I. CHÖNGÖ 3 - TÖHET LĪPÖRE (Re-edited) Bible (BSI)

Lā-al Rācha Ôk Ang Israel

¹ Havöökūöre ngaich ī-hö, ngaichlök el ngam talöökö chamuh Pāsān: ngaich Ôk ök rācha aṅ Pāsān nö kunyī-inyre nö lā-al īh, nö kiyung, i Etrei, anga-aṅ tö yip tarik ò inrē nö ṙòkhöre.

² Ngaich ngö ṙô ngam Mā Tēv tö chu, Um pa-ekūö tö ò: tön kēten ò chin, ṙòkhöre yip tarik ò inrē, tö ngam panam ò, nö eltī yīö; ngaich më-eṅ min sā tī re tö Sihòn ök rācha aṅ Amôr, ök mī-iyöng Hespòn ngatī tī më-eṅ tö ò.

³ Lökten ngam Mā Tēv ngam Tēv hī nö kēten Ôk inrē nö el tī hī, ök rācha aṅ Pāsān, ṙòkhöre yik tarik ò inrē: ngaich ayī-ö mihôiṅ tö ò hanöng saha ò ngaich nö öt hĕng tit tak aṅ in tö tö-ōtren.

⁴ Keuheūtlöre tī ngaich ayī-ö hē e: tö nup elpanam ò; öt hĕng hang elpanam töt kē-ĕ tö hī nö ṙā-ang in cha; tafūöl anāi nuk elpanam, keuheūtlöre i chīṙö Arkòp, ngam pūlngö Ôk i Pāsān.

⁵ Ṙòkhöre anū-ö në elpanam nö tökalonglöng tömarô-òl kui kinlōngö, tö-inkūpu, inköpngukūö inrē; holre tö nup töt kinlōngu panam nö pōyen.

⁶ Keuheūtngöre vah tī ayī-ö piyāingö u, sā tī hī tö Sīhòn ök rācha aṅ Hespòn, keuheūtngöre vah tī öi piyāingö tö iyöngö elpanam, tö kikānö tö nyīö inrē tö kūöṅnö.

⁷ Ṙòkhöre pöri nuk nuā, nup chehen inrē aṅ minë el panam, nö kē-ĕ tö hī nö pôḵ hī.

⁸ Ngaich hē e ayī-ö kēḵ ngam panam nö ṙā-ang eltī nak rācha tönët tak aṅ Amôr öp lāmuh tö Yôtön, löktökūö ap achāṙö Arnòn söl ip rung Hermòn;

⁹ (Seriòn öp Hermòn tö ṙô yip aṅ Sitōn, Senīr pöri angū-ö tö ṙô aṅ Amôr;)

¹⁰ Ṙòkhöre nup el panam im töṙā-akūö, ṙòklöre inrē Kilīöt, ṙòkhöre Pāsān inrē, söl Seleka Etrei inrē, elpanam ngam pūlngö Ôk i Pasān.

¹¹ (Pòn höng humengtit tak Ôk nö tö-ōtre nö rācha aṅ Pasān nö chööḵṙen yik Refēm; yĕhmeuk, ök palöng ò nö vët; röh ap nö i Rappat nö in yip kūön Amön? Machūötör mikëlö rôta apa, fën mikëlö ṙôktāk inrē sā mikëlö tarik.)

Nuk Miyöngö Mi-i Yöng Chuhöt Alaha Yôtön

¹² Ngaich kē-ĕ ngih panam tö īh hē e nö amin īh: löktökūö Arō-ër, ök ranghö achāṙö Arnòn, ròngtī inrē ök rung panam Kilīöt, nup elpanam umuh inrē kētu tö chu nö in yip Rūpön in yip Kāt inrē:

¹³ Keuheūtlöre Kilīöt, Pasān inrē, ök pūlngö Ôk, kētu tö chu nö in yip töròngti miyöngö Manāsē; ṙòkhöre i chīṙö Arkòp, ṙòkhöre Pāsān. (Angū-ö an panam Refēm tö ṙô.

