MANEUTNYI 30 - TÖHET LĪPÖRE (Re-edited) Bible (BSI)

Tahaklö Finöngö Tö Tahūsa

¹ Ngaich më-eṅ min inrē i tahāklö chūök finöngö lōpān; vī-i e min më-eṅ nö chōntö sittim chōn.

² Hĕng sumkôngö öp min rôta e, hĕng sumkôngö inrē ṙôktāk; fën mirëṙö öp min: nët sumkôngö min rô-òl e: ngaich höng urā-ang nup sinrōl e nö töng hĕng milôhò nö in e min.

³ Ngaich lūöpö e min më-eṅ tö töt katĕhka humlum, öp ël e, tö nup kaha e inrē nö vinngö, tö nup sinrōl inrē; ngaich më-eṅ min inrē vī sapīöv rācha tö humlum nö vinngö i kaha e.

⁴ Nëtö vahī min më-eṅ inrē tö humlum töchuvī-ël chanit e elkatòh ngam humlum sapīöv, i nup tö nët ranūmö e, vītö u min më-eṅ i nup tö nët kaha e; ngaich anū-ö min inrē nö chūök nup kaneun nö kaneun e.

⁵ Vī nup kaneun min më-eṅ nö sittim chōn, lūöpö u inrē tö humlum.

⁶ Ngaich ṙātö e min më-eṅ i kūö öp ranangkūö öp ranghö öp kasòng tökô-en inmeuktö i kūö ngam anūichö miṙēlōn ngam i kui ngam tökô-en inmeuktö, i chūök chu min meuk kūö meh.

⁷ Ngaich min Āròn nö föng tötahūsa lōpān nö i kui e: kaheuk peuheū, i hē ò nö chöm nup ëāṅvö, anga-aṅ min nö föngö e.

⁸ Ngaich hē Āròn nö tōttökūö nup ëāṅvö tö harap, föngö e min anga-aṅ, nö i kūö ngam Mā Tēv nö töt chanūhuvṙen nö lōpān, i tumkölchap yīö.

⁹ Un kētu tötohtöre lōpān nö ël e, un rēhĕn töföngö tökētu, un rēhĕn nyā-aṅkūö tökētu ël e.

¹⁰ Ngaich Āròn min inrē nö kētö inlāmö tökööl nö i kui nup sinrōl e hĕng heuh i tö hĕng samyeūheu nö kētöp mahām inlāmö kūö tökööl tö pôkūö e i tumkölchap yīö: tölngö töhet an angū-ö nö im Mā Tēv.

Ṙāi Inrūkui Ngam Tēv

¹¹ Ngaich ngam Mā Tēv nö vë-ekūö Môsös, nö ngö ṙô.

¹² Ip hē meh kaheuk yip kūön Israĕl nö sā cha yip tö kaheūkö nö ngaich in cha, ngaich acha-a min nö kö kētö ṙënngen nômö re nö im Mā Tēv, ip hē meh kaheūkö cha; hòn öt lanëlngu tökūö invah nö in cha ip hē meh kaheūkö cha.

¹³ Ngih ön kahëtö cha min kö i tumtak cha yip mahavāngtöre nö in cha yip tö kaheūkö, ròngti i tö hĕng siköl (rūpiö) tö sā siköl (rūpiö) ngam töhet chūök; (tö nët anāi kēra (lumngan) ön ngih siköl i töhĕng siköl:) tökētu nö i ngam Mā Tēv öp tö ròngti siköl (rūpiö).

¹⁴ Kö i tumtak yip mahavāngtöre nö in cha yip tö kaheūkö, löktökūö tö nët anāi samyeūheu ṙēti söl lā tulöng, nö kētö tökētu nö i ngam Mā Tēv.

¹⁵ Öt pōyen tī an min ngam tökôlò, ötkūönen tī inrē ngam tötkôlò, tö töròngti siköl (rūpiö), ip hē cha nö kētö tökētu, nö inlāmö tö kūö nup nômö yīö.

¹⁶ Ngaich më-eṅ min inrē kēḵ rupīö inlām tökööl in yip kūön Israĕl, ngaich vī-il e min nö lamök i la-en ngam rūkui inmūlö; hòṅ e min nö inköpkölōn tö yip kūön Israĕl nö i kūö ngam Mā Tēv, nö inlām tökööl tö kūö nup nômö yīö.

