KÒLÒSĪ 1 - TÖHET LĪPÖRE (Re-edited) Bible (BSI)

¹ Tanīnöṙô Kristū an Pôl, ngam hol hī inrē Timòtī, löktö i lōn ngam Tēv.

² Löö i yip töhet, yip hol, tökô-en nö in Kristū mi-i Kòlòsī: inlōnti yēḵ in yīö, lanāmö inrē aṅ im Tēv Yöng hī.

Ṙô Nöinytötī

³ Ha-öiny ngam Tēv in, ngam Yöng ngam Mā hī Yēsū Kristū, yē ih örheūheu ve-elkui yīö.

⁴ Pò ih hang ngam mikah yīö in Kristū Yēsū, ngam mikah hanāngenlōn yīö inrē, i vē taṙòkhöre tarik ngam Tēv; lökten ngam mineūka ngam hinöngken yīö el halīöngö.

⁵ Ngaich yin hāngö e, lökten i ṙô ngam tölöök inhānga kanô-en;

⁶ Ngam yamih nö in yīö, sā e inrē i në taṙòkhöre panam, ṙònguvö, nö ṙuhölre; sā e inrē nö in yīö, hētentö ngam sakāmö yīö ngaich hang, akahalōn inrē, im kanô-en tö ngam inlōnti aṅ im Tēv.

⁷ Sā haköp yīö in Epafaras ap hanāngenlōn hol ih töla-evṙen, ap tökô-en mahalanṙen Kristū nö in yīö,

⁸ Ap vamë-enynang ih inrē tö ngam hanāngenlōn yīö aṅ im Töhet Fanöinylö.

⁹ Angū-ö an lökten ih inrē, hētentö ök sakāmö ih hāngö e, öt ṙākôre vë-ekūötēv, ve-elkui yīö inrē, hòṅ yīö tööḵlö tö inkaha lōn ngam Tēv, i nup tökeuheūttöre mikah, mikahlōn inrē.

¹⁰ Ngaich yī-ö min kô lök im Mā, haṙamlōn i nup tökeuheūttöre; ṙônguvö i nup tökeuheūttöre tölöök la-en, ṙuhölre inrē im mikahkūö tö ngam Tēv;

¹¹ Hangëka tö nup tökeuheūttöre kanô-òṅ, pò ngam minhôiṅyö ngam kanôlò Ò, im panītnyö, manöiyö inrē, holtö ṙanāmölōn;

¹² Ha-öiny ngam Yöng, ngam vamīten hī tökô hamòl im amin yip töhet aṅ el hanātö.

¹³ Ngam ṙamānyen hī ṙā-ang el ngam sinngūlö, ngaich haṙī-ing chūök hī im pūlngö ngam Kūön hanāngenlōn:

¹⁴ Ngam chūök hī ṙinānyuvö, ngam inṙē-ĕl hī;

Tinrikngen Tö Ngam La-en Kristū

¹⁵ Ngam insā ngam tötmeūkö Tēv; ngam lanòh në tövilöngö;

¹⁶ Pòn in Ò vinīlö në taṙòkhöre, el halīöngö i kui ngih tumlat inrē, nup tömeūkö, tötmeūkö inrē, yĕn anūichö rācha, pūlngö, minā-aṅ, chöngö inrē; lökten in Ò nö ṙòkhöre chehen nö vīlöngö, in Ò inrē;

¹⁷ Urĕhlö Anga-aṅ tö taṙòkhöre, in Ò inchūöklö në taṙòkhöre.

¹⁸ Anga-aṅ an kui ngam alaha, ngih māṅ: ngam ranehlö, ngam lanòh nö ṙā-ang i yip tökapah; pòn hōtu Anga-aṅ nö i taṙòkhöre nö saṙaklöng lanöökö.

¹⁹ Pò e misī nö lanöökö lōn ngam Yöng, nup tanöölö nö ṙòkhöre nö iyöng in Ò;

²⁰ Ngaich lökten in Ò nö halām taṙòkhöre nö in re, ngaich ngötī nö halöök lökten i mahām ngam töhakālö Ò; lökten in Ò, pòrô nup ing panam, hēk pòrô nup el halīöngö.

²¹ Ngaich yī-ö, ha-ehangen misī tö tumhëngi kumnyah-elmat inrē i nup tötlöök la-en yīö, ngaich töngamuh Anga-aṅ nö halāmhöti,

²² Nö i ngam alahare nö lökten im kinpaha, nö kēten yīö töhet töt mirūnu inrē, töt vinëku inrē öi i kūö Ò;

²³ Yē yīö ngati urāta im mikah, ultöre ngaich köp inrē, ngaich öt ṙuhöyö tö ngam mineūka ahang yīö aṅ im tölöök inhānga, ngam tö ngaich misī nö ahangnyu nö i në taṙòkhöre tövīlöngö elkatòh ngam halīöngö; ngam lökten chu chu-ö Pôl, vītu mameukṙen.

La-en Pôl Nö Tanöölô Ngam Māṅ

²⁴ Ṙāmölōn chin i në kanihngenre tö pòkūö yīö, ngaich haṙënngö ngam töhāṅten chu-ö kanihngen Krsitū ing alahare, pòkūö ngam alaha Ò, ngih māṅ;

²⁵ Ngam lökten chu vītu mameukṙen, sā ngam ṙinūönyö aṅ im Tēv, kinë-eṅkūö chu nö in yīö,

²⁶ Ngam öt mikahkūö sin, ngam töhanyāti nö ha-ehelen i tumkölchap: ngaich pöri angū-ö nö hameuktu nö i vē töhet kūön Ò,

²⁷ Yip chūök lōn ngam Tēv, tö mikahtulōn tö ṙôken kanôlò ngam lanöökö ngam öt mikahkūö sin nö i yip Tahëng mihëṅṙö, ang Kristū, ngam mineūkkö kanôlò:

²⁸ Ngam ahangkö ih, fēḵlö taṙòkhöre tarik, haköptö taṙòkhöre tarik i nup mikah, hòṅ ih kētö taṙòkhöre tarik nö teung nö in Kristū;

²⁹ Ngam chūök chu chu-ö la-evṙen, pītnyöre sā tī Ò, ngam töla-evṙen nö mihôiṅ nö in chu.