MANEUTNYI 26 - TÖHET LĪPÖRE (Re-edited) Bible (BSI)

Inrūkui Ngam Mā Tēv (Inrūkui Maneutnyi)

¹ Ane inrē me-eṅ min vī öp inrūkui nö söömö ranang ël tö hilā; nö tö hīölö kinpātö nö linen, tölingūṅ, tököinyö nganāvömat, laturë inrē, vī-i u me-eṅ min nö aṅ mat tö kërup nö vahī yip tömilichngen huneū-en tarik.

² Nët anāi hëvhöre sumkôngö min rôta öp töhĕng ranangkūö hilā, fën sumkôngö (12 Mitör) inrē ṙôktāk öp töhĕng ranangkūö hilā: ṙòkhöre min nup ranangkūö hilā nö hēngö kinlaha ṙôktāk.

³ Taneūi nup minranangkūö hilā nö taphen höö taseū nö in höö, ngaich inrē nup tö taneui ranangkūö hilā min nö taphen höö taseū nö in höö.

⁴ Vī chūök yanòh pömchö min tö tölingūṅ i taseū öp hĕng ranangkūö hilā tö nup töt löinyö ta-īö ip tanapkūö; ngaich ngö tī inrē me-eṅ min öm vī-iti i taseū ngam ranangkūö hilā, ngam lā uk im innëtö tanapkūö.

⁵ Taneui anāi vahī man min tö chūök yanòh ip töhĕng ranangkūö hilā, taneui anāi vahī man min tö chūök yanòh i taseū ap ranangkūö hilā im innëtö tanapkūö; kö lā-alre min nup chūök kūö yanòh nö in höö.

⁶ Ane inrē taneui anāi vahī me-eṅ tö humlum kinvòkngö kūö, ngaich tap nup ranangkūö hilā nö in höö tö nup kinvòk: ngaich höng hĕng min öp inrūkui.

⁷ Vī ranangkūö pömchö tö sanôi pököre nö rūkui ngam inrūkui: kahuksīön nup ranangkūö vahī meh min in u.

⁸ Lūöi anāi sumkôngö (13 Mitör) rôta min öp töhĕng ranangkūö, fën sumkôngö (2 Mitör) min inrē ṙôktāk öp töhĕng ranangkūö: hĕngre kinlaha ṙôktāk min minë tö kahuksīön ranangkūö.

⁹ Tap nup tö taneui me-eṅ min inrūkui nöng anū-ö nyöre, ane inrē nup tö tafūöl ranangkūö nöng anū-ö nyöre, ngaich hachap tö kūö ngam rūkui.

¹⁰ Taneui anāi vahī min me-eṅ tö chūök kūö yanòh i taseū öp töhĕng ranangkūö öp lā uk takô im tanapkūö, taneui anāi chūök kūö yanòh i taseū öp ranangkūö ngam lā uk takô im innëtö tanapkūö.

¹¹ Taneui anāi vahī min me-eṅ tö mās kinvòkkūö, ngaich kavòktö kūö nup kinvòk nö el nup chūök yanòhkūö, ngaich taptö ngam rūkui nö in höö, hòṅ e nöng hĕng.

¹² Ngaich öp tö kalöla tö ōtre ranangkūö ngam rūkui, öp tö ōtre tö ròngti im rūkui, kilölhak min nö lā rit ngam inrūkui:

¹³ Ngam tö hĕng sumkôngö im tö hĕng lā, ane inrē ngam tö hĕng sumkôngö im tahëng lā, ngam tö ōtren nö i rôta minë ranangkūö ngam rūkui, kilölhaka min nö i kaha ngam inrūkui lā muh inrē, nö hanyatngö e.

¹⁴ Ngaich me-eṅ min inrē vī kinṙul tö kui ngam rūkui tö uk kōiny sīṅp nö hangāvö mat, ranup tö kui e inrē nö lā tulöng tö uk kapëông.

¹⁵ Ngaich me-eṅ min inrē vī savaich ngam inrūkui tö sittim chōn nö ansökö.

¹⁶ Söm sumkôngö (4 Mitör) min rôta öp tö hĕng savaich hĕng sumkôngö (99 Sentimitör) ròngti ṙôktāk öp tö hĕng savaich.

