MAIKA 1 - TÖHET LĪPÖRE (Re-edited) Bible (BSI)

¹ Yih ngam ṙô ngam Mā Tēv nö in Maika ök aṅ Môrēsĕt hē nup sakāmö Yôtam, Ahas, Hēsikiā inrē, rācha aṅ Yūtā, ök maheuṅk ò inlahen Samariā Yērusalem inrē.

Inrāmö Sömerīa Nāṅ Yeruselem

² Hangihtöre yī-ö ṙòkhöre yī-ö tarik; Ō tumlat, hangihtöre, yī-ö inrē aṅ e: hökngen ngam Mā Tēv nö mameuk nö lā-al yīö, ngam Mā nö ṙeū-eung el ngam töhet chūök re.

³ Yĕh meuk, pò ngam Mā Tēv nö kunyī-inyre nö ṙā-ang el chūök re, ngaich yônti min, ngaich rööntö kui nuk lātulöng chūökö im tumlat.

⁴ Ngaich minë rôngö min nö töhaṙöichö mās nö lātaṙeū tö ò, nup achāṙö inrē nö kilūhötvö ël, sā paröm nö i kūö tameūyö, sā nup mak töṙöstu nö i tölūkö kaha.

⁵ Kūö nuk fālen Yāköp nup anū-ö, kūö tökööl aṅ patī Israel, inrē. Asuh ap fālen Yaköp? Röh öng nö Samariā? Asuh nup lātulöng chūökö i Yūtā? Röh nup nö Yērusalem?

⁶ Lökten chin min vīten Samariā nö sā töteūichtu inrē el panô-òṅ vāin: ngaich chū-ö min inrē el panô-òṅ vāin: ngaich chū-ö min inrē hōgtö up ihong el achāṙö, ane inrē kôtökūö chū-ö mintö rööntö machööḵlö e.

⁷ Ṙòkhöre min nup insātēv töka-īpö nö pōngi nö piyënyi, ṙòkhöre inrē min nup ṙāi inṙūöngkö ò nö föngi nö i kūö tameūyö ngaich ṙòkhöre min nup insātēv ò nö piyāyi tö chu: pò ò nö hamūlö u nö ṙāi mī-inyihköre kikānö, ngaich anū-ö min nö havantu nö ṙāi mi-inyihköre kikānö.

⁸ Kūö e chin min harāmöre hū-a inrē, ngaich chū-ö min kiröönngöre lūhuyö hilā chumlal inrē: sā ṙô chakāl chin min harāmöre, sā ôsrich inrē haṙivlōn.

⁹ Pò nup nyaha ò nö öt hanlinkenṙen: pò e nö uròh nö yih nö i Yūtā; sölta an nö i kūö inkūp yip tarik chu, nö uroh nö i Yērusalem.

Taneūngö Yik Lā-al Yeruselem

¹⁰ Uh an nö vënyu nö i Kāt, un peuiny rēhĕn: pilönöre chin ngaich el tumlat i Pĕtli-afrah.

¹¹ Kiröönngöre yin ngaich, Ō yi-ö aṅ Safīr lichôi sirōngkūö inrē: öt kunyī-inyre yip aṅ Sē-ānan; kē-ĕyö ap min chūök röön meh nö ṙā-ang in meh tö ṙô Petĕsal nö harāmöre.

¹² Pò yip aṅ Marôt nö halöinyöre nö hökkö tölöök: pò ngam tötlöök: nö yônti nö ṙā-ang im Mā Tēv nö i kūö inkūp Yērusalem.

¹³ Kapôktö ngam inröl im töveut kōra, Ō yī-ö aṅ Lakis; anga-aṅ an ranehlö tökööl nö ip kikānö kūön Siyôn: pò ngam tökööl fālen Israel nö kôti nö in meh.

¹⁴ Lökten man reusngörit Morēsĕtkāt; inchīlö yip rācha aṅ Israel ap min patī Aksip.

¹⁵ Ṙòngmö kē-ĕti chin min in meh, Ō me-eṅ aṅ Marēsah, anga-aṅ ap tö-amīnu min tö meh: yih öp min nö i Atulām öp kanôlò Israel.

¹⁶ Hangānyngö kui re mana, vinngö tī i kui re öm in yip nyīö kūön ṙanāmölōn meh: ṙūönyö ṙôkti ngam nganānyö kui re man sā nganānyö kui matēṙö; pò cha nö ngaich nö chuh el inkövö nö ṙāngen meh.