MANEUTNYI 17 - TÖHET LĪPÖRE (Re-edited) Bible (BSI)

Mak Lamöknyö Mat Ihong

¹ Ngaich ṙòkhöre yik ṙôngö kūön Israĕl nö ṙā-ang ök tönyaṅlnyi i Sin nö kiröönngöre, im kinröönngö cha, sā ngam inchöngten tö ngam Mā Tēv, ngaich vītö chūökre nö i Rifitim: ngaich öt ôku yik tarik tö mak nö umuh.

² Lökten yik tarik nö lā-alkūö Môsös, nö ngö ṙô, Kētö mak in ih hòṅ ih òk. Ngaich Môsös nö ngö ṙô tö cha, Kūöyòh öyih lā-alkūö chu? Kūöyòh öi kalah ngam Mā Tēv?

³ Ngaich yik tarik nö umuh nö yal tö mak; ngaich siṙös ṙôre yik tarik nö lā-alkūö Môsös, nö ngö ṙô, Kūöyòh öm kēnyen ih ṙā-ang Aikup, öm kumpaha ih tö vē kūön ih tö në nuā ih inrē öm aṅtī tö yanālö?

⁴ Ngaich ngö ṙô Môsös nö vë-ekūö ngam Mā Tēv, sitih inlahen tī öichvö tö vē tarik? Höngöre yin nö ngaich nö kuleh kui chu tö ihong.

⁵ Ngaich ngö ṙô ngam Mā Tēv tö Môsös, Iṙūöhöröön man urēhĕkūö më tarik, ngôḵ yip mākūö Israĕl inrē nö hol meh; kuṙòh kiröönngöre, kēḵ öp tinkung nö eltī meh, öp aṅtī meh foh el ap tahël.

⁶ Yĕh meuk, sökhak chin min i kui öp ihong i Hôrep; foh öp ihong pömchö, ngaich hëmnyi min öp mak nö ṙā-ang in ò, hòṅ yip tarik nö òk. Ngaich ngatī Môsös nö i kūö yik mākūö Israĕl.

⁷ Ngaich kaheuk minë-eny ök chūökö angā-aṅ nö Masa, Meripā inrē, kūö ngam linā-alkūö tö yik kūön Israĕl, ane inrē kūö cha nö kalah ngam Mā Tēv nö ngö ṙô In hī Ang kan ngam Mā Tēv, hö-ö ṙöng?

Kinyungö Lā-al Aṅ Amelek

⁸ Yih ngaich Amelek, ngaich kiyūngö Israĕl nö i Rifitim.

⁹ Ngaich ngö ṙô Môsös tö Yôsuā, Katöllö tarik hī man, kuṙòh kiröönngöre, kiyūngö Amelek: sökhak chin huṙöich i kui ngam rung öich kumtö ngam tinkung ngam Tēv nö eltī chu.

¹⁰ Ngaich ngatī Yôsuā sā ṙô Môsös tö ò, ngaich kiyūngö Amelek: peūlöre nö i kui ngam rung ang Môsös, Āròn, Hör inrē.

¹¹ Ngaich ngö inlahen, hē Môsös nö hachônglö këlre, mihôiṅ ngaich Israĕl, hē ò nö ṙātö këlre, ngaich mihôiṅ Amelek.

¹² Langan pöri nuk kël Môsös; kēḵ ihong ngaich chā-a hĕng, ngaich ṙāten ò nö el katòh ò, ūichngöre ngaich angā-aṅ nö i kui ò; ngaich Āròn Hör inrē nö ṙāpkö kël ò, hĕng tak im töhĕng lā, ngaich im tahëng lā ngam tahëng taka; öt halöinyköre nuk kël ò ngaich, hanöng saha maneutti ngam tavūöi.

¹³ Mihôiṅ tī ngaich Yôsuā tö Amelek tö yik tarik ò inrē nö nyahaṅtī tö sanët.

¹⁴ Ngaich ngö ṙô ngam Mā Tēv tö Môsös, Kūchö e i mat līpöre nö inköpkölōn, ahangnyö e inrē elnang Yôsuā: tö Chu min ahetngö inköpkölōn tö Amelek nö sīchi el katòh ngam halīöngö.

¹⁵ Ngaich vīhö tahāklö ang Môsös, ngaich kaheuk minë-eny e nö Yehōvanisi:

¹⁶ Ngaich ngö ṙô angā-aṅ, chūöku ṙô an ngam Mā Tēv nö kilēḵngôre: lā-al Amelek an min ngam Mā Tēv nö kiyung i tumköl chap.