¹⁷ Nëtö inheūṅngö min öp tö hĕng savaich, asonghötvö kūö nö in höö: ngati tī me-eṅ min vī nup savaich ngam inrūkui nö ṙòkhöre.

¹⁸ Vī nup savaich ngam inrūkui min me-eṅ, nët anāi savaich ngam lòhngö nö kū-ö tö lòhngö.

¹⁹ Fën anāi vahī min me-eṅ tö rupīö löp rööntö nup tö nët anāi savaich, nët löp i röön tö öp tö hĕng savaich nö chūök nup tö nët inheūṅngö ò, nët löp inrē i röön tö öp tahëng savaich nö chūök nup tö nët inheūṅngö ò.

²⁰ Im innët lā kaha ngam inrūkui, nö lā kapā, nët anāi savaich;

²¹ Nup rupīö inrē löp u fën anāi; nët inrē löp i rööntö tö hĕng savaich, nët inrē löp i rööntö öp tahëng savaich.

²² Lā rit ngam inrūkui lā sūng vī savaich me-eṅ min nö tafūöl.

²³ Vī savaich me-eṅ min inrē nët i minë sinkeukngö rit ngam inrūkui.

²⁴ Ngaich anū-ö min inrē nö hachāpö nö lā taṙeūḵ, ngaich ngatī inlahen min anū-ö nö ṙòkhöre söl lātulöng nö pōktöre kūö: ngaich anū-ö min nö kö chehen u nyöre; anū-ö min mi-i minë tö nët sinkeukngö.

²⁵ Hëvhöre min nup savaich, tö nup löp u min inrē rupīö, tafūölsīön nup löp i rööntö tö hĕng savaich, nët löp inrē i rööntö öp tahëng savaich.

²⁶ Vī kinrān pömchö tö sittim chōn: taneui i nup savaich ip tö hĕng lā kaha ngam inrūkui.

²⁷ Taneui nup kinrān nup savaich im tahëng lā kaha ngam inrūkui, taneui nup kinrān nup savaich i kaha ngam inrūkui, nö i ngam lā rit e lā sūng.

²⁸ Ngaich ngam lā ṙat kinrān ellōn minë savaich nö tufunnyukūö min.

²⁹ Ngaich me-eṅ min lūöp nup savaich tö humlum, vī chanit u inrē tö humlum i kaha nup kinrān: lūöp nup kinrān me-eṅ inrē tö humlum.

³⁰ Ngaich me-eṅ min asöklö ngam inrūkui sā inmeukhö mat meh i kui ngam rôngö.

³¹ Vī ranangkūö pömchö inrē tö tö vai hilā tölingūṅ, tö köinyö nganāvö mat, laturë inrē: vī-i u me-eṅ min nö aṅ mat tö kërup nö vahī yip tö milichngen huneū-en tarik:

³² Ngaich me-eṅ min seūlö u i nup tö fën machööḵlö sittim chōn tö lūöpö tö humlum, humlum min inrē nup kinvòkkūö u, i nup tö fën rupīö löp.

³³ Ngaich me-eṅ min seūlö ngam ranagkūö nö i nup kinvòk, ngaich in e kēhöt ngam kasòng minkahngö kanô-en el ngam ranangkūö: ngaich ngam ranangkūö min nö haköhngen meh tö ngam töhet chūök nö i hôi ngam tölngö töhet.

³⁴ Ngaich me-eṅ min ṙātö ngam anūichö miṙēlōn i kui ngam kasòng ngam tökô-en inmeuktö el ngam tölngö töhet chūök.

³⁵ Ngaich ṙātö ngam mīs min me-eṅ lā uk öp ranang kūö, ngam chūök rööntö manyaṅk inrē ranghö öp mīs nö i kaha ngam inrūkui nö lā lòhngö; ngaich ṙātö ngam mis me-eṅ min nö lā kapā.

³⁶ Vī innyatngö ngam inkūp ngam rūkui pömchö, tö tövai hilā, tölingūṅ, tököinyö nganāvö mat, laturë inrē, nö vahīṙen yip chamôktö mirun tö ta-īö.

³⁷ Taneūyö vahī pömchö tö machööḵlö sittim chōn chūök nup innyatngö, lūöpö u tö humlum; humlum min nup kinvòk kūö u: ane inrē min me-eṅ taneūyö vahī tö löp u tö mās.