MANEUTNYI 11 - TÖHET LĪPÖRE (Re-edited) Bible (BSI)

Ahangka Kinpāha Yip Lanòh I Aikup Tö Môsös

¹ Ngaich ngö ṙô ngam Mā Tēv tö Môsös, Hĕngtöre öp plēk kahëtö Chu min i kui Fërō, i kui Aikup inrē ngaich unôichngöre min angā-aṅ nö hökngen yīö kiröönngöre ṙā-ang hih: ip hē ò min nö hökngen yīö kiröönngöre hankanringhöiny öp min tö yīö ṙòkhöre ṙā-ang ihih.

² Vëhet elnang yip tarik töngamuh, hökngen cha inrē nö kö havëkö kūö tarik öp hol ò, kikānö inrē ip hol ò, tö rupīö yanöṅtö, humlum inrē yanöṅtö.

³ Ngaich ngam Mā Tēv nö kētö neukhö yik tarik nö i kūö yik aṅ Aikup. Ngaich inrē ngam tarik Môsös nö tökiröng nö im panam Aikup, nö i kūö yik kūön alaha Fërō i kūö yik tarik inrē.

⁴ Ngaich ngö ṙô Môsös, Ngö ṙô an ngam Mā Tēv, Ip chūöl hatööm Chin min kiröön ellōn Aikup:

⁵ Ngaich ṙòkngöre vah yip lanòh min im panam Aikup nö kapah, löktökuö öp lanòh Fërō öp amūichhak nö el kantēra rācha, söl ip lanòh öp kūön alaha ò kikānö öp lamārit öp kinṙīöt atra; ṙòkhöre nup lanòh inrē.

⁶ Keuheūtngöre chūök min im panam Aikup öp yöng pineūnyö, öt töasā-avö min nö sā e, ötrēhĕn min nö hēktöre tö sā e.

⁷ Lā in yip kūön Israĕl pöri min öthĕng nòng am kumchalnyö litākre, nö i tarik hēk i töṙeūla inrē: Hòṅ yīö akahalōn tö inrīkngöre tī ngam Tēv tö aṅ Aikup, Israĕl inrē.

⁸ Ṙòkhöre vē kūön alaha meh min nö yihtöre nö in Chu ngaich sōntöre nö in Chu: nö ngö ṙô, Kē-ĕngre man ngaich, ṙòkhöre inrē më tarik Meh më tamömrit Meh, Möl chū-ö min kirönngöre ngaich angā-aṅ nö ṙā-ang in Fërō nö kirööngöre tanānyö.

⁹ Ngaich ngö ṙô ngam Mā Tēv tö Môsös, Öthō öp Fërō min nö hang ṙô meh; Hòṅ në pinngangkūö tī Chu nö ṙūölöre ṙòken nö im panam Aikup.

¹⁰ Tītö në pinngangkūö nā Môsös nā Aròn nö i kūö Fërō; Hangëngö ellōn Fërō pöri ngam Mā Tēv, ngaich öthalöngngen yip kūön Israĕl angā-aṅ nö kiröönngöre nö ṙāngö panam ò.