Mās Chūök Sanöich

¹⁷ Ngaich ngam Mā Tēv nö vë-ekūö Môsös, nö ngö ṙô,

¹⁸ Vī mās pömchö inrē chūök sanöich, mās inrē öp lā kūö e nö chūök sanöich: ngaich ṙātö e min më-eṅ i hôi ngam rūkui inmūlö tö ngam tahāklö, asëlö aṅ e më-eṅ min inrē tö mak.

¹⁹ Ngaich Āròn min tö yip kūön ò kikōinyö inrē nö söich tīre röönre inrē nö in e:

²⁰ Ip hē cha nö kuhēthötre nö el ngam rūkui inmūlö, sööichöre min cha-a tö mak, hòn öt kapah min cha-a hēk inrē ip hē cha nö haröhtöre nö im tahāklö nö meukṙen, nö föng tökētu nö im Mā Tēv nö i kūö tameūyö;

²¹ Hòṅ cha min nö söichtīre röönre inrē, hòn öt kapah cha-a: Chöngö an min angū-ö nö in cha nö töng örheūheu, in ò ip kūön ò inrē i tumkölchap cha.

Inchamkui Tavī-i

²² Hēk inrē ngam Mā Tēv nö vë-ekūö Môsös, nö ngö ṙô,

²³ Kēḵ nup yöngkūö tötahūsa më-eṅ, tö töh mūr taneūyòng siköl (rūpiö), tötahūsa sinamon ròngtī nö ngatī, öp tö nëtòng taneui anāi siköl (rūpiö), nup tötahūsa kalamös nëtòng taneui anāi siköl (rūpiö) inrē.

²⁴ Nup kasiā inrē taneūyòng, nö tö sa siköl (rūpiö) öp töhet chūök, tavī-i oliv inrē hĕng hin (hĕng kilōkrām):

²⁵ Vī-i e min më-eṅ nö töhet tavī-i incham, tötahūsa nö kalūöichö nö sā tī öp vamī tötahūsa: töhet min angū-ö nö tavī-i incham.

²⁶ Hacham ngam rūkui inmūlö pömchö tö e tö ngam, kasòng tökô-en in meuktö inrē,

²⁷ Tö ngam mīs tö nup chehen e inrē, tö ngam chūök rööntö manyaṅk tö nup chehen e inrē, tö ngam tahāklö lōpān inrē.

²⁸ Tö ngam tahāklö töföngö tökētu holre tö nup chehen e nö ṙòkhöre, töp chūök sanöich, töp lā kūö e inrē.

²⁹ Ngaich ahetlö u min më-eṅ, hòṅ u nö tölngö töhet: töhet min öp töng suöhtöre nö in u.

³⁰ Hachāmö Āròn min më-eṅ tö yip kikōinyö kūön ò inrē hòṅ cha nö meukṙen chu nö i chūök Kūönṙô.

³¹ Ngaich më-eṅ min vë-ekūö yip kūön Israĕl, ngö ṙô, töhet ön min ngih tavī-i nö incham nö in chu nö keuheūt tumkölchap yīö.

³² Uh pöngchö nö vōktu nö i alaha tarik ui rēhĕn yī-ö min vī tö sā e, öp tö sā tum milôhò hol e: töhet an angū-ö, ngaich töhet min nö in yīö.

³³ Öp töng kamlūöich tö ngatī, hēk inrē öp töng samòhtö e nö i alaha öp aṅ tahëng, rökiṙen min anga-aṅ nö ṙā-ang i yip tarikre.

Tö Tahūsa

³⁴ Ngaich ngö ṙô ngam Mā Tēv tö Môsös, Kēḵ nup tötahūsa man, istektē, Onicha inrē, kalpanum inrē; tötahūsa nö holtö tötkatĕhka lōpān: hĕngre lumngam kö i tūmö u;

³⁵ Ngaich vī-i e pömchö nö lōpān, tötahūsa nö tö sā tī öp vamī tötahūsa, kumchiklöng tö sāl tölöök, töhet inrē:

³⁶ Sōngö e min më-eṅ nö pahīöya, ngaich ṙātö e i kūö öp tökô-en inmeuktö chu min meukkūö meh: ngaich angū-ö min nö in meh nö tölngö töhet.

³⁷ Ngaich öp lōpān öp vahī meh min tö sā tum mihëṅṙö e uh yī-ö min vī kanahngenre tö e: töhet an min angū-ö nö in meh nö pôkūö ngam Mā Tēv.

³⁸ Öp töng vamī tö sā e min, nö tahong ò, rökiṙen min anga-aṅ nö ṙā-ang i yip tarikre.