MANEUTNYI 2 - TÖHET LĪPÖRE (Re-edited) Bible (BSI)

Kīnyôḵnyö Môsös

¹ Ngaich hĕngtak ök umuh tarik aṅ patī Lēvi. Kē pīhöre tö kūön Lēvī.

² Pirūkö nyīö ngaich ök kikānö, ngaich kayôḵnyö nyīö kikōnyö; ngaich hē ök yöng ò kikānö nö meūkan nö tövai nö nyīö, lūöi chumngëtö tī ngaich angā-aṅ nö hayunngen ò.

³ Ngaich hē ò nö ötkô nö iṙūhen nö hayunngen ò, ngaich kē ök kuvôkö ök papirös, lūöpö ngaich tö tönyën lanit nö holtö paröm; chaplö ngam nyīö ngaich angā-aṅ nö ël e, ngaich ṙātö e nö el nuk chōn ikui ök tahël.

⁴ Ngaich ök kanānö ò nö marôvat nöng sökhaka.

⁵ Ngaich ök kikānö kūön Fërō nö peūtöre nö vōk, el ök tahël; ngaich yik kūön alaha ò kikānö nö kiröön kāha ök tahël; ngaich meuk ök kuvôkö angā-aṅ nö i nuk chōn, ngaich tīnngö yik kikānö angā-aṅ kūön alahare nö kē-ĕr e.

⁶ Löpnyökūö e ngaich ök nyīö. Aṙē-ĕlōn ngaich angā-aṅ tö ò, ngaich ngöṙô, Töhĕngtak ön ngòh, kūön yip Hīprū.

⁷ Ngaich ngöṙô ök kanānö ò tök kikānö kūön Fërō, Kiröönngöre öich kòh, öich have-ere kikānö Hīprū, maharuk nyīö, hòṅ ò nö haruklen ò nö kūön meh?

⁸ Ngaich ngöṙô ök kikānö kūön Fërō, Kuṙòh. Ngaich ök nyīö kikānö nö kiröönngöre, ngaich havëkö ök yöng ök nyīö.

⁹ Ngaich ngöṙô ök kūön Fërō kikānö tö ò, Kēngö ngam nyīö man, harūkan nö kūön chu, kētö raneushö meh chin min. Ngaich ngam kikānö nö kē ngam nyīö, ngaich harūkan.

¹⁰ Pōyö ngaich ngam nyīö, ngaich angā-aṅ nö kēten ò, nö ik kikānö kūön Fërō, ngaich angā-aṅ nö kūön ò nö kikōnyö. Ngaich kaheuk minë-eny ò angā-aṅ nö Môsös, ngaich ngöṙô Pò chu tūöklen ò nö ṙā-ang el mak.

Chuh Mitīa Ang Môsös Nö Falngöre

¹¹ Ngaich ngö inlahen hē nuk sakāmö anū-ö, hē Môsös nö ngaich nö pōyö, ngaich chuh i yip holre angā-aṅ, ngaich meuk nuk lumngan cha: ngaich angā-aṅ nö meuk ök aṅ Aikup, nö chökhutī tök Hīprū, ök aṅ i yik hol ò.

¹² Chingā, chingā, angā-aṅ tö kūöre, ngaich hē ò nö öt maheūṅku tö tarik; ngaich angā-aṅ nö fëlngö ök aṅ Aikup, ngaich hayunngen ò nö el kuyāyö.

¹³ Ngaich kiröönngöre angā-aṅ im innët sumkam, ngaich meuk nak nëttak tarik nö kilöönö höö, nak Hīprū; ngaich ngöṙô angā-aṅ tök tövaich, Kūöyòh öm chökhutī töm holre?

¹⁴ Ngaich ngöṙô angā-aṅ, Achiāp vamīlen meh mā, kamhôṅka inrē öm ikui ih? Hòṅ kumpāha chu öm tö lōnre, sā tī meh kumpah ök aṅ Aikup? Pa-ekūö ngaich Môsös, ngaich ngöṙô, Akahaiṙen ök inlaha chu nö ngaich,

¹⁵ Hē Fërō nö hāngö e, ngaich lukkenre angā-aṅ nö hòṅ fëlngen Môsös, falngöre pöri Môsös nö ṙā-ang i kūö Fërō, ngaich iyöng i panam aṅ Mītia: ngaich ūichngöre angā-aṅ nö ikui ök tö ūlö mak.

¹⁶ Sat maneuk yik kikānö kūön ök Kūönṙô aṅ Mītia: ngaich yihtöre chā-a nö fòk mak, ngaich hatööḵlö nuk tökachāvu, nö ha-òk nuk chehen ök yöng cha kikōnyö.

¹⁷ Ngaich yik yōmpököre nö ahôngen cha: söklöre pöri Môsös ngaich holṙen cha, ngaich ha-òk nuk chehen cha angā-aṅ.

¹⁸ Ngaich hē cha nö yihtöre nö in Rūel ök kikōnyö yöng cha, ngaich ngöṙô angā-aṅ, sitih öi ka-eūi tö yīhih ing tö taheui sakāmö?

¹⁹ Ngaich ngöṙô chā-a, Hĕngtaka öp aṅ Aikup ṙamānyen ih ṙā-ang eltī yip yōmpököre, hĕnghöre tūök mak ih ap inrē, ngaich ha-òk në chehen.

²⁰ Ngaich ngöṙô angā-aṅ töyik kikānö kūönre, Isūapa? Kūöyòh öi höng ṙāngö ap tarik? Havëken ò hòṅ ò nö nyā.

²¹ Ngaich ang Môsös nö hō nö iyöng in ök tarik, ngaich angā-aṅ, nö kēten Siporā, ök kikānö kūön ò, nö in Môsös.

²² Kayôḵnyö nyīö kikōnyö ngaich angā-aṅ, ngaich angā-aṅ nö kaheuk minë-eny ò nö Kersōm; pòn ngöṙô angā-aṅ, Iyöng i töt panamre chin.

²³ Ngaich ngö inlahen irô-òten nuk töṙōl sumkam, kapah ngaich ök rācha aṅ Aikup; ngaich yik kūön Israĕl nö halöinyöre tökūö ök inkövöre, ngaich peuiny chā-a, ngaich ök ṙô cha nö söllö nö im Tēv.

²⁴ Ngaich ngam Tēv, nö hang ṙô cha nö halöinyöre, fēḵĕlre ngaich ngam Tēv tö ngam kinlēḵngô in Aprahām, in Isāk, in Yāköp inrē.

²⁵ Ngëichkö yik kūön Israĕl ngaich ngam Tēv, ngaich ngam Tēv nö akahngen cha.