MANEUTNYI 12 - TÖHET LĪPÖRE (Re-edited) Bible (BSI)

Chinööḵngö Tö Ngam Mā Tēv

¹ Ngaich ngam Mā Tēv nö vë-ekūö Môsös Āròn inrē, nö im panam Aikup, nö ngö ṙô,

² Raneh në chingëṅt ön min ngòh chingëṅt nö in yīö: raneh ön min nö chingëṅt samyeūheu nö in yīö.

³ Vë-ekūö yip ṙôngö Israĕl man, nö ṙòkhöre, ngö ṙô, Im sinöm sumkam ngòh chingënt kē kūön pököre min cha-a hĕng nòng i töhĕng tak tarik sā tum mitī-i patī yip yöng cha, hĕng nòng kūön pököre, aṅ töhĕng mitī-i.

⁴ Ngaich yĕn kūöṅnen yip aṅ töhĕng mitī-i nö ip kūön pököre, ngaich angā-aṅ töp hol ò ranghö patī ò hĕng nòng kahë sā tum tak yip tarik: sā ṙôkvat tarik nö nyā-avkūö öi kaheuklö alaha ngam kūön pököre.

⁵ Hòṅ töt vāhav alaha öp pököre meh, kōiny lanòh nö im samyeūheu: kē an më-eṅ i nup sīṅp hēk inrē i nup pököre:

⁶ Hangöhngen ò më-eṅ hanöng saha öp finënsīön sakāmö ngam chingëṅt angā-aṅ: ngaich ṙòkhöre nö mūl yip ṙôngö Israĕl min nö ṙatnyö likeun ò tö harap.

⁷ Ngaich chā-a min nö kē öp mahām, ngaich māichtö e nö i nup tö āṅlā-a mirëṙö machööḵlö kālkui inrē: i nup patī inrē chūök cha nö nyā-avkūö tö ò.

⁸ Im hatööm chā-a min nö kāḵ ap alaha, harāngö i kūö tameūyö, öp töt aföhlöng ròtī inrē; kā-a e chā-a nö holkūö tö tö angū-uvö rōi chōn.

⁹ Un kā-a angū-ö nö uhāv unrēhĕn nö sumtu nö el mak harāngö pöri nö i kūö tameūvö; ap kui ò holtö nup kalröön ò tö nup aṅ ellōn ò.

¹⁰ Uh yī-ö inrē hökngen ap alaha ò nöng ngöh, yĕn ōtre pöri ap alaha ò nö söllö peuheū; haṙāpngen e yī-ö i kūö tameūyö.

¹¹ Ngö inlahen pöichö kā an; nyëkö nun minë ṙat yīö, i kunröönre kunröpö, tinkung inrē eltī yīö; kā-a e inrē yī-ö öi kurātö kūö; chinööḵngö ana tö ngam Mā Tēv.

¹² Pò chu min lök im panam Aikup ip hatööm angū-ö ngaich chökhutī min tö yip lanòh nö ṙòkhöre i panam Aikup, hĕnghöre tarik töṙeūla inrē; i nup tēv Aikup inrē nö ṙòkhöre öich akah fālen: Chū-ö Chin Mā Tēv.

¹³ Ngaich ap mahām min nö in meh nö minkahngö nö i nup patī chūök yīö: ngaich hē Chu meuk ap mahām, chööḵngen yīö Chū-ö min, ngaich yī-ö min ötteunghu tö plēk nö inlëlngö yīö, hē Chu chökhutī tö ngam panam Aikup.

¹⁴ Inköpkölōn yīö an min ing sakāmö; haköpkö e yī-ö min nö tökiröng nyinā-aṅ i ngam Mā Tēv: haköpkö e yī-ö i tumkölchap yīö nö tökiröng nyinā-aṅ nö örheūheu nö i Chöngö. Sakāmö Ngam Tötaföhlöngö Ròtī

¹⁵ Sat sumkam kūö yī-ö min nyā rôtī töt aföhlöng; ip raneh sakāmö yī-ö kēngö nup tö-aföhlöng rôti nö ṙā-ang el patī yīö: pò öp nyamā tö-aföhlöng rôtī nö löktö kūö ngam raneh sakāmö söl im sinat sumkam, rökiṙen min ap tarik angā-aṅ nö ṙā-ang in Israĕl.

¹⁶ Töhet manūlö yīö ap min ip raneh sakāmö, töhet manūlö yīö inrē ip sinātö sakāmö; in u öt tökēkaṙenvö la-en, höng anū-ö tölngö la-en yīö.

