MANEUTNYI 1 - TÖHET LĪPÖRE (Re-edited) Bible (BSI)

Ötlēkaṙen Yik Israĕl Nö I Aikup

¹ Në nun minënyö yik kikōnyö kūön Israĕl, yik yamih nö i Aikup; keuheūtlöre tarik tö yik aṅ pati cha nö yih nö hol Yāköp,

² Rūpen, Simōn, Lēvi, Yūta inrē;

³ Isakār, Sepulön, Penyamin;

⁴ Tën, Naftali inrē, Kāt, Asēr inrē.

⁵ Ṙòkhöre yik tarik lamöknyö el ulāvö Yāköp, nö sat anāi tumtak; ha-ëheten ngaich Yôsĕf nö i Aikup.

⁶ Kapah ngaich Yôsĕf, ṙòkngöre yik mëm, kahëm ò inrē, ṙòkngöre inrē yik aṅ ök michāpö angū-ö.

⁷ Mikūönlö yik kūön Israĕl, ṙūölöre nö kalēḵ inrē; tööḵlö ngaich ngam panam tö cha.

⁸ Ngaich tufömngöre ök umuh rācha i Aikup, ök töt akahakūö tö Yôsĕf.

⁹ Ngaich ngöṙô angā-aṅ töyik tarikre, Yĕh meuk, pōyen yin vē kūön Israĕl tö hī kalēḵ inrē.

¹⁰ Tā-a; töi huveū lök alaha cha ngaich kēngen cha un ing panam; hòṅ cha nö öt ṙūöhölre ṙôngö, ngaich min, yĕn hē kinyūngö, ngaich chā-a nö hamūltöre nö in yip lā-al hī, ngaich kiyung nö lā-al hī.

¹¹ Lökten cha nö asöklö yöngṙen töla-evṙen nö in cha, nö hakihten nö hol tī tönup lumngan cha; ngaich chā-a nö mānlö chūök chehen Fërō tö elpanam, Pitōm, Rāmsēs inrē.

¹² Ip ṙôkö tī cha pöri nö hakihten cha, vaich tö ṙūöhölre ṙôngö cha-a ṙūönyöre pinrātngö inrē. Ngaich chā-a nö kunyāhaṅlōn tökūö yik kūön Israĕl.

¹³ Ngaich yik aṅ Aikup nö vīten yik kūön Israĕl nö ngë-eṅ la-en.

¹⁴ Ngaich chā-a nö vīten cha nö kunyāhaṅlōn nö i nuk tökihngen la-enre, i vinī-i lanit īt inrē, nup tökeuheūttöre la-en inrē el kahôyö, ṙòkhöre nup la-en cha, nup chūök tī cha tö cha nö kalē-ĕ la-en.

¹⁵ Ngaich ök rācha aṅ Aikup nö vë-ekūö nak lamāich yik Hīprū, hĕngtaka ök tö ngö minë-eny Sifra, Puah minënyi ök tahëng.

¹⁶ Ngöṙô angā-aṅ, Yē nā pöchö lāich yip Hīprū kikānö, ngaich meūkö cha nö el chūök töchööku; yĕn kikōnyö, ngaich kumpāhan nā-aṅ; yē ò pöri nö kikānö, ngaich aṅ min angā-aṅ.

¹⁷ Töpa-ekūö pöri nak lamāich töngam Tēv, ngaich öthō tö tinöölôre tök rācha aṅ Aikup, ṙātö yik kikōnyö pöri nö aṅ.

¹⁸ Tölṙô invëtö nak lamāich ngaich ök rācha aṅ Aikup, ngaich ngöṙô tö cha, Kūöyòh an ngatī inlahen, an ṙātö yip kikōnyö nyīö nö aṅ?

¹⁹ Ngaich nak lamāich nö ngöṙô tö Fërō, Pò yip Hīprū kikānö nö öt sā yip kikānö aṅ Aikup; pò cha nö tökeū, ngaich urĕhnyi kūön tö yanīhih ngam lamāich nö in cha.

²⁰ Ngaich ngam Tēv nö löökö tī nö in nak lamāich; ṙūölöre ṙôngö yik tarik, kalēḵlöre inrē.

²¹ Ngaich kūö nak lamāich nö tö pa-ekūö töm Tēv, ngaich vīlö patī cha angā-aṅ.

²² Tölṙô yik tarikre Fërō nö ngöṙô, Suktö nyīö kikōnyö tökayônyu, el ngam tahël, ṙātö yip kikānö nyīö nö aṅ.