¹⁴ Keuheūtlöre tī ök kikōnyö kūön Manāsē ang Yāir tö nuk i chīṙö Arkòp, söl i kūö panam Kesūr Ma-akat inrē; ngaich kaheūkö u tö Pasān inrē, nö sā minë-eny ò, nö Havòtyair söl ing töngamuh.)

¹⁵ Kētu Kilīöt tö chu nö in Makīr.

¹⁶ Ngaich in yip Rūpön in yip Kāt inrē löktökūö Kilīöt nö kētu tö chu söl im achāṙö Arnòn, ngam ellōn ngam achāṙö tö ngam kūö panam inrē; söl im tahël Yapòk, ngam kūö panam yik kūön Amön;

¹⁷ Tö ngam Arapā inrē, tö Yôtan ngam kūöngö e inrē, löktö kūö Kineret söl im mai Arapā ngam Sāl mai, elkatòh nup paneūti i Piskē kū-ö tö chuhöt.

¹⁸ Ngaich hē e chū-ö ngö ṙô töl ṙô yīö, Ngaich an ngam Mā Tēv ngam Tēv yīö nö kētö ngih panam nö in yīö nö amin yīö: havāngngöre pöichö in yip hol re yip kūön Israĕl öi kumtö aṅtī re kiyung, ṙòkhöre tarik tökalēḵ.

¹⁹ Höng yip pīhö yīö pöri, tö yip kūön yīö tö nup nuā yīö, (akahalōn chin tö yīö pōyen nuā,) anū-ö min töng ngöh nö el nup elpanam yīö nup kahëtö chu ngaich in yīö;

²⁰ Hanöng saha tī ngam Mā Tēv nö kētö haneūheu yip hol yīö, nö sā yīö yī-ö ngaich, ngatī inrē chā-a nö kēḵ aminre tö panam tö kahëtö ngam Mā Tēv, ngam Tēv yīö, nö in cha lā muh tö Yôtan; ngaich möl yī-ö min kö havantöre i nup amin re, tökētu ngaich tö chu nö in yīö.

²¹ Ngaich chū-ö tölṙô Yôsuā hē e, öich ngö ṙô, Ngaich man meuk nup taṙòkhöre tī ngam Mā Tēv ngam Tēv meh tö nak tö nët tak rācha: ngati tī an min ngam Mā Tēv tö nup pūlngö ip kū-ö meh havāngnöre.

²² Uh yin pa-ekūö tö cha: tön ngam Mā Tēv an ngam Tēv yīö, anga-aṅ an kumyunglen yīö.

Öt Halöng Hötvö Môsös Nö Kuhēthötre Nö I Kanā-an

²³ Ngaich hē-e chū-ö vë-ekūö ngam Mā Tēv, öich ngö ṙô,

²⁴ Ō Mā Tēv, möl man rĕhtenre hameukhömat ngòh tarik re tö ṙôköre, ngam tökalēḵ kël meh inrē: öp yòh öp tēv el halīöngö hēk ing panam, nö tökô nö sā la-en meh, tö sā minë mihôinyö la-en meh inrē?

²⁵ Vë-ekūö meh chin, halöngten chu havāngngöre, Öich meuk ap tölöök panam lā muh tö Yôtan, ap tövai rôngö, Lepenön, inrē.

²⁶ Līn pöri ngam Mā Tēv nö in chu tö pòkūö yīö, ngaich öt hang ṙô chu: ngö ṙô ngam Mā Tēv tö chu, Hökngen e ngaich nöng ngö tölngö nö in meh; um hēk vë-ekūö chu tö e angū-ö tö ngatī.

²⁷ Yônti man i kui ngam rôngö Piskē, hachônglö matre kū-ö tö lā sūng, lā kapā, lā lòhngö, lā chuhöt inrē, öm hakôtömatre ngëicha: tön hö-ö man min havāngngöre tö Yôtan.

²⁸ Tölṙô Yôsuā pöri, ṙūöhöl alaha ò, hangëken ò inrē: tön anga-aṅ ap min mahavāngngöre nö lā urĕh vē tarik, ngaich vīten cha min anga-aṅ nö amīnuvö töng panam ngam maheuṅk meh.

²⁹ Ngaich iyöngtöre īhö el achāṙö lā i Petpiôr.