¹⁷ Haköpkö ngam tökiröng nyinā-aṅ tötaföhlöng rôtī; tön angū-ö an sakāmö hē Chu kēnyen yīö öi maṙôngö ṙā-ang Aikup: lökten yin haköpkö ngih sakāmö i tumköl chap yīö nö örheūheu nö Chöngö.

¹⁸ Im raneh chingëṅt, ip finënsīön sakāmö ngam chingëṅt tö harap, nyā tötaföhlöng yī-ö rôtī söl ip sakāmö ngam chingëṅt tö nët anāi kahuk tö harap.

¹⁹ Sat nup sakāmö nup patī yīö nö öt aṅhaṅv tö tö-aföhlöng rôtī; pò ap nyamā öp tö-aföhlöng min, rökiṙen angā-aṅ min tarik nö i manūlö Israĕl, pòrô nö tötngöhaka hēk inrē angā-aṅ öp töfötnyu nö im panam.

²⁰ Öt nyā tö-aföhlöng rôtī yī-ö keuheūtngöre el chūök yīö öi nyā töt aföhlöng rôtī.

Raneh Chinööḵngö

²¹ Ngaich Môsös nö havëtö yik mākūö Israĕl nö ṙòkhöre, ngaich ngö ṙô tö cha, Kuṙòh kēḵ nup kūön pököre yin asā mupīhö yīö, ṙatnyö likeun ngam chinööḵngö.

²² Hĕng minyëkö kahë pöichö tö rōi hisòp, kasumtö e ip mahām öp el ap pēsön, kichëny ngam kālkui tö nup tö āṅlā-a mireṙö machööḵlö, tö ngam mahām ngam me-el ap pēsön; un hĕng tak tö yīö min kumnyi-inyre nö lā-uk ap inkūp hanöng saha ap peuheū.

²³ Ngaich min ngam Mā Tēv nö lök muh nö hachök yip aṅ Aikup; ngaich meuk ngam mahām angā-aṅ nö im kālkui, i nup tö āṅlā-a mireṙö machööḵlö inrē, ngaich ngam Mā Tēv min nö chööḵngö ngam inkūp, ngaich öt halöngngen ngam mahalëlhanga min nö yih nö i nup patī yīö nö hachökö yīö.

²⁴ Ngaich yī-ö min haköp ngih tö ngatī nö Chöngö nö in meh i yip kūön meh inrē nö örheūheu.

²⁵ Ngaich angū-ö min, hē yīö min teung ip panam ap tökētuvö tö ngam Mā Tēv nö in yīö, sā ṙô Ò nö kilēḵngôre öi hōtu haköp ngih la-en min.

²⁶ Ngaich angū-ö min, hē yip kūön yīö min nö ngö ṙô tö yīö, Suh manah öng tö ṙô yīö ngih la-en?

²⁷ Ngaich ngö ṙô yī-ö min, Tökētu an nö im chinööḵöng tö ngam Mā Tēv, ngam chamööḵngö nup patī kūön Israĕl i Aikup, hē Ò nö hachök yik aṅ Aikup, ngaich ṙānyu nuk patī ih. Ngaich yik tarik nö sōnngökuire nö salām.

²⁸ Ngaich kiröönngöre yik kūön Israĕl ngaich ngatī inlahen; sā tinöölô Môsös, Āròn inrē tö ngam Tēv, ngaich ngatī chā-a.

Kinpāha Yip Lanòh

²⁹ Ngaich ngö inlahen ik chūöl hatööm, ngam Mā Tēv nö hachök yik lanòh nö ṙòkhöre im panam Aikup, löktökūö lanòh nö in Fërō ök amūichhak nö el kantēra rācha, söl i lanòh tö Hakövö ap me-el kinlēḵngô inkövö; ṙòkhöre lanòh nuā inrē.

³⁰ Chōholre ngaich Fërō tö hatööm, angā-aṅ, ṙòkhöre inrē yip tarik alaha ò, ṙòkhöre inrē yip aṅ Aikup; yöng pineūnyö ngaich ök umuh i Aikup; pòn öt hĕng patī töt hĕng hang tak aṅ tö kupah.

³¹ Havëten Môsös ngaich angā-aṅ tö hatööm Āròn inrē, ngaich ngö ṙô, Chōholre kē-ĕngre ṙā-ang i yip tarik chu, nā-aṅ nyöre tö yip tarik kūön Israĕl inrē; lök la-en ngam Mā Tēv, kuṙòh, sā ṙô nā.

³² Kē nup töṙeūla hĕnghöre nup tömūlhaka inrē chehen yīö, sā ṙô yīö ngaich yin kuṙòh; hakôlò chu inrē.

