MANEUTNYI 20 - TÖHET LĪPÖRE (Re-edited) Bible (BSI)

Nuk Tösöm Chöngö

¹ Ṙô ngam Tēv nun në nö ṙòkhöre, nö ngö ṙô.

² Chū-ö chin Mā Tēv, Tēv meh, öich kamënyen meh ṙā-ang panam Aikup, ṙā-ang ap patī inkövö.

³ Uh man tahëngu Tēv nö hol Chu.

⁴ Uh man vī tēvre tö insā, un rēhĕn nup tösā el halīöngö lā tumlat lā taṙeūḵ, un rēhĕn nup tösā el mai lā taṙeūḵ töng tumlat:

⁵ Um sōntö kūöre in u, uh rēhĕn lök la-en u; tön Mā Tēv Chin Chū-ö Tēv meh öich Tēv tölamīn, chöhkö tötṙong chin tī yip yöng, i kui yip nyīö, i kui yip linūöyö ane inrē finënö tumkölchap cha yip tösumrīk tö chu;

⁶ Hameuk tö miṙēlōnre i yip köṅnyu in cha yip tö hāngenlōn tö chu, mahaköp në Chöngö chu inrē.

⁷ Uh man höng töl kēḵ minë-nyö ngam Mā Tēv, Tēv meh; tön rö-ö an nö töt fāluṙen min nö i ngam Mā Tēv ngam töng töl nö kēḵ minënyö Ò.

⁸ Köpölōn tö ngam sakāmö anôilö, Haköpö e nö töhet.

⁹ Tafūöl sumkam më-eṅ la-evṙen, la-evṙen inrē tö nup la-en meh nö ṙòkhöre:

¹⁰ Anôilö pöri nö i ngam Mā Tēv, Tēv meh, ngam sinātö sakāmö: hē e më-eṅ öt la-evṙen tö töng la-en, më-eṅ, un rēhĕn öp kikōnyö kūön meh, un rēhĕn öp tarik meh kikānö, un rēhĕn nup nuā meh, un rēhĕn öp tarik töt aṅ panam meh öp mi-in meh:

¹¹ Pòn vīlö halīöngö tumlat inrē, ngam Mā Tēv nö tafūöi sumkam tī, tö ngam mai ṙòkhöre nup aṅ e inrē, ngaich heūheu im sinat sumkam: lökten ngam Mā Tēv nö hakôlò ngam anôilö sakāmö, ahetlö e inrē.

¹² Milēṙen man tö nap yöngre: hòṅ nup sakāmö meh min nö marô-òten im panam ngam kinë-eṅkūö meh tö ngam Mā Tēv, Tēv Meh.

¹³ Uh man kumpah tarik.

¹⁴ Uh man asēha.

¹⁵ Uh man ulāyö.

¹⁶ Uh man sūöichkö holre.

¹⁷ Uh man yikngö patī holre, uh man yikngö pīhö holre, un rēhĕn öp tarik ò kikōnyö, un rēhĕn öp tarik ò kikānö, un rēhĕn öp köttö ò, un rēhĕn nup töng chëhen öp hol meh.

Pahë-ekuö Yik Tarik

¹⁸ Ngaich ṙòkhöre yik tarik nö meuk ök kunṙôkö, hanyāṅlö inrē, ṙô römpet inrē, lūlu kui inrē ngam rôngö: kichëyöre yik tarik hē cha nö meūkö e, ngaich sökhaka nö marôvat.

¹⁹ Ngaich ngö ṙô chā-a tö Môsös, vë-ekūö ih man më-eṅ, hang ṙô meh in min: uh pöri ngam Tēv nö vë-ekūö ih, hòṅ ih öt kapah.

²⁰ Ngaich Môsös nö ngö ṙô tö yik tarik, Uh yin pa-ekūö: tön yih an ngam Tēv nö kalaha yīö, hòn i kūö yīö, öp pinhë-eṅkūö yīö tö Ò, hòṅ yīö öt köölö fālen.

²¹ Ngaich yik tarik nö marôvat nö sökhaka, ngaich ṙūötöre Môsös nö i chūök ngam Tēv ik tökufëi singūlö. Chöngö I Alaha Minë Tahāklö

²² Ngaich ngö ṙô ngam Mā Tēv tö Môsös, Ngö ṙô pömchö tö yip kūön Israĕl, Kôta mat yin ngaich tö Chu löknyö el halīöngö ṙô vë-ekūö yīö.

²³ Uh yin vī nup tahëng tēv nö hol Chu, nup rupīö tēv, hēk nup humlum tēv, un vī-i tö yīö nö tēv yīö.

²⁴ Vī tahāklö Chu tö tumlat, ngaich kētö nup kahëtö meh nö töföngö nö i kui e, ane inrē nup tökētuvö inlām, sīṅp meh, kōiny nuā meh inrē: kö i nup chūökö min Öich haköpngö minë-enyre, yih inrē min in meh, ngaich hakôlò meh.

²⁵ Yē meh vīlö tahāklö Chu tö ihong, uh më-eṅ vīlö e nö ihong tö töfāsö ihong: pò meh min kuvīöṙö tī tö e, yē meh chātngö öp aṅtīre öm i kui e.

²⁶ Uh më-eṅ rēhĕn yôklö ip tahāklö Chu, löklö nup vanānglö, hòṅ ngam linchôyö meh nö öt hameuknyu nö i kui e.