nö i ṙô aṅ Mītiā, Kuṙòh, havantöre man i Aikup: tön ṙòkngöre vah yik nö kapah yik chamöh ngam nômö meh.

²⁰ Kēḵ ök pihöre ngaich Môsös tö nak kūön ò kikōnyö, ngaich ha-ūichlen cha nö i uk köttö, ngaich havan nö im panam, Aikup: ngaich ang Môsös nö kēḵ tinkung ngam Tēv, nö eltīre.

²¹ Ngaich ngöṙô ngam Mā Tēv tö Môsös, Yē meh ngaich havan i Aikup, la-evṙen pömchö ikūö Fërō, tö nup minkahngö nuk eltī meh nö ngaich tö tī chu: hangëngö ellōn ò pöri min Chū-ö, ngaich öthalöngngen yip tarik min angā-aṅ.

²² Ngaich ngöṙô min më-eṅ tö Fërō, Ngöṙô an ngam Mā Tēv, Kūön chu an Israĕl, lanòh chu:

²³ Ngöṙô Chin tö meh. Hökngen ngam kūön chu nö kiröönngöre, hòṅ ò nö lök la-en chu: ngaich më-eṅ sōten ò nö kiröönngöre. Yĕh meuk, fëlngö ngam kūön meh chin min ngam lanòh meh.

²⁴ Ngaich el talöökö ò nö chuh ik chūökre, ngaich meuk kūön ò ngam Mā Tēv, ngaich nö hòṅ fëlngen ò.

²⁵ Ngaich ang Sipōra nö kēḵ töngëḵ ihong, ngaich tunyinyngö ök kūönre, ngaich kavaltö e nö i röön Môsös; ngaich ngöṙô angā-aṅ, Kata kô-en man öm mahāmu tī öm pīhö chu.

²⁶ Ngaich angā-aṅ nöng hökngen ò: Ngaich ngöṙô angā-aṅ, Töpīhuvö man öm tö mahāmu tī, tökūö ngam tunnyinyngö.

²⁷ Ngaich ngöṙô ngam Mā Tēv, tö Āròn, Kuṙòh chuh el tönyaṅlnyi man höngkūö Môsös, Kiröönngöre ngaich angā-aṅ, ngaich meukkūö ò nö ikui ap rôngö ngam Tēv, ngaich hāmkūö ò.

²⁸ Ngaich ang Môsös nö keuheūtnyöre ṙô nö vë-eny nang Aròn, tö nuk ṙô ngam Mā Tēv, nup tinīntö ò, ṙòkhöre nup minkahngö tinölöṙô ò tö Ò.

²⁹ Kiröönngöre ngaich nā Môsös, nā Āròn, ngaich hamūl yik mākūö, yik kūön Israĕl nö ṙòkhöre;

³⁰ Ngaich Āròn nö keuheūtnyöre ṙô tö nuk ṙô ngam Mā Tēv, nö in Môsös, ngaich tī tö minkahngö nö ikūö yik tarik.

³¹ Ṙātö ellōnre ngaich yik tarik: ngaich hē cha nö hang ngam Mā Tēv, tö Ò inrē nö meuk kanihngen cha, ngaich sōntö kuire chā-a nö Salām.