³³ Kurāten yik aṅ Aikup nö i yik tarik, nö kumeūinyen cha nö ṙā-ang im panam; pòn ngö ṙô chā-a, Ṙòkhöre tarik min nö kapah.

³⁴ Ngaich yik tarik nö kē nuk tökirāchö atra urēhĕkūö u nö föhlö nuk tökachāvu cha, haṙūngö nö el hilā cha nö el ranôṙö cha.

³⁵ Ngaich yik kūön Israĕl nö asā ṙô Môsös; ngaich chā-a inrē nö havëkö kūö yip aṅ Aikup tö rupīö yanöṅtö, humlum yanöṅtö, hilā inrē;

³⁶ Kētö neukhö cha inrē ngam Mā Tēv nö i kūö yik aṅ Aikup, pòn hōtu chā-a nö teūngen tö nup töng havëkö cha. Ngaich chā-a nö āichngen tī tö yik aṅ Aikup.

Ṙāngö Aikup Yip Israĕl

³⁷ Ngaich yik kūön Israĕl nö kiröön nö löktö kūö Rāmsēs nö kū-ö tö Sakòt, tafūölòng köiny yik kumröön tarik, ötkaheuktu nyīö.

³⁸ Kalūöchöre tö ṙôngöre nö kiröönngöre chā-a; töṙeūla, tömūlhaka, pōyen inrē nuā.

³⁹ Ngaich cha-a nö harang töt aföhlöng rôtī aṅ i nuk tökirāchö atra nuk kum cha nö ṙā-ang Aikup, pòn öl nö föhlö: pò cha nö kuringnyu nö ṙā-ang Aikup, ngaich ötkô nö ngöh sin, ötrēhĕn chā-a nö halēnku tö nyā-aṅkūöre.

⁴⁰ I yöng Aikup chā-a yik kūön Israĕl nö fënòng lūöi anāi samyeūheu.

⁴¹ Ngaich ngö inlahen i kinheūṅtö töfënòng lūöi anāi samyeūheu, im sakāmö angū-ö nö teungtö kūö nö ṙòkhöre yik tarik ngam Mā Tēv nö kunyi-inyre nö ṙāngö ngam panam Aikup.

⁴² Hatööm an angū-ö nö tökiröngen inköpka nö im Mā Tēv, pòn kēnyen cha Anga-aṅ nö ṙā-ang panam Aikup; Hatööm ngam Mā Tēv an angū-ö nö tökiröngö hinöngken tö yip kūön Israĕl nö ṙòkhöre i tumkölchap cha.

Chöngö i alaha ngam Chinööḵngö

⁴³ Ngaich ngö ṙô ngam Mā Tēv tö Môsös tö Āròn inrē. Ngih ön Chöngö i ngih chinööḵöng: öt nyā-aṅ an tö aṅ tahëng:

⁴⁴ Keuheūtlöre pöri yip tarik kūön alaha töhavāha nö ṙāi tö rupīö, yē meh ngaich tunyinyngen ò ngaich möl angā-aṅ nö nyā-aṅ e.

⁴⁵ Öt nyā-aṅ e min ngòh töng yamih tö ngòh töhaṙāyö kūönkūö inrē.

⁴⁶ Hĕng mitī-i ap chūök e nö nyā-aṅ; un tökē-ĕyivö alaha nö ṙā-ang el ngam patī; uh yī-ö rēhĕn hēngö likölngö tö tangëḵ.

⁴⁷ Haköpö e min nö ṙòkhöre yip ṙôngö Israĕl.

⁴⁸ Yĕn hĕng taka öp aṅ tahëng mi-iyöng in meh nö rahëichtaṙen, ngaich haköpkö ngam chinööḵngö min nö i ngam Mā Tēv, ngaich ṙòkhöre nö tunyīnyi yip kikōnyö, ngaich hökten ò nö möl nö haröhtöre; haköpkö e inrē; ngaich angā-aṅ min nö sā öp töhĕng tak tökayôḵnyu nö im panam: hö-ö pöri nö kô ap töttunyīnyi tarik nö nyā-aṅ e.

⁴⁹ Hĕng öp Chöngö nö in ò ap tö fötnyu nö i patī, ngam aṅ tahëng inrē törahëichtaṙen nö iyöng in meh.

⁵⁰ Ngatī inlahen yik kūön Israĕl nö ṙòkhöre; sā Chöngö ngam Mā Tēv nö in Môsös in Āròn inrē, ngaich ngatī chā-a.

⁵¹ Ngaich ngö inlahen im angū-ö sakāmö, tö ngam Mā Tēv nö kēnyö yik kūön Israĕl nö ṙòknyöre tī nö ṙā-ang panam